O LIMOEIRO DE YASMINA

O segredo da árbore de Yasmina está nos seus froitos cos que fai saborosos biscoitos.

A LARANXEIRA DE ERIK

O segredo da árbore de Erik está nos ricos zumes que fai coas súas laranxas, pero tamén nos momentos de xogo o seu redor.

A MANDARINEIRA DE MARTA

O segredo da árbore de Marta está nos seus froitos, pero tamén nos xogos que realiza ao seu carón.

A MACEIRA DE GAEL

O segredo da árbore de Gael é moi saboroso, como se pode apreciar na imaxe dá unhas mazás  ben ricas e ademais súbese á maceira para apañalas. Contounos que agora está deitadiña, debe estar cansa coma a ameixeira de Marcos, pero que a podaron e van intentar poñela dereitiña. El quere construír unha casiña de madeira enriba dela, xa nos contará se o consigue.

O LIQUIDÁMBAR DE LAURA

O segredo da árbore de Laura pódese apreciar especialmente en outono, cando as follas adquiren as cores máis impresionantes que van dende a amarela e a laranxa ata a encarnada e violeta. A semana pasada contounos que xa estaban a volverse vermellas, esperamos que o vento lle deixe gozar durante máis días deste bonito espectáculo.

A AMEIXEIRA DE MARCOS

O segredo da árbore de Marcos é familiar e ten máis de cen anos, como podedes ler na imaxe do caderno viaxeiro. Gustounos tanto, que todos os meniños querían ir a súa casa a subirse a esa ameixeira que, de tan velliña, empeza a estar cansa e quere quedar deitadiña no chan.

A SEQUOIA DE LÍA

O segredo da árbore de Lía e ben bonito como podedes ler na imaxe do caderno viaxeiro. Contounos que a súa árbore estivo enfermiña pero que agora xa está recuperada. Para que viramos o especial que son as súas follas tróuxonos unha ramiña pequerrechiña que cheira de marabilla. No encerado dixital vimos o grandes que chegan a ser as sequoias e quedamos abraiados.

O LIMOEIRO DE ROI

Hoxe o noso caderno viaxeiro trouxo o segredo da árbore de Roi, trátase dun limoeiro moi especial …

O SEGREDO DAS NOSAS ÁRBORES

Hoxe puxemos en marcha unha nova proposta que paseniño ira pasando polos fogares de todos os meniños. Trátase dun caderno viaxeiro para apoiar a candidatura da Figueira da Casa-Museo de Rosalía de Castro como árbore do ano 2020.  A Árbore Europea do Ano creouse para dar a coñecer a existencia dun valioso patrimonio natural e cultural que todos deberíamos apreciar e protexer. A diferenza doutros concursos, non é importante a beleza, o tamaño ou a idade da árbore senón a historia e a conexión coas persoas.

Todos e cada un de nós seguro que temos unha árbore singular na nosa vida. A árbore que plantou  o avó, a que serve de cabana para os nenos, a que nos acompañou sempre, a que nos dá esa magnifica sombra no verán … Para nós son importantes aínda que non sexan as máis grandes, nin as máis vellas, nin as máis bonitas.

Trátase de elixir esa árbore significativa da nosa vida e axudar aos nenos a escribir o seu nome nese caderno viaxeiro. Tamén podedes contarnos o seu segredo, o porqué esa árbore é especial para vós e pegar unha foto dela cos nenos ou se o preferides enviala ao correo escoladeleiro@gmail.com. Conforme cheguen á escola a idea é que os nenos conten aos seus compañeiros esas vivencias relacionadas coas árbores e deste xeito valorarán, apreciarán e protexerán máis o medio ambiente.

UN RATO QUE É A PERA

Esta e a proposta de Rita para intentar que a mestra Ana supere o seu medo aos roedores. Trátase dunha rica receita de cociña que preparou na casa. Tamén Mencía intentouno a través da papiroflexia cun dificilísimo e precioso rato que realizou coa axuda do seu papá. Falamos de probar xogando a “Ratón que te pilla o gato” pero nin coa cociña, nin coas manualidades, nin cos xogos lográmolo. Hoxe xa nos deixou claro que por moito que fagamos, nin soporta nin soportará aos ratos. Decidiu  superar o seu medo asumíndoo. Mentres, na aula, seguimos co noso caderno viaxeiro de animais que non asustan e as nosas particulares estratexias para vencer os nosos temores. Mañá temos previsto xogar a “Buscar un león” e intentar dominar así o susto aos felinos, dende que Adrián propuxo o león temos moitas ganas, a ver que tal o pasamos.

MÁIS ANIMAIS QUE NOS ASUSTAN

O noso caderno viaxeiro continua a súa andaina polos fogares dos cativos. Cada vez coñecemos máis animais que espertan os nosos temores á vez que enriquecemos o noso vocabulario. Na aula estamos facendo un mural entre todos e aprendendo como se escriben os nomes. Por se queredes ir traballando sobre o tema, nos vindeiros días chegará as casas dos máis pequenos da escola,  pero xa hai quen  ten moi clara a súa elección.

ANIMAIS QUE DAN MEDO

O noso caderno viaxeiro de “Animais que dan medo” xa leva visitado varios fogares e, a través dos nosos temores, imos aprendendo cousiñas novas. Aaron tenlle medo ás avespas, graciñas a iso estivemos investigando e comprobamos que non son o mesmo que as abellas. Estas últimas fabrican mel e se nos pican morren, ao contrario cas avésporas. Se non as molestamos non fan nada, pero nunca debemos andar nos avespeiros. 

