OS AMIGOS DE DALÍ

Salvador Dalí coñeceu a Luís Buñuel e a Federico García Lorca na Residencia de Estudantes de Madrid, cidade na que se instalou para estudar Belas Artes. Froito da amizade co primeiro naceu a película surrealista “Un can andaluz”  e o retrato no que nos baseamos para, imitándoo, debuxar aos nosos amigos.

A FAMILIA DE DALÍ

O pasado 15 de maio celebrouse o día internacional da familia. Nós conmemorámolo coñecendo á de Salvador Dalí a través dos retratos que realizou de cada un dos seus membros. Xa viramos a Felipa, a súa mamá; pero nos faltaba o seu pai Salvador e a súa irmá Anna María. Observando as obras do artista intentamos imitalo debuxando a nosa.

FELIPA E AS NOSAS MAMÁS

Como vos comentamos, a partir do retrato que Salvador Dalí fixo da súa nai, intentamos debuxar as nosas mamás para renderlles unha pequena homenaxe. Este é o resultado, esperamos que vos guste.

A MAMÁ DE DALÍ

Como este domingo celébrase o día da nai, esta semana coñecemos a Felipa, a mamá de Salvador Dalí. Observamos o retrato que o artista realizou dela e, intentando aprender da súa obra, debuxamos ás nosas mamás. Todas saíron guapísimas pero, como hoxe non conseguimos rematalas, será a vindeira semana cando presentemos en sociedade aos pequenos artistas de Leiro. Tamén vimos os retratos que Dalí realizou do seu pai e da súa irmá, pero esta fin de semana as protagonistas serán as mamás.

A EXPOSICIÓN DE DALÍ EN MADRID

Fai un par de semanas vimos a información no xornal e continuamos traballando ao redor dela. Aprendemos como se chamaba o museo que acollerá a exposición e quen é a "Reina Sofía", persoa á que fai referencia o seu nome e que vemos con frecuencia nos periódicos. Tamén descubrimos que o “X” en “exposición” non soa como en Anxo e que hai que ter coidado cando lemos. Marcamos no noso calendario cando comezaba a exposición, cando remata e, aínda que, como ben di Paula, non podemos ir a Madrid a vela, esperamos que os medios de comunicación falen dela e vexamos as imaxes na televisión. Aquí vos deixamos un pequeno vídeo da noticia en http://www.rtve.es

Más de 200 obras en una exposición en el Reina Sofía dedicada a Dalí

Más de 200 obras en una exposición en el Reina Sofía dedicada a Dalí

DALÍ NO XORNAL

E non soamente Dalí, senón tamén Picasso. Ámbolos dous saíron nun dos periódicos que vimos a semana pasada. O primeiro pola exposición que haberá en Madrid e ao redor da cal seguiremos traballando, e o segundo por cumprirse o 40 aniversario da súa morte. Ademais, nun dos libros que temos na biblioteca, descubrimos que cando Dalí viaxou a París foi visitar a Picasso a quen admiraba.

RECOMPILANDO INFORMACIÓN DE DALÍ

O luns, dedicamos a nosa visita semanal á biblioteca escolar a buscar os libros que temos de Salvador Dalí. Vimos onde están colocados e comprobamos que todos teñen unha pegatina rosa e o número 75 no seu lombo porque tratan de arte. Mentres, o noso recuncho da aula vai medrando coa contribución de todos: libros, debuxos, datos curiosos, láminas… ata un xadrez con pezas baseadas nos seus deseños coas que lles encanta enredar aos cativos. Nas vindeiras semanas e ata fin de curso, iremos vendo, lendo e organizando todos os materiais aportados para ir sacando información e adaptándoa aos intereses dos nenos. Unha vez máis grazas a todas as familias pola súa colaboración.

COÑECENDO A DALÍ

Dende que vimos o sofá labios de Dalí na revista que acompaña ao xornal dominical,  decidimos coñecer a este artista. Aínda que case todos nos lembrabamos do seu apelido e o seu característico bigote, non  tíñamos tan claro o seu nome. Hoxe vimos como se escribía e realizamos retratos del. Fai unhas semanas Laura tróuxonos un coxín labio que lle prestara a súa tía, con el e con todo o que vaiamos atopando relacionado con Salvador Dalí, imos crear un novo recuncho en clase. Coma sempre, os rapaces poden traer todo tipo de materiais: cadros, libros, imaxes, postais, xoguetes, DVDs, obxectos, láminas, murais, direccións de internet, CDs, debuxos... para enriquecer a nosa pequena exposición e aprender todos xuntos. Por agora o que máis nos gusta deste particular xenio é o seu mostacho.

DESCUBRINDO A DALÍ

Hoxe comeza a semana da prensa na escola. Nestes días os xornais cobran unha especial relevancia nos centros educativos. Esta mañá, na biblioteca, optamos por ver a revista que adoita acompañar ao periódico dominical, en concreto a do día 10 de febreiro de La Voz de Galicia. Nela atopamos unha ilustración moi especial: ¡Un sofá bico!. Descubrimos que realmente chámase sofá labios e foi deseñado por Salvador Dalí con Óscar Tusquets. Buscamos algúns dos libros que temos deste artista e atopamos outra obra que tamén chamou poderosamente a nosa atención: un teléfono bogavante. Nas vindeiras semanas seguiremos coñecendo a vida e obra deste famoso pintor.