ENTROIDO 2020

Como xa sabedes, o vindeiro venres día 21 de febreiro celebraremos a festa de Entroido. Cada aula irá disfrazada dun personaxe relacionado co universo. As nenas e nenos de Leiro imos ir disfrazados do SISTEMA SOLAR no sentido máis amplo da palabra: planetas, sol, lúa, estrelas... Seguindo un ano máis na liña de empregar menos plásticos e a regra dos 3R (Reciclar, Reutilizar e Reducir), cada familia encargarase do disfrace do seu fillo ou filla. Para que vos sexa máis doado, nesta nota atoparedes suxestións: empregando roupa que xa temos na casa, reutilizando algún disfrace doutros anos (perrucas, diademas, capas, medias …), reciclando materiais (teas, lazos, cartóns, xornais, caixas de ovos, envases de iogur…) levando algo que nos poidan prestar … Trátase de mercar o mínimo posible e poñer a imaxinación a funcionar ao máximo. Calquera cousa pode servir, o importante é pasar un rato agradable creando cos meniños. Canta máis variedade haxa máis vistoso quedará o desfile! Nos seguintes enlaces podedes atopar ideas con fotos e vídeos que vos poden axudar

https://www.youtube.com/watch?v=b36mB7IigEM

http://blog.midibu4u.es/carnaval-espacial/

http://colorandlove.com/haciendo-un-disfraz-del-sistema-solar/?lang=es

http://unmundodesonrisaslpgc.blogspot.com/2018/12/manualidadgorro-del-sistema-solar.html?m=1

https://i.pinimg.com/originals/31/c7/fb/31c7fb9ef14a8f2b7247c5b78d175e18.jpg

E por suposto estades convidados a participar en familia: pais, nais, avós, avoas … Animádevos a vir tamén disfrazados de algo relacionado co Universo o día da festa de Entroido. Se necesitades axuda ou calquera aclaración, non dubidedes en preguntar. Moitas grazas pola vosa colaboración.

A MANDARINEIRA DE MARTA

O segredo da árbore de Marta está nos seus froitos, pero tamén nos xogos que realiza ao seu carón.

CINZA

O xoves pasado, cando estivemos vendo no xornal as candidatas á ave do ano 2020, falamos da cor gris cinza do Aguilucho cenizo. Moitos nenos non sabían que era a borralla ou nunca a tocaron. Hoxe trouxemos a clase unha caixiña con ela, vimos a súa cor, comparámola coa da ave e comprobamos como mancha. Pero sobre todo os meniños o pasaron en grande experimentando co seu tacto e cos anaquiños de carbón que viñan mesturados.

PIZZA MARIÑEIRA

AVES

Esta semana a noticia aparecida no xornal Faro de Vigo sobre a elección da ave do ano 2020, serviunos de detonante para coñecer as características destes animais. Ademais de ler e traballar ao redor da nova, vimos as tres especies seleccionadas e fixemos a nosa propia votación. Na nosa clase gañou o Alcaucón real aínda que seguido de cerca polo Aguilucho cenizo. As votacións reais quedaron pechadas este mércores e SEO/BirdLife anunciará o nome do gañador mañá.

A MACEIRA DE GAEL

O segredo da árbore de Gael é moi saboroso, como se pode apreciar na imaxe dá unhas mazás  ben ricas e ademais súbese á maceira para apañalas. Contounos que agora está deitadiña, debe estar cansa coma a ameixeira de Marcos, pero que a podaron e van intentar poñela dereitiña. El quere construír unha casiña de madeira enriba dela, xa nos contará se o consigue.

REUTILIZAR, RECICLAR E REDUCIR

Un ano máis o noso centro participa no programa Voluntariado miúdo:Móvete! que pon en marcha a Consellería de Educación co obxectivo de fortalecer a educación en valores. Este curso, cos nosos cativos imos centrar os esforzos en coidar o noso planeta a través das 3Rs da ecoloxía: reduce, reutiliza e recicla, como nos ensinou a fada das 3Rs na festa do Samaín. Cando reutilizamos, ademais de darlle unha nova vida as cousas e coidar a natureza, podemos pasar un rato moi agradable cos nosos fillos e conseguir que xoguen dun xeito diferente. Mirade nas fotos que xoguetes máis chuliños crearon os meniños na casa con tubos de papel.

BONECO DE NEVE

Xa estamos metidos de cheo no inverno e dende o noso obradoiro de cociña quixemos darlle a benvida elaborando un rico boneco de neve, un xeito divertido de animar aos meniños a probar a cenoria.

¡PARABÉNS AULA DE NATUREZA!

A aula de natureza da nosa escola vén de recibir un diploma ao quedar como finalista no concurso nacional de Huertos Educativos Ecológicos.Con este documento veñen a recoñecer o traballo realizado pola mestra Ana cos meniños ao longo do curso escolar 2018-2019 na nosa horta escolar. Estamos moi orgullosos do resultado obtido e queremos compartilo con toda a comunidade educativa xa que se presentaron candidaturas de toda España. ¡¡¡Felicidades Ana!!!

OS COMEFROITAS

Esta semana visitáronnos uns peluxes moi especiais que teñen como obxectivo fomentar o consumo de froita entre os meniños. Trátase dos comefroitas. Estarán connosco ata finais de curso e trouxeron un álbum para cubrir con selos cada día que comamos froita. Tamén queren animar aos nenos a incluir variade polo que, quen tome más de catro diferentes ao mes, coneguirá un selo de coroa e será nomeado rei ou raína da froita. Paseniño iremos vendo as moitas propiedades que teñen estes alimentos e o importante que é consumilos a diario para a nosa saúde.Hoxe os cativos levaron para casa as normas de funcionamento e as froitas de tempada do mes de xaneiro. Se consumimos a froita dentro do seu ciclo natural, gozaremos dun mellor sabor e das súas vantaxes ecolóxicas.

ROSALÍA XA TEN A SÚA ESTRELA

A candidatura da escritora galega gañou cunha gran maioría na votación celebrada para escoller o nome da estrela HD 149143. Vímolo a semana pasada na prensa dixital e aproveitamos para buscar en internet o Río Sar e falar da súa importancia na vida de Rosalía.

BALTASAR

OS AGASALLOS DO APALPADOR

Este ano o Apalpador deixounos na escola unha chea de cousiñas de madeira para compartir: quebracabezas, xogos de encaixes, un camión de bombeiros, outro de policías, unha ambulancia, bonecos, trens … Os regalos estaban agochados e non os atopamos ata despois do recreo. Os meniños tiveron pouco tempo para enredar con eles pero seguro que nos vindeiros días recuperarán o tempo perdido.