UNHA MISIVA ESPECIAL

A semana pasada a irmá de Gael fíxonos chegar unha carta cun debuxo dun lobo que nos gustou moito. Decidimos redactar unha resposta e darlle as grazas por tan agradable presente. Entre todos puxémonos de acordo co contido e serviunos de detonante para traballar ao redor das partes dunha misiva. Entre isto e os contos de cartas que andamos a ler, aos meniños entráronlles moitas ganas de escribir aos seus amigos e familiares. Animádevos na casa a axudar aos nenos a envialas e veredes que ben o pasades e a ilusión que fai recibilas.

DÍA MUNDIAL DO CORREO

A mascota da nosa biblioteca tamén gusta de ollar a prensa diaria. O pasado mércores, no xornal que nos trouxo Marta, leu que cada 9 de outubro se celebra o Día Mundial do Correo. Quixo celebralo connosco e preparounos unha bolsiña coa noticia do periódico e unha chea de contos de cartas. Dende entón, cada día o encargado elixe cal quere que leamos. Son libros cheos historias, con sobres, postais e unha chea de sorpresas que paseniño imos descubrindo á vez que nos mergullamos no mundo das cartas.

ZAPATOCAS E O CAMIÑO DE SANTIAGO

Á mascota da nosa biblioteca, ademais de ler, gústalle moito viaxar e aprender dos lugares que visita. Este curso quere emprender unha nova aventura facendo O Camiño de Santiago a pé. Contóunolo onte nunha carta na que nos pedía axuda para buscar información e preparar todo o necesario. 

Así que xa sabedes, se na casa tedes materiais relacionado con “O Camiño de Santiago” podedes traelos á escola para crear un novo recuncho e aprender todos xuntos.

ZAPATOCAS EN CANARIAS

Onte, na nosa visita semanal á biblioteca escolar, descubrimos unha nova carta da nosa mascota. Nela Zapatocas cóntanos que marchou para Canarias e anímanos a buscar información sobre esta Comunidade Autónoma.

Na nosa aula imos comezar un novo proxecto con este impresionante lugar como protagonista, pero primeiro temos que desmontar o recuncho de Andalucía e seleccionar que materiais conteñen tamén datos das Illas Afortunadas. Para quentar motores no obradoiro de cociña desta semana empregaremos como ingrediente un dos seus principais produtos: o plátano de Canarias. Neste enlace tedes información sobre este alimento e as características que o diferencian da banana.

CARTA DE FÉLIX

A nosa lebre viaxeira chegou a Australia. Soubémolo hoxe a través dunha misiva que recibimos na biblioteca. Nela fálanos dunha chea de cousas descoñecidas para a maioría de nós, pero nas vindeiras semanas iremos debullándoas e seguro que aprenderemos moitas cousiñas.

Para comezar intentamos memorizar o nome do país, aínda nos custa pronuncialo, e miramos nos mapas para localizalo. Limos e buscamos na carta os nomes dalgúns animais que coñecemos e outras palabras que xa somos capaces de atopar no texto sen problemas. Un novo proxecto está en marcha, xa vos contaremos.

CARTA DE FÉLIX DENDE A SELVA AMAZÓNICA

Xa sabemos onde está a nosa lebre viaxeira: ¡en “A Selva Amazónica”!. O luns recibimos a primeira carta de Félix deste curso e nela fálanos de animais sorprendentes: preguiceiros, golfiños rosados, tucanos, anacondas …  

Levamos varios días traballando ao redor da súa misiva e pronto comezaremos a montar un recuncho con toda a información que atopemos sobre este impresionante lugar. Se na casa tedes contos, libros, DVDs, fotos, quebracabezas, postais, mapas, obxectos, folletos ou publicidade de axencias de viaxes, receitas… relacionado co tema e adaptado ás idades dos nosos alumnos, podédelo traer para velo na aula e aprender xuntos. Graciñas.

FÉLIX ESTÁ NO CARIBE

Sabémolo dende o luns que recibimos unha nova carta da nosa lebre viaxeira. O mesmiño ca nós, Félix estaba canso de tanto frío e mal tempo, así que decidiu marchar para O Caribe. Na súa misiva fala de cocos, golfiños, baleas… e, coma sempre, aproveitamos a nosa visita á biblioteca para buscar información ao respecto e comezar a montar un novo recuncho. ¡Benvidos a “O caribe”!.

FÉLIX NO POLO NORTE

Onte soubemos que a nosa mascota viaxeira leva varias semanas vivindo cun neno esquimó no Polo Norte. O luns na biblioteca limos a súa última carta e xa comezamos a buscar información sobre este novo lugar. Como sempre, se na casa tedes materiais relacionado co tema, podedes traelo á escola para aprender todos xuntos.

