XORNADA DE EDUCACIÓN VIAL

O martes pasado, á Dirección Xeral de Tráfico, ensinounos como debemos desprazarnos con seguridade.

O máis divertido chegou coa parte práctica, cando actuamos como peóns e como condutores.

IV XORNADAS DE EDUCACIÓN VIAL

Un ano máis, todos os meniños do centro acudiron a Sisán equipados cos seus cascos e bicicletas, motos, patíns e demais vehículos, para participar nos circuítos  que con tanto agarimo monta a DXT coa axuda de Paco da Autoescola Barrantes. Por grupos foron facendo de condutores e peóns para aprender as normas de circulación e experimentar as consecuencias de non cumprilas.

Pero a mañá veu cargada de actividades. Despois do circuíto, montamos na moto da Garda Civil e no camión da Autoescola, vimos un vídeo dos Bolechas de como debemos viaxar no autobús e asistimos a unha charla de Educación Vial. Tras recuperar forzas coa merenda, estaba agardándonos unha sorpresa moi especial. Fátima Rey da compañía Tatana Teatro, nun obradoiro sorprendnete, ensinounos como facer para converternos en auténticos pallasos e despois fíxonos rir  cunha divertida actuación.

Pero aínda hai máis. Rematamos a xornada coñecendo uns paxariños extraordinarios: as pombas mensaxeiras do colombódromo Derby Rías Baixas coas que puidemos mandar unha nota co nome do noso colexio. Moitas grazas a todas estas persoas que viñeron desinteresadamente a mostrarnos o seu traballo con tanta paciencia e agarimo.

UNHA SORPRESA INESPERADA

Como xa sabedes, sempre que o tempo nolo permite, imos camiñar ao redor da escola. Hoxe, cando saímos, había un coche de tráfico na porta. Nun primeiro momento os meniños mirárono con certo receo pero, os gardas civís, moi amablemente, propuxéronos ver o seu vehículo. Non dubidamos en aceptar a súa invitación. Falaron connosco do importante que é viaxar co cinto de seguridade posto e deixáronnos subir ao interior do coche. Queremos agradecerlle aos axentes a súa xenerosidade e paciencia cos cativos.

III XORNADA DE EDUCACIÓN VIAL

Un ano máis, o pavillón de Sisán converteuse por unhas horas nun impresionante circuíto con semáforos, pasos de peóns, rotondas e sinais. Os meniños equipados con bicicletas, patinetes, motos e outros vehículos, puideron circular e aprender as normas básicas de educación vial grazas á colaboración da DXT, de Paco de Autoescola Barrantes e ao ciclista profesional Gustavo César Veloso. Rematamos a xornada cunha divertida actuación de monicreques titulada “Caperucita peatona y el lobo veloz” a cargo da mestras Montse de Lois e Olalla de educación física. Graciñas todos polo seu traballo e aos que contribuíron para que estas xornadas fosen posibles.

II XORNADA DE EDUCACIÓN VIAL

Choveu, tronou, marchou a luz … pero o mal tempo no impediu que nós desenvolveramos igual a nosa xornada de educación vial prevista para hoxe. Os meniños conduciron bicicletas, patinetes, motos e vehículos do máis diverso por un circuíto con semáforos, rotondas, pasos de peóns e sinais. Grazas ao esforzo e dedicación de Paco da autoescola Barrantes, un ano máis, aprendemos a desprazarnos de forma segura. Despois viñeron os contos, o paseo no coche da Garda Civil e no camión, a charla da DXT e ata un divertido obradoiro de cociña. Rematamos coa actuación en inglés kids&Us e os seus lúdicos contacontos. 

FORO, LINO E DESI

Este curso estamos desenvolvendo na escola o Plan Proxecta: mobilidade segura e sostible. O seu obxectivo é favorecer a educación viaria e son varias as actividades que andamos a realizar. Unha delas é a lectura de contiños que teñen este tema como eixo central. Esta semana o protagonista foi o semáforo aproveitando o material que tíñamos na clase de campañas anteriores da DXT. Se na casa tamén queredes coñecer a Foro, Lino e Desi facede clic aquí.

ENMA TAMÉN VIAXA SEGURA. ¿E TI…?

XORNADA DE EDUCACIÓN VIAL

Unha charla sobre educación vial adaptada a idade dos nosos alumnos, vídeos sobre a importancia de desprazarnos de xeito seguro, un obradoiro de cociña para elaborar un semáforo, un circuíto para aprender a conducir coas nosas bicicletas e patinetes grazas a Paco Torres da Autoescola Barrantes, visita ao interior dun coche patrulla e …  ¡ata montamos na moto dos axentes da DXT!. A pesar da choiva, o martes na escola de Sisán pasámolo xenial, tivemos de todo, dende unha merenda de sinais de tráfico ata a creación do noso propio carné de conducir con selo oficial do CRA de Ribadumia, mirade na seguinte presentación que ben o pasamos. Graciñas a todos os que co seu esforzo e colaboración fixeron posible o desenvolvemento desta actividade.

RITA E LUCÍA TAMÉN VIAXAN SEGURAS. ¿E TI...?

ADRIÁN TAMÉN VIAXA SEGURO. ¿E TI…?

CARLA VIAXA SEGURA, ¿E TI…?

Xa temos a nosa primeira participante da escola de Leiro na campaña de educación vial “Eu tamén viaxo seguro”  que estamos a desenvolver no colexio. A ver se entre todos conseguimos que ninguén poña un coche en marcha sen que os meniños estean ben atados e protexidos na súa cadeira. 

¡EU TAMÉN VIAXO SEGURO!

Dende a escola queremos salientar a importancia que ten na prevención de lesións en caso de accidente viaxar utilizando os sistemas de retención infantil. Para impulsar o seu uso e concienciar ás familias da necesidade de empregalo sempre aínda que sexan desprazamentos curtos, iniciamos a campaña ¡Eu tamén viaxo seguro!.

Trátase de concienciar aos meniños da necesidade de ir ben sentadiños na súa cadeiriña, abrocharse o cinto de seguridade antes de arrincar o coche e non quitalo ata que o motor estea apagado. A proposta é que enviedes ao noso correo escoladeleiro@gmail.com unha foto do cativo no coche sentando na súa cadeiriña co cinto posto. Con todas elas faremos unha exposición e publicarémolas no blog.