FESTIVAL DE FIN DE CURSO 2019

Para os que non puideron asistir á actuación, picade na imaxe inferior e accederedes á montaxe que fixo a mestra Olalla de educación física con todas as actuacións.

O CIRCO DE VERÁN CHEGA A SISÁN

Nas últimas semanas organizamos un concurso de debuxo para deseñar o que sería o cartel anunciador do festival de fin de curso. Como xa todos sabedes, este ano entre todas as escolas realizaremos unha función de circo con pallasos, magos, forzudos, mimos … e  ata unha muller bala. Cada meniño realizou o seu deseño e propuxo un nome para este espectáculo único que faremos mañá. Na imaxe tedes o resultado cunha montaxe de debuxos de todas as escolas e o nome máis votado. No pavillón estarán expostas todas as propostas dos nenos, buscade a do voso fillo.
Tamén xa está rematado o noso rececuario cos códigos QR que dan acceso as diferentes receitas colgadas neste blog. Mañá na festa estarán  os de todas as escolas. Se levados no voso móbil un lector  instalado poderedes acceder ás de todas as aulas.

PREPARANDO O FESTIVAL DE FIN DE CURSO

Un ano máis, coa axuda da mestra Olalla de música, andamos a preparar a nosa actuación para el festival de fin de curso. Como xa vos imaxinaredes, o tema central será o circo. Faremos de pallasos e aproveitaremos os disfraces do Entroido. Para ir ensaiando tamén na casa, a continuación vos deixamos a nosa canción.

¡FELIZ DÍA DO LIBRO!

Para conmemorar o Día do Libro, hoxe os meniños levaron para casa a guía de lecturas do circo que editamos dende a biblioteca escolar e ao redor da que estivemos traballando este mes.

NA HORA DE LER: O CIRCO

Como non podía ser doutro xeito, o circo tamén chegou a nosa biblioteca escolar. Dende principio de curso hai montando un recuncho con todos os exemplares que tíñamos desta materia e moitas novidades que fomos adquirindo para actualizar os fondos. Ata que os vexamos todos, na hora de ler, cada día o encargado escollerá cal prefire e pouquiño a pouco iremos léndoos.

FUNÁMBULA

A semana pasada o conto de Funambulus, levounos a coñecer o seguinte personaxe do circo pintado por Botero e ao que lle dedicamos o mes de outubro. Tamén grazas a este libro coñecemos un novo deporte o slakline que, a diferenza do funambulismo, emprega unha corda de nailon ou poliéster con moita suspensión e balanceo.

PALLASO

Despois de tanto tempo a voltas co tema do circo, non podíamos deixar pasar a oportunidade de levar un dos seus principais personaxes ao noso obradoiro de cociña.

FERNANDO BOTERO

Nos últimos anos, cando chegan estas datas, realizamos un calendario temático escolar do vindeiro ano académico que dedicamos a diferentes artistas. Este curso, como andamos a voltas co circo, imos copiar a proposta da mestra Marta de Ribadumia e traballar ao redor de Fernando Botero, un pintor que ten unha extensa colección de obras con esta temática.

BUSCANDO SORRISOS…

O vindeiro día 30 celebrase o Día Escolar pola Paz e a Non Violencia. Este ano quixemos conmemoralo levado a cabo a proposta da mestra Olalla de educación física de “buscar sorrisos” para a paz. Clicade na imaxe seguinte e  veredes o precioso vídeo que elaborou cos sorrisos de toda a escola.

POMPAS DE XABÓN

Antes de Nadal, o anuncio no xornal  da actuación de “Os Falulosos Cleaners” en Vilagarcia, serviunos de escusa para, ademais de traballar co periódico, experimentar coas pompas de xabón e os obxectos da aula.

O HOME BALA NO XORNAL

Nas últimas semanas, graciñas á mamá de Rosana e a mestra Marta de Ribadumia que nos traen xornais, podemos ver a prensa na aula. Estes días foron moitas as noticias que chamaron a nosa atención: os incendios, a Festa do Marisco, as riadas … pero o que sen lugar a dubidas máis gustou aos meniños foi a entrevista ao home bala que limos en La Voz de Galicia.