FÉLIX E AS GRÚAS DA PAZ

Esta semana recibimos unha nova carta da nosa lebre viaxeira. Ela serviunos de punto de partida para coñecer  a historia de Sadako Sasaki e reflexionar sobre as consecuencias da guerra. Sadako vivía en Hiroshima e tiña dous anos cando lanzaron a  bomba atómica. Nove anos despois, enfermou de leucemia como consecuencia da radiación recibida. 

Mentres estaba no hospital unha amiga contoulle a lenda das grúas de papel: aquela persoa que fora capaz de facer 1.000 conseguiría que o seu desexo se fixera realidade. Sadako comezou a crear grúas pero pensou que no sería xusto pedir a curación soamente para ela e pediu que o esforzo que ía facer servira para traer a paz. Lamentablemente morreu despois de facer 644, pero os seus amigos continuaron a súa misión e completaron as mil grúas coa esperanza de que se evitaran as guerras no futuro. No Parque da Paz de Hiroshima realizaron unha estatua dela cunha grúa na súa man. Cada ano chegan grúas de papel de todo o mundo coa esperanza de que leven os seus desexos de paz. Na nosa aula tamén queremos render unha pequena homenaxe a Sadako e comezamos a construír grúas de papel para celebrar o vindeiro xoves o día escolar da paz.

CARTA DE FÉLIX DENDE XAPÓN

Cando Félix desapareceu no ceo, tanto Sofía coma nós quedamos preocupados. Pero agora xa sabemos que está ben, aínda que tivo un aterraxe un pouco accidentado. Contóunolo nunha carta que estivemos a ler a semana pasada, nela nos di que chegou a Xapón e que vai quedar alá pero… ¿onde está ese país?... en clase estivemos vendo mapas e intentado localizalo. Xa empezamos a saber que está formado por illas pero ao igual que Félix queremos coñecer a súa cultura, costumes, gastronomía…

Agora imos montar un recuncho na aula con todos os materiais que atopemos relacionados co país nipón. Coma sempre, se tedes na casa contos, libros, DVDs, fotos, quebracabezas, postais, mapas, obxectos, propaganda de axencias de viaxe, folletos ou calquera outro material relacionado co tema e adaptado ás idades dos nosos alumnos, podédelo traer para velo na aula e aprender todos xuntos.

FÉLIX CHEGOU A NOVA YORK

Soubémolo  hoxe, cando limos a carta que lle enviou a súa amiga Sofía. Nela fálanos dunha estatua xigante, un parque enorme e rañaceos. Na vindeiras semanas investigaremos sobre todo isto. Para empezar, ademais de buscar varias palabras significativas na carta de Félix, estivemos vendo os libros que temos na biblioteca que falan Nova York. 

Tamén imos montar un novo recuncho en clase, polo que, se tedes contos, libros, DVDs, fotos, quebracabezas, postais, mapas, obxectos, folletos de axencias de viaxe ou calquera outro material relacionado co tema e adaptado ás idades dos nosos alumnos, podédelo traer para velo na aula e aprender todos xuntos.

FÉLIX ESTÁ EN EXIPTO

Contóunolo nunha carta que limos a semana pasada. Nela fálanos de pirámides, camelos, desertos, incluso dun río chamado Nilo… Hoxe, na biblioteca escolar, estivemos vendo os libros de Exipto que hai nela. Temos moitos e puidemos observar algunhas das cousas das que nos falou Félix. Tamén descubrimos outras sorprendentes: uns signos estraños que a mestra chamou xeroglíficos, reis e raíñas, xoias… ¡ata momias! E o que moitos non se esperaban: ¡que existen de verdade!. Nas vindeiras semanas iremos recompilando e organizando toda a información sobre este marabilloso país que o noso amigo está a visitar. Por agora, xa sabemos que se queremos atopar información de Exipto na biblioteca, temos que buscar na zona documental no número 9, nos libros que teñen unha pegatina branca.

CARTA DE FÉLIX DENDE PARÍS

Sofía, a protagonista do conto “Cartas de Félix” que estamos lendo na aula, recibiu outra misiva do seu peluche. Como podedes ver na imaxe, marchou para París. Antes das vacacións estivemos traballando sobre esta carta e incluso intentamos aprender a xogar á petanca. Agora imos a investigar e coñecer cousiñas desta cidade e do país onde está situada, xa vos contaremos.

FÉLIX ESTÁ EN LONDRES

Sofía, a protagonista do conto “Cartas de Félix”,  recibiu unha carta do seu peluche. En clase, tamén a limos e buscamos nela algunhas palabras significativas para aprender como se escribían á vez que nos imos familiarizando con este tipo de texto. Agora queremos investigar sobre esta cidade e o país onde está situada…