Mencía optou pola rá punta de frecha velenosa, tróuxonos moita información ao respecto e un documental que nos deixou a todos abraiados, vai adxunto ao caderno viaxeiro para quen o desexe ver na casa. Gabriel elixiu o tigre, vimos que é parecido ao xaguar pero con raias e non vive na Selva Amazónica; na enciclopedia da biblioteca de aula descubrimos que hainos brancos. Carlos tenlle medo ás arañas, a verdade é que a case todos nos asustan, así que decidimos… ¡comelas!... Xa vos contaremos o venres se nos saen ricas e seguiremos falando deses animais que nos dan medo.

XIRAFAS CON LANDRAS

Dende que viramos os que fixera Lucía coa axuda da súa mamá, todos queríamos ter monequiños  como os dela. O venres, decidimos aproveitar a tregua que nos deu a choiva para apañar landras e, paseniño, facer para todos. 

Comezamos realizando touros con cornos que era o máis solicitado, pero hoxe, coa xirafa que debuxou Pablo no caderno viaxeiro como detonante,  probamos a crealas con landras. A mestra Ana estivo axudándonos e ensinounos como decoralas con rotuladores. Agora todos queremos ter xirafas, a ver se as damos feito.

XOGANDO CO MEDO

Co gallo da festa do Samaín que celebraremos o día 30, hoxe comezamos a traballar na escola ao redor do medo para que, xogando con el, aprendamos a superalo. Por suposto saíron a relucir as pantasmas, pero non dubidamos en empregar as teas dos disfraces para demostrar que non existen e botar unhas risas.

Este curso ímonos centrar en aqueles animais que nos asustan, sexa con ou sen motivo. Con este obxectivo creamos un caderno viaxeiro que nos vindeiros días visitará os fogares dos cativos. Trátase de elixir un animal que nos dea medo, escribir o seu nome e engadir unha foto ou debuxo. Posteriormente, en clase traballaremos ao redor do animal escollido e falaremos dos nosos temores. Por agora sabemos que a profesora Ana tenlle pánico aos ratos, a mestra Ángeles non soporta as cascudas... E a vosoutros ¿que animal vos asusta?

CONTOS PARA COCIÑAR…

Esta é unha das propostas que puxemos en marcha na nosa escola esta semana con motivo do XV Salón do Libro Infantil e Xuvenil de Pontevedra. Trátase de elixir un conto que nos gustaría cociñar, é dicir, para a partir del crear unha receita de cociña divertida e facela cos nosos fillos. Nun caderno viaxeiro que visitará os fogares de todos os cativos, as familias deberan axudarlle a seleccionar e “cociñar un conto”, para despois ilustralo como desexen. Para que vos fagades unha idea, nas imaxes tedes as propostas das mestras para cociñar “O coelliño Branco” e “Non é fácil pequeno esquío” pero cada un pode realizalo como máis lle guste, soamente necesitades imaxinación, agarimo e sobre todo ganas de pasar un divertido rato en familia. Para os que necesiten inspiración neste enlace tedes algunhas ideas.

As mestras Janet e Marta tamén se animáron a cociñar contos con nós e estas son as súas propostas...

ENREDAMOS

Este é o nome dun blogue onde tamén poderedes atopar xogos de botar sortes para seguir enriquecendo o noso caderno viaxeiro. Cada semana van chegando novidades e xa son varias as “cantinelas” que sabemos. Soamente lle queda catro casas por visitar, ao mellor témolo rematado antes de dar as vacacións de Nadal.

EDICIÓNS EMBORA E ANTÓN CORTIZAS

Na biblioteca escolar continuamos co noso traballo ao redor do escritor Antón Cortizas. Onte, a nosa visita semanal, dedicámola a ver os contos que este autor ten publicado con Edicións Embora e a localizar onde están situados. Na escola temos tres. Como non nos daba tempo de lelos  todos, botamos a sortes por cal comezabamos empregando a cantinela que Pablo trouxo ese día no caderno viaxeiro. Tocoulle primeiro a “Vestida co arco da vella” e despois a “Sopra neste furadiño”, este último foi o que máis nos gustou, iso de poder soprar en cada páxina ten algo de máxico. “Contín,contón” queda pendente para a nosa seguinte visita á biblioteca, xa vos contaremos.

¿QUEN PANDA?

Fai un par de semanas que o caderno de xogos para botar sortes empezou a viaxar polos fogares dos cativos. Son varios os recitados para rifar que aprendemos coa axuda das familias e xa estamos familiarizados coa dinámica a seguir neste tipo de xogos. 

Nos vindeiros días o noso caderno viaxeiro continuará a súa andaina e, na escola, seguiremos traballando ao redor das cantinelas recompiladas nas casas. Nesta entrada iremos engadindo todas as que vaian chegando.

TRADICIÓN ORAL

Segundo o Calendario do Libro e da Lectura, do 4 ao 10 de novembro conmemórase a semana da tradición oral. Na escola, ao igual que outros anos, imos dedicar o mes de novembro a traballar ao redor dos ditos, recitados, cancións, xogos... que escoitabamos aos nosos avós cando eramos pequenos.

Onte xa comezamos a lembrar algúns dos nosos favoritos: “Este olliño pimpilín”, “Rabo de boi”, “Palma repalma”, “Al pasar la barca”… Pero este curso ímonos centrar especialmente nos xogos de botar sortes ou pandas: eses recitados que serven para designar quen panda ou quen libra no xogo que se vai desenvolver a continuación. 

Na escola estamos memorizando os das imaxes, pero queremos lembrar e recuperar todos os que coñezan as nosas familias. Por isto, hoxe puxemos en marcha un caderno viaxeiro que visitará os fogares de todos os cativos, para que cada un engada algún deses xogos para rifar nos que é tan rica a lingua galega. Despois en clase intentaremos aprendelas e continuar coa tradición oral dos nosos avós.