CALENDARIO ESCOLAR DE GOYA

Cada ano, entre o segundo e o terceiro trimestre, confeccionamos un calendario escolar do vindeiro curso que sirve de lembranza aos que marchan da nosa escola e de guía de lectura aos que quedan.

Nesta ocasión estámolo dedicando ao pintor español Francisco de Goya. Para súa elaboración, eliximos un cadro para cada mes e un libro onde aparece recollida a obra. Comezamos co setembro e, sen lugar a dúbidas, a pintura máis representativa para esta época é “A vendima ou o outono”. A creación na escola deste particular calendario temático, ademais de familiarizar aos nenos co mundo do arte, axúdaos a traballar a serie numérica ata o trinta, os meses do ano e a diferenciar os días laborables dos festivos.

E xa que andamos a falar de outono, aproveitamos para deixarvos “Canción de otoño”, o bonito poema musicado de Juan Ramón Jiménez co que nos despedimos desta estación cando traballamos Andalucía. Esperamos que vos guste tanto coma a nós.

OS MÉRCORES, XOGOS DE CARTAS

O poema de Federico García Lorca “Los reyes de la baraja” que aprendemos o trimestre pasado, ademais de servimos para xogar ao pilla, empregámolo como detonante para comezar a traballar as matemáticas a partir das cartas.

O primeiro, recoñecer os protagonistas do poema: os reis da baralla e os seus paus. E con este obxectivo xogamos a ver quen sacaba cada unha das figuras á vez que repasabamos a escritura dos nomes propios. Este trimestre os mércores xogaremos ás cartas, xa vos contaremos.

CORRE QUE TE PILLO

Hoxe de novo baseámonos nos poemas de Federico García Lorca para brincar. Neta ocasión a segunda estrofa de “Los reyes de la baraja” serviunos para xogar ao pilla e rir pintando a cara dos atrapados. Para os que non se lembren dos seus versos, a continuación deixamos a versión musicada de Vicente Monera que tanto nos gusta.

E xa postos a enredar, fixemos un repaso de todos os xogos que aprendemos durante o trimestre, mirade nas fotos que ben o pasamos.

NA HORA DE LER… ¡NOVEDADES DE ANDALUCÍA!

Esta semana foron varias as novidades literarias que viñeron a enriquecer os fondos da nosa biblioteca relacionados con Andalucía. “¿Dónde cantan los pájaros que cantan?” de Juan Ramón Jiménez, “Cómo se llaman las niñas flamencas”, “Quiero bailar flamenco”,  “Mi primer libro de Lorca”, “Juan Ramón Jiménez para niños y niñas… y otros seres curiosos” e da mesma colección o de Federico García Lorca. Como non podía ser doutro xeito, rapidamente comezamos a dedicar a nosa hora de ler a estas pequenas xoias. Con cada un deles van xurdindo diferentes actividades que xa vos iremos contando.

QUE YO TE QUIERO VERDE

Nunha entrada anterior xa vos contaramos que nos divertiramos memorizando o poema de Lorca “Romance Sonámbulo” co ritmo flamenco que lle imprime Ketama. O luns descubrimos un vídeo no que esa mesma canción é empregada para realizar unha coreografía con motivo do día internacional do flamenco. Non puidemos resistir a tentación e, coa axuda da mestra Olalla, simbolizamos o ritmo das palmas, simplificamos o baile e puxémonos a practicar esta rumba flamenca. Se na casa tamén queredes aprender aquí vos deixamos o enlace do vídeo no que nos baseamos.

VERDE QUE TE QUIERO VERDE

Aínda que realmente chámase “Romance sonámbulo”, a este coñecido poema de Federico García Lorca gústanos chamalo “Verde que te quiero verde”. A semana pasada estivemos traballando ao redor del e divertíndonos cantándoo co ritmo flamenco que lle da Ketama na versión que ten con Manzanita. Para ilustralo axudámonos dos libros “Como dibujar animales” e “Vamos a dibujar… un barco”. Con eles descubrimos como realizar un cabalo e un barco dun xeito facilísimo e moi xeitoso.

