LISTOS PARA DESPEGAR?

A LÚA DA FLORES EN IMAXES

Xa temos algúns dos resultados da nosa proposta ao redor da lúa das flores. Gael mándanos unhas fotos preciosas, Lía ademais adxunta unha ficha moi interesante e Marcos a actividade do xornal feita igual que Marta, esta última engade un bonito debuxo da Lúa. Se queredes desenvolver a vosa creatividades coa Lúa como temática, aínda estades a tempo de mandarnos as vosas producións e publicarémolas.

A LÚA DAS FLORES

Hoxe toca traballar a prensa dixital para retomar o noso proxecto ao redor da Lúa. Anímovos a ver e comentar cos meniños este artigo aparecido no diario dixital La Vanguardia sobre a Lúa das flores que se poderá contemplar esta noite. Despois, se vos apetece, podedes cubrir esta ficha, acompañar a Paxi a explorar o noso satélite e aprender a debuxalo. Pero, sobre todo, observar o ceo esta noite para ver a Lúa das flores e intentar fotografala. Non esquezades mandar os vosos debuxos e fotos e os publicaremos.

GUÍA DE LECTURAS DO UNIVERSO

Remata abril, o mes dos libros, e a Zapatocas pareceulle unha boa idea despedirse del editando unha guía con algúns deses libriños do Universo cos que traballamos durante o curso. Esperamos que pronto poidamos volver a abrir a biblioteca escolar e levalos para casa.

JOAN MIRÓ

Este trimestre e o seguinte imos dedicalo a coñecer ao pintor das estrelas: Joan Miró. Comezamos esta mañá na biblioteca escolar ollando e comentando os libros que temos del. Paseniño iremos traballando con cada un deles e aprendendo aspectos da vida e obra do artista. Benvidos ao mundo imaxinario deste gran creador.

LIM DO SISTEMA SOLAR

Para xogar e aprender algunas cousiñas sobre o sistem solar, clicamos na imaxe inferior.

MAKITA A EXTRATERRESTRE ECOLÓXICA

Grazas á mestra Montse e Jose, o xoves pasado despois da visita dos PANS e a hixienista Maruxa, puidemos rematar a xornada cun divertido contacontos. Viñeron cargados de música pero sobre todo de mensaxes sobre a importancia de coidar o noso planeta. Reciclar, reutilizar e reducir, son as palabras claves que nos transmitiron co “Capitán Verdemán superhéroe del reciclaxe” e a súa canción “O meu planeta”.

PREPARADOS… LISTOS… XA!

A festa do Entroido vaise achegando e nas casa comezan a bulir as ideas para crear os disfraces do sistema solar con moita imaxinación. Mirade Marcos, na foto que nos mandou, como traballa na confección do seu e o chuliño que lle está a quedar. Grazas por compartir connosco a vosa creatividade.

ENTROIDO 2020

Como xa sabedes, o vindeiro venres día 21 de febreiro celebraremos a festa de Entroido. Cada aula irá disfrazada dun personaxe relacionado co universo. As nenas e nenos de Leiro imos ir disfrazados do SISTEMA SOLAR no sentido máis amplo da palabra: planetas, sol, lúa, estrelas... Seguindo un ano máis na liña de empregar menos plásticos e a regra dos 3R (Reciclar, Reutilizar e Reducir), cada familia encargarase do disfrace do seu fillo ou filla. Para que vos sexa máis doado, nesta nota atoparedes suxestións: empregando roupa que xa temos na casa, reutilizando algún disfrace doutros anos (perrucas, diademas, capas, medias …), reciclando materiais (teas, lazos, cartóns, xornais, caixas de ovos, envases de iogur…) levando algo que nos poidan prestar … Trátase de mercar o mínimo posible e poñer a imaxinación a funcionar ao máximo. Calquera cousa pode servir, o importante é pasar un rato agradable creando cos meniños. Canta máis variedade haxa máis vistoso quedará o desfile! Nos seguintes enlaces podedes atopar ideas con fotos e vídeos que vos poden axudar

https://www.youtube.com/watch?v=b36mB7IigEM

http://blog.midibu4u.es/carnaval-espacial/

http://colorandlove.com/haciendo-un-disfraz-del-sistema-solar/?lang=es

http://unmundodesonrisaslpgc.blogspot.com/2018/12/manualidadgorro-del-sistema-solar.html?m=1

https://i.pinimg.com/originals/31/c7/fb/31c7fb9ef14a8f2b7247c5b78d175e18.jpg

E por suposto estades convidados a participar en familia: pais, nais, avós, avoas … Animádevos a vir tamén disfrazados de algo relacionado co Universo o día da festa de Entroido. Se necesitades axuda ou calquera aclaración, non dubidedes en preguntar. Moitas grazas pola vosa colaboración.