O HOME BALA

Dende que viramos ao Home Bala na publicidade do Circo de Portugal, unha mestura de medo e curiosidade invadiu aos meniños. A partir dese momento comezamos a realizar diversas actividades para coñecer o traballo deste personaxe circense.

O AUTO NOVO

O xoves pasado inauguramos a sesión semanal que imos dedicar aos xogos coñecendo unha das cancións máis populares dos “Pallasos da Tele”. Estes artistas circenses que coñeceremos en profundidade mais adiante, fixeron cantar e rir a miles de nenos con “El auto nuevo”.  Na nosa aula pasámolo xenial aprendéndoa e despois cantándoa na nosa andaina diaria.

A NOSA EXCURSIÓN AO CIRCO

Este curso o circo será o tema central  do noso proxecto anual de centro. E como O Circo de Portugal está de xira pola nosa comarca, aproveitamos a oportunidade para asistir está mañá a unha das actuacións que realizará en Vilagarcía de Arousa. Cunha mestura de emocións, os meniños gozaron coas diversas actuacións e seguro que hoxe terán moito que contar as súas familias.

O CIRCO ESTÁ EN MOSTEIRO

Como podedes ver na imaxe do cartel anunciador, un circo instalouse no centro de Mosterio para realizar varias funcións esta fin de semana. Unha oportunidade para ver preto da casa un espectáculo que case sempre esperta o interese dos pequenos.

¡ATA SEMPRE MILIKI!

Este era o tema central do noso festival de Nadal deste ano. Queríamos renderlle unha pequena homenaxe a este gran pallaso. Durante semanas estivemos preparando a nosa actuación, pero tamén coñecendo moitas das súas cancións. Hoxe, xunto aos compañeiros doutras escolas, gozamos dun autentico repertorio das máis coñecidas. Pero antes das representacións, tivemos unha mañá chea de actividades. Primeiro fixemos unhas tarxetas de felicitacións na aula, despois na biblioteca limos o conto “La primera navidad de los animales” que nos encanta, vimos a película “La navidad de Caillou”, xogamos á roda e a “Guante, guante”, e para rematar, decoramos unha careta de pallaso. Case sen darnos conta chegou a hora de merendar … biscoitos, turróns, rosquillas … ¡que ben cociñan as familias de todas as escolas!... Coa barriguiña chea volvemos á aula para disfrazarnos. Fomos os primeiros en actuar como auténticos profesionais, despois o resto das escolas nos fixeron cantar, rir e gozar cunhas simpáticas representacións. Para rematar, a visita do Apalpador, que a cambio das nosas cartas, deunos unha ricas bólas de chocolate. E non podíamos despedirnos do ano sen cantar todos xuntos a panxoliña que prepararamos co mestre Felipe.

¡Bo Nadal e felices vacacións!

PREPARANDO A FESTA DO NADAL

Seleccionar unha canción, inventar unha coreografía, buscar un papel para todos e cada un que se adapte aos nosos gustos e posibilidades, ensaiar, axudar aos máis pequenos a que non perdan o ritmo, preparar os disfraces, cortar, probar … ¡canto traballiño extra!... pero ¡que ben o pasamos!. Para a nosa pequena homenaxe a Miliki estamos preparando "La gallina Turuleca". A maioría das veces as cousas non nos saen como nos gustaría pero o imporante é que todos participamos, colaboramos e aprendemos o valor do traballo en equipo.

LEMBRANDO A MILIKI…

“La gallina turuleca”, “Cómo me pica la nariz”, “Hola, don Pepito”, “Mi barba tiene tres pelos”, “El auto de papá”… Estas e outras cancións marcaron a infancia de moitos de nós. O pasado mes de novembro Miliki faleceu. Dende a nosa escola queremos renderlle unha pequena homenaxe a este gran pallaso e artista. Consideramos que o mellor xeito de facelo é conseguir que os nosos alumnos tamén coñezan e gocen coa súa música. A nosa festa de Nadal estará dedicada a el. ¡Benvidos ao circo da tele!.