sábado, 28 de febrero de 2015

REPOLOS E ROSAS…


Baseándonos no poema de Rosalía de Castro e imitando as ilustración do libriño “Parece unha rosa”, onte na aula convertémonos en rosas e repolos … E aínda que houbo quen se enfurruñou porque prefería transformarse en brócoli como os que plantaron coa mestra Ana, case todos os cativos memorizaron estes anaquiños do poema e divertíronse personificándoo coas súas fotos.
Para os que aínda non o coñezan ou queiran volver a velo, a continuación deixámoslle un LIM deste bonito libro-poema. 
-

jueves, 26 de febrero de 2015

A NOSA FESTA



Esta semana o traballo ao redor da prensa centrouse na noticia na que viña reflectida a festa do Entroido da nosa escola. Nesta ocasión, sobre todo cos maiores, puxemos especial atención na data de publicación. En formato dixital non saíu a noticia pero neste enlace aparecen algunhas fotos bonitas dos nosos alumnos.

miércoles, 25 de febrero de 2015

SUMANDO CO DADO…



Xa sabedes que dende o trimestre pasado os mércores “temos problemas cos maiores da aula … Nas últimas semanas realizámolos xogando con dados. Trátase de, por quendas, lanzar dous á vez e quen saque a cifra máis alta gaña. Pero para iso temos que ir previamente localizando os xogadores nun listado, anotar o resultado simbolizando a suma dos puntos e, por último, escribir o nome do gañador ou gañadores en caso de empate. Parece complicado pero os maiores xa o teñen interiorizado e visualizar os puntiños do dado axúdalles a contar. Probade na casa a botar partidas de sumas co dado, xa nos contaredes que tal resulta.



martes, 24 de febrero de 2015

¡FELIZ DÍA DE ROSALÍA!


Segundo o Calendario do Libro e da Lectura, hoxe celébrase o día de Rosalía de Castro para conmemorar o aniversario do seu nacemento. Estes días imos traballar ao redor da súa figura e obra. Onte, na nosa visita semanal á biblioteca escolar, comezamos a quentar motores realizando actividades cos libros que temos desta importante escritora galega. Montamos un recuncho con todos eles, limos algúns dos que máis nos gustan, relizamos tarefas de asociar as portadas cos títulos e escoitamos as versións musicadas dos seus poemas no libro disco “Rosalía pequeniña” que nos encanta.


Para os que desexen gozar connosco escoitando os poemas rosalianos na voz de Uxía, aquí lle deixamos o seguinte vídeo.

lunes, 23 de febrero de 2015

COMEZA O XVI SALÓN DO LIBRO

Baixo o título “Da ciencia á ficción”, do 27 de febreiro ao 28 de marzo, terá lugar no Pazo da Cultura de Pontevedra o XVI Salón do Libro Infantil e Xuvenil. Os libros son os protagonistas nesta cita anual pero tamén as exposicións, os obradoiros, os contacontos, as actuacións musicais e teatrais, os encontros con autores e homenaxes … Un mes cheo de eventos, moitos deles gratuítos e adaptados ás idades dos nosos alumnos. Se queredes consultar o programa de actividades podedes facer clic aquí e para descargalo neste enlace.

domingo, 22 de febrero de 2015

ROSQUILLAS

Esta semana, no noso obradoiro de cociña, despedímonos do Entroido 2015 elaborando unhas riquísimas rosquillas. Pero coma sempre, o que máis lle gustou aos cativos foi enredar coa fariña … Menos mal que o mestre Jose axudounos a limpar todo.

viernes, 20 de febrero de 2015

CATÁLOGO DE DISFRACES 2015

Hoxe, coa axuda da mestra Ana, rematamos de escoller a nosa indumentaria para o noso catalogo de disfraces 2015. Se nestes últimos días de Entroido aínda non sabedes que poñervos, aquí van as suxestións dos nosos pequenos modelos de Leiro …

jueves, 19 de febrero de 2015

A NOSA HEMEROTECA


Coa axuda das familias os xornais volveron a formar parte da rutina da nosa aula. Sempre que os temos gústanos ollalos, comentar as novas, intentar adiviñar o número da páxina no que sae a noticia, vendo os anuncios de viaxes imaxinámonos navegando rumbo a outros países …
Cando rematamos de velos, deixámolos na biblioteca de clase por se alguén desexa volver a miralos tranquilamente noutro momento. Como agora temos moitos, decidimos organizalos nun andel e poñerlle unha etiqueta co nome de hemeroteca. Ao principio custábanos pronunciar a palabra, agora xa nos sae a case todos e sabemos que para consultar os xornais temos que acudir a nosa particular hemeroteca.


viernes, 13 de febrero de 2015

ENTROIDO 2015

A choiva e a humidade non quixeron perderse a nosa festa de Carnaval e acompañáronnos durante toda a xornada. Pero nós divertímonos igual contando contos, facendo máscaras, xogando e bailando. Australia foi o tema central do Entroido deste ano, e canguros, koalas, emús, cacatúas e aborixes desfilamos polo Local Social de Lois. Cando chegou o momento da merenda, orellas, filloas, rosquillas, biscoitos e outros doces ricos que as familias prepararan con moito agarimo, fixeron as delicias de grandes e pequenos. Unha vez máis graciñas a todas pola súa colaboración.

jueves, 12 de febrero de 2015

¡CANTOS DOMINÓS!