LA TARARA

Como xa vos comentaramos nunha entrada anterior, na escola estamos a traballar ao redor dalgúns escritores andaluces. Esta semana centrámonos no poema “La Tarara” que Federico García Lorca compuxo a partir dunhas coplas populares. Estes versos, nalgunhas zonas de España, son empregados como xogo de roda que nós aproveitamos para aprender.

Hai moitas versións musicadas de “La Tarara”, a continuación vos deixamos a de Antonio Vega que é a que máis nos gusta.

NA HORA DE LER… ¡ANDALUCÍA!

Poemas ou biografías adaptadas para nenos de grandes escritores como Antonio Machado, Federico García Lorca o Juan Ramón Jiménez; contos de tradicións populares como “La Romería del Rocío”, “La Feria de Abril” ou “La Semana Santa”; libros de consulta de produtos propios da zona como “O aceite” ou simplemente contos divertidos e cargados de despregables como ¿De quén están hechas las niñas flamencas?... Entre todas estas opcións cada día o encargado elixe lectura. Xa limos varios deles pero ata final de mes na hora de ler …¡Andalucía!.

AS OLIVEIRAS DA IGREXA

Como andamos a voltas co aceite de oliva e a árbore que o produce, o martes fomos ver os exemplares que hai no xardín da igrexa de San Xoán de Leiro. 

Pretendiamos marchar pronto e merendar alá pero a brétema fíxonos cambiar de planes, a media mañá aínda estaba todo demasiado mollado.

Esperamos ata última hora e, cando empezou a levantar a néboa e querer raiar o sol, puxémonos en marcha. Descubrimos que había catro oliveiras cargadas de olivas, moitas xa esmagadas no chan. Unha delas, a máis velliña é preciosa, mirade nas fotos que tronco más bonito ten. As outras son máis noviñas pero tamén teñen o seu encanto.

ALMORZO ANDALUZ

Sempre que podemos gústanos levar ao noso obradoiro de cociña os proxectos que estamos a desenvolver na escola. Como todos sabedes, andamos a coñecer a Comunidade Autónoma de Andalucía e, un dos seus produtos máis característicos, é o aceite de oliva. Se lle engadimos un zume de laranxas da Veiga do Guadalquivir, temos o nutritivo e rico almorzo con sabor andaluz que elaboramos o venres.

Lembrades que mañá imos visitar as oliveiras do xardín da igrexa de San Xoán de Leiro, poderemos observar o porte dos seus troncos e os seus numerosos froitos. Se o bo tempo continua será divertido merendar alá polo que non vos esquezades de traer a autorización cuberta.  

OLIVEIRAS

Varias pólas de oliveira cheas de olivas verdes e moradas foi outro dos tesouros cos que se veu enriquecido o noso recuncho de Andalucía graciñas a  Pablo e Adrián.

Esta árbore tan lonxeva é moi abundante nesta Comunidade Autónoma e na escola empregámola como detonante para coñecer o aceite de oliva, produto que se extrae do seu froito. Primeiro observamos a forma, tamaño e cor das follas e das olivas. Despois estivemos apañando nelas e esmagándoas para analizar o seu interior.

Para finalizar, vos deixamos o vídeo co proceso de produción do aceite de oliva que vimos na aula.

LA FERIA DE ABRIL

A semana pasada limos o conto “La Feria de Abril”. A través dos seus protagonistas vimos como os nenos prepáranse para gozar desta festa, descubrimos que actividades realizan, que comen e sobre todo como se divirten.

Na nosa escola tamén quixemos participar desta tradición e non dubidamos en empregar a nosa imaxinación para vestirnos co traxe típico, montarnos nun coche de cabalos e poñernos a bailar sevillanas nunha das súas casetas.