LÚA

Dende que viramos e cantaramos o contiño de Lúa a principio de curso, decidimos que era ideal para reescribilo e practicar as grafías das letras en minúscula. No transcurso do trimestre os meniños foron realizándoo e hoxe por fin levárono para casa. Agora xa todos os maiores teñen a súa propia versión personificada.

TOCANDO A LÚA...

Chegounos outra bonita foto da lúa. Cun pouquiño de imaxinación, descubrimos que podemos chegar a tocala …

MERCURIO

MERCURIO DIANTE DO SOL

Esta semana, a noticia que vimos no Faro de Vigo sobre o transito de Mercurio por diante do sol, serviunos de detonante para falar sobre este pequeno planeta. Da biblioteca collemos libros de astronomía, buscamos a Mercurio e gozamos viaxando ao espazo polas súas páxinas. No xornal traballamos ao redor da nova e a páxina na que aparece publicada. E en informática vimos o vídeo coa selección das mellores imaxes difundidas pola NASA e que vos deixamos a continuación.

QUE VÉN O LOBO!

Co gallo da pasada festa do Samaín, e a partir da lectura do conto “O home lobo”, mergullámonos de cheo nos contos que teñen a estes seres coma protagonista e aos medos relacionados con eles e a lúa. Dende a biblioteca escolar fixemos unha recompilación con todos e elaboramos a seguinte guía de lecturas. Cando rematemos de traballar con ela en formato papel levarémola para casa.

COA LÚA NAS MANS

Mirade que foto bonita fíxonos chegar Laura da pasada lúa chea.

O UNIVERSO DE ROSALÍA

En novembro celébrase o mes da ciencias en galego. Este curso quixemos unirnos a esta conmemoración tendo o universo como eixo central. Comezamos facendo un pequeno experimento coa luz para presentar aos meniños o mural do Universo de Rosalía que imos realizar na biblioteca. 

Cun tubo de papel hixiénico, unhas folliñas de papel reciclado que decoramos e unha lanterna, alumeamos o cartel de Rosalía proxectando unha estrela. Probamos a aumentar ou diminuír o tamaño da estrela acercándonos ou aloxándonos da parede. E o máis divertido, o xogo a escuras para pillar a estrela que se movía polo chan … Gustoulles tanto a todos, que cada meniño está a facer a súa para xogar na casa a experimentar coa luz.

Nas vindeiras semanas queremos encher este mural con poemas de Rosalía de Castro relacionados coa lúa, o sol, as estrelas … animádevos a participar mandándonos os vosos favoritos ao noso correo electrónico escoladeleiro@gmail.com  e crearemos o Universo de Rosalía.

E lembrade que mañá que é  o último día para votar en http://nombraexoplanetas.es/ e conseguir que a nosa poeta teña a súa estrela no universo.

A QUE SABE A LÚA?

Esta semana volveremos a ter lúa chea e nós aproveitamos a ocasión para cociñala e animar aos pequenos a probar a cenoria. Comer o nariz ou a boca da lúa feita con esta nutritiva verdura, sempre é unha motivación para degustala.

UNHA ESTRELA PARA ROSALÍA

Esta semana, o Diario de Pontevedra serviunos para coñecer unha preciosa iniciativa que están a levar a cabo a Agrupación Astronómica Coruñesa Ío e a Fundación Rosalía de Castro. Queren poñerlle o nome da escritora galega á estrela HD 14913.  A Unión Astronómica Internacional,  para celebrar o seu centenario, organizou a campaña global NameExoWorld que permite a calquera país do mundo dar un nome popular a unha estrela e ao seu exoplaneta asociado. A estrela designada a cada nación é visible desde ese país, e o suficientemente brillante como para ser observada a través de pequenos telescopios. 

A nosa escola únese a tan fermosa proposta e anima a todas as familias a participar votando ata o 12 de novembro na páxina http://nombraexoplanetas.es/. Os resultados finais serán dados a coñecer nun anuncio oficial da Unión Astronómica Internacional a partir de mediados de decembro, conxuntamente cos outros nomes das estrelas e planetas asignadas a cada país.

A LÚA E OS LOBOS

No contiño Quen levou a lúa?  ao redor do que traballamos a semana pasada na biblioteca, limos que os lobos ouvean á lúa chea. Non sabemos se será verdade pero imos investigar e intentar aprender cousiñas deste impresionante animal.

Paralelamente estamos traballando a educación documental para comprender como está organizada a nosa biblioteca escolar. Cada semana facemos actividades cos libros que lemos para saber onde están colocados e como temos que facer para acceder á información que buscamos.

Para que dende a casa tamén coñezades cómo está organizada, a continuación vos deixamos a nosa guía de usuarios que hoxe levaron os alumnos novos e os veteranos o curso pasado.

O SISTEMA SOLAR

Onte aproveitamos a nosa sesión semanal no aula de informática para traballar ao redor do sistema solar. Para os que desexen aprender xogando tamén dende casa, a continuación deixamos o vídeo que vimos e os xogos LIM que realizamos. 

Picade enriba da imaxe e accederedes ás actividades.