De froitas, de ideas, de números, de formas xeométricas …  estamos descubrindo que na aula temos dominós de moitas clases. 
Onte, na nosa sesión semanal dedicada aos xogos de mesa, empregamos un que nos axudou a lembrar os nomes dalgunhas figuras xeométricas: círculo, cadrado, triángulo, rombo … O próximo día a ver se probamos co de texturas, é para botar partidas cos ollos pechados … ¡a ver se somos capaces de identificar as pezas mediante o tacto!.

miércoles, 11 de febrero de 2015

TEMPO DE ENTROIDO…


Nestes días o tema central das conversas dos cativos é o Carnaval. Os folletos con  disfraces de todo tipo inundan tendas e comercios. Como outros anos, na escola aproveitamos esta publicidade para crear o noso particular catálogo de Entroido. Por agora os nenos andan a escoller e recortar cadanseu traxe favorito, cunha única condición, non se pode repetir. Pouco a pouco imos facendo a montaxe coas nosas fotos, esperamos telo rematado pronto.
E os que desexen mergullarse no Entroido da man dos Bolechas, poden facer clic neste enlace.

martes, 10 de febrero de 2015

A VOLTAS COAS EMOCIÓNS…


Estamos descubrindo que hai varias palabras para expresar un mesmo sentimento. Así a rabia pódese chamar tamén ira e cólera. A calma, tranquilidade. A alegría, ledicia... Deste xeito o noso mural de sentimentos vaise enchendo con novos botes de emocións á vez que enriquecemos o noso vocabulario.

Pero o que temos máis ganas de facer é unha ruleta para marcar estados de ánimo coma a do libro ¡Sentimentos! que limos esta mañá. Trátase dun “sentimentómetro” no que sinalabamos se hoxe experimentabamos: valentía, medo, enfado, vergoña, tristeza, cariño, alegría ou rabia. Cando rematemos co Entroido a ver se facemos a nosa propia versión do “sentimentómetro”.
E non vos esquezades, mañá é o día do bigote: grande, pequeno, delgado, con barba, postizo, pintado, negro, marrón, de colores …

lunes, 9 de febrero de 2015

ALGO NA CABEZA…

Achegase a festa do Entroido e na escola xa imos quentando motores seguindo as ordes do Meco. Mirade que divertidos estamos todos con “algo na cabeza”. Lembrade que mañá é o día de traer unha flor: no pelo, na roupa, no calzado … Pintada, de papel, natural … Como queiramos, o importante é pasalo ben e rir xuntos.

viernes, 6 de febrero de 2015

ORELLAS

Chega o Entroido e con el un dos nosos doces favoritos: as orellas. Hoxe, no noso obradoiro de cociña, levamos moito traballiño para facelas e cando rematamos estabamos todos cubertos de fariña, pero o pasamos tan ben facendo a masa e estirándoa que mereceu a pena o esforzo. Este ano ademais foi dobremente especial porque fomos coa mestra Ana ata o limoeiro da nosa horta para apañar os limóns necesarios para facer a masa … ¡que ben cheiraban!

jueves, 5 de febrero de 2015

O CROCODILO MARIÑO


A semana pasada, nunha revista que nos trouxo Adrián, vimos un artigo sobre o réptil máis grande da terra: o crocodilo mariño. A fotografía a dobre páxina que aparece na publicación é impresionante. Limos que vive en Australia e que é moi agresivo. Incluso viñan fotos de sinais que advirten do perigo pola súa presenza e prohiben o baño.

Hoxe retomamos a lectura da reportaxe e descubrimos que, a pesar de ter unha magnifica dentadura, este animal traga as súas presas sen mastigar … ¡coma as anacondas!. Despois vimos un anaquiño do documental “El rey cocodrilo” no que observamos como a mamá crocodilo pon ovos e deféndeos ata que nacen as crías. Para rematar, nun atlas do recuncho de Australia buscamos os debuxos dos crocodilos mariños ao norte da illa e intentamos adiviñar cantos dentes dicía a revista que ten o crocodilo.

miércoles, 4 de febrero de 2015

OS NÚMEROS E A ROUPA

O pasado 14 de xaneiro celebramos o día dos números nas prendas de vestir. Foi divertido buscar as grafías nas diferentes pezas de roupa, comprobar se tiñan unha cifra ou máis. Intentamos lelas e sacamos fotos. Estamos facendo un libriño con todas e un mural e continuamos traballando ao seu redor. Pero sobre todo está axudando aos cativos a memorizar o nome das grafías e a aumentar o vocabulario relacionado coa vestimenta. Unha vez máis graciñas a todas as familias por colaborar coa escola.




martes, 3 de febrero de 2015

VIPO EN AUSTRALIA

Hoxe, como a choiva deixounos outra vez sen poder saír ao parque, aproveitamos o tempo de recreo para ver un vídeo de Vipo, un can de orellas grandes que viaxa polo mundo. Como lles gustou tanto aos cativos aquí volo deixamos por se queren velo de novo na casa.

lunes, 2 de febrero de 2015

PREPARANDO O ENTROIDO…

O día 13 celebraremos a nosa tradicional festa de Carnaval. Este ano terá como tema central Australia. Na nosa aula imos ir disfrazados de Koalas e nas vindeiras semana iremos investigando e aprendendo cousiñas deste simpático marsupial. Estamos confeccionando entre todos o noso disfrace pero necesitamos que cada neno traia unha diadema para facer as orellas. Sérvenos calquera que teñades na casa con tal de que sexa ríxida, se é de cor escura mellor. Graciñas.

domingo, 1 de febrero de 2015

O EQUIDNA AUSTRALIANO


Esta semana aproveitamos o noso obradoiro de cociña para coñecer un mamífero australiano moi peculiar: o equidna. A femia pon un ovo e colócao nunha fenda especial do seu ventre onde queda cuberto dunha sustancia pegañenta.  Tras a eclosión, a cría permanecerá no marsupio lambendo o leite que mana dos poros da pel da bolsa. Tras observar tan curioso animal en varios libros e ver este vídeo, fixemos a nosa versión culinaria con pauciños e pebidas de chocolate, cacahuetes e unha madalena.