 Baseándonos no traxe que nos trouxo Adrián, no conto e nos vídeos de sevillanas que vimos no encerado dixital, cada cativo pintou os traxes ao seu gusto.

ESCRITORES ANDALUCES

Juan Ramón Jiménez, Antonio Machado e Federico García Lorca teñen como nexo común haber nacido en Andalucía. Nas vindeiras semana traballaremos un chisquiño ao redor estes famosos escritores. O mércores pasado xa comezamos a quentar motores lendo “Platero y yo”.

Trátase dunha preciosa adaptación do clásico de Juan Ramón Jiménez que trouxo Carla para compartir connosco. Pero sen lugar a dúbidas o que máis nos gustou foi o vídeo que podedes ver a continuación facendo clic na imaxe de Platero.

UN ANAQUIÑO DE SEVILLA PARA VÓS

“La Plaza de España”, “La Giralda”, “La Torre del Oro”… estes son algúns dos monumentos que viñan representados nas fotos que nos trouxo José. O xoves empregámolas como escusa para visitar esta cidade a través do vídeo que vos deixamos a continuación. Gustoulle moito aos cativos, especialmente pola música que o acompaña nos primeiros minutos.

Despois traballamos ao redor da denominación de cada edificación pero, sen lugar a dúbidas, o que máis lles apetece aos meniños é que argallemos algo cos coches de cabalos típicos desta cidade, a ver que se nos ocurre…

AS PROVINCIAS DE ANDALUCÍA

Son oito: Sevilla, Málaga, Cádiz, Almería, Granada, Huelva, Jaén e Córdoba. Contámolas no quebracabezas que nos trouxo Laura e puidemos ver os seus monumentos principais no libriño “Colorea  Andalucía” de Carla. De Sevilla xa coñecíamos algúns dos seus fermosos lugares polas fotos que nos deixou José e, do curso pasado, sabemos que nela naceu Velázquez.

Graciñas á colaboración das familias o noso recuncho de Andalucía vaise enchendo de pequenos tesouros que paseniño iremos debullando.

SITUAMOS ANDALUCIA NO MAPA

Sabemos que Zapatocas quere viaxar a Andalucía e nós, que nos apuntamos a todo, tamén, pero … ¿onde está esa Comunidade Autónoma?... Para descubrilo buscamos nos atlas que nos trouxeron Adrián e Rita. O primeiro localizar Galicia, que é onde vivimos nós. Atopámola encima de Portugal, país que moitos dos nenos din coñecer, foron cos seus papás. Seguimos buscando e “abaixo” pegadiña ao mar encontrámola. Coloremos ámbalas dúas con coidadiño de non saírnos e meternos en Portugal ou no mar.

A BANDEIRA DE ANDALUCIA

Empregando a cor branca para simbolizar a paz e o verde que representa a esperanza, onte pintamos a bandeira da Andalucía. Hoxe engadímoslle o escudo e, para izala, reciclamos os rotuladores do curso pasado que xa non pintan.

ZAPATOCAS EN ANDALUCIA

Nunha entrada anterior quedounos pendente falarvos da carta que traía Zapatocas e sobre a que estivemos traballando a semana pasada. Nela contábanos que quería viaxar a Andalucia e animábanos a buscar información sobre esta Comunidade Autónoma.

Na aula xa comezamos a montar un recuncho para colocar todo o material que atopemos: o primeiro o libro “Andalucia” que Zapatocas trouxo como agasallo. Se na casa tedes contos, libros, DVDs, fotos, quebracabezas, postais, mapas, obxectos, folletos ou publicidade de axencias de viaxes, receitas… relacionado con esta Comunicade e adaptado ás idades dos nosos alumnos, podédelo traer para velo na aula, enriquecer o noso recuncho e aprender xuntos.

Hoxe na nosa visita á biblioteca escolar buscamos onde estaba colocado o libro que atopou Zapatocas. Vimos que tiña pegatina branca e o número nove porque trata de xeografía e está situado xunto a máis exemplares que falan de países e outros lugares.