NA HORA DE LER… ¡PELÍCULAS!

A semana pasada xa rematamos de ler todos os contiños dos Irmáns Grimm que tíñamos na nosa bolsiña de lecturas. Como non nos dera tempo de substituílos por outros, decidimos mirar no recuncho que temos montado na  biblioteca dedicado a estes autores. Comprobamos que, ademais de libros, hai un montón de DVDs con títulos que descoñecíamos: “Los tres pelos de oro del diablo”, “La bola de cristal”, “La doncella de los gansos”, “Los dos hermanos”… e outros moitos que coñecíamos a súa versión impresa pero non a película: “El satrecillo valiente”, “Los músicos de Bremen”… Sen dubidalo comezamos a escoller cal visionar primeiro. As que vimos ata agora gustáronnos tanto que optamos por dedicar durante uns días a hora de ler ás películas dos Irmáns Grimm.

A CASIÑA DE CHOCOLATE

Agora que o noso amigo Félix volveu a Alemaña, non podíamos deixar pasar a oportunidade de levar ao noso obradoiro de cociña un dos contos máis famosos dos Irmáns Grimm. Aínda que non calculamos ben a cantidade de crema de cacao que necesitabamos e quedaron un pouquiño escasas, o venres non deixamos nin unha casiña de chocolate sen comer.

MERGULLÁNDONOS EN ALEMAÑA

Pouquiño a pouco, coa colaboración das familias,  o noso recuncho do país xermano vai collendo xeito. Hoxe, para quentar motores, ondeamos e levamos para casa a bandeira que fixeramos a semana pasada. 

Na hora de ler, onte xa rematamos as lecturas dedicadas aos canguros, e está mañá a nosa bolsiña veu cargada de contos dos Irmáns Grimm. Estes escritores nacidos en Alemaña, percorreron o país recollendo contos e lendas que logo recompilaron nos chamados contos de fadas.

OS IRMÁNS GRIMM MARCHAN PARA SISÁN

O luns pasado foi o último día que pasamos con eles. Pero antes de que a súa maleta siga percorrendo o resto das escolas, na hora do empréstito, os nenos que quixeron, puideron optar por levar para casa o seu conto dos Irmáns Grimm favorito. Para os que desexen comprobar canto aprenderon neste trimestre sobre os libros que temos na nosa biblioteca destes autores, aquí lles deixamos o seguinte LIM, soamente tedes que clicar na frecha branca ou no cadradiño de pantalla completa e… ¡a xogar!

FELIZ DÍA INTERNACIONAL DO LIBRO INFANTIL

Hoxe, co fin de promover a lectura entre os máis pequenos e salientar a súa importancia no seu desenvolvemento, conmemórase o Día Internacional do Libro Infantil. Na nosa escola celebrámolo cunha pequena guía de lecturas dedicada aos Irmáns Grimm. Despois de todo un trimestre téndoos coma protagonistas na nosa “hora de ler”, non queríamos deixar pasar esta oportunidade de recompilar aqueles libros que, por espertar a nosa imaxinación, por axudarnos a coñecer Alemaña, por ensinarnos a cociñar unha casiña de chocolate, poñer a proba o noso enxeño …  foron importantes para nós neste denominado “Ano Grimm”.

UNHA CASIÑA DE CHOCOLATE

Iso foi o que cociñamos o venres no noso obradoiro de cociña. Despois de tantos días a voltas cos contos dos Irmáns Grimm, non podíamos deixar pasar a oportunidade de crear o atractivo principal da historia de “Hansel e Gretel”.  Paredes de pan de molde con crema de cacao, porta de galleta con chocolate branco e ventás de obleas de coco e vainilla… O éxito da receita estaba asegurado. Primeiro transformamos en triángulo unha das rebandas pan. Xuntámola coa  outra e démoslle forma de casiña. Con coidadiño para non romper o pan, fomos untando a crema. A mañá estaba fría, moi fría, pero a primeira hora puxemos a crema de cacao xunto ao radiador para que abrandara e poder estendela con facilidade. Colocamos as galletas para a porta e as fiestras. Un lacasito  para o faiado e, co resto do pan, construímos a cheminea. Despois cada quen empezou comendo o que máis lle gustaba: a porta, o tellado, as ventás… O mellor era que podíamos probar o que quixeramos porque na nosa casiña non había bruxa.

ADIVINA DE QUE CUENTO SOY

Este é o título do libro onde atopamos a adiviña que eliximos para o mes de outubro. Por agora seguimos coas relacionadas cos contos dos Irmáns Grimm. Esta obra ofrécenos a oportunidade de poñer a proba o que sabemos dos personaxes dos relatos clásicos a través de adiviñanzas, con pistas claras para que todos as poidamos acertar. Seguro que xa sabedes a solución … ¿Quen se anima a enviar un novo comentario coa resposta ao mes de outubro?.

ADIVIÑAS PARA TODO O ANO

O noso calendario escolar do vindeiro curso xa está en proceso de elaboración. Este ano ímolo dedicar ás adiviñas. Como andamos a voltas cos Irmáns Grimm, comezamos co libro “El país de las adivinanzas”. Nel hai que descubrir  obxectos ou personaxes relacionados cos contos clásicos. Para agochar a resposta, colocamos unha portiña… Nas vindeiras semanas iremos completando o noso particular almanaque do curso 2013 / 2014. Con cada mes traballaremos un libro de adiviñas e animámosvos a resolver a que elixamos. Para empezar… ¿quen nos envía un comentario coa solución á do mes de setembro?...

A FAMILIA DOS IRMÁNS GRIMM

Na revista dominical que acompañaba ao xornal “La Voz de Galicia” do 17 de febreiro, viña unha reportaxe sobre os Irmáns Grimm. Nela limos algunhas curiosidades da súa vida e que sempre quixeron estar xuntos. Pero o que máis nos gustou foi coñecer á súa familia. Nunha ilustración aparece un retrato con todos, incluso unha das avoas que lle contaba as historias que eles posteriormente escribirían.

A PORTA DE BRANDEBURGO

Este é un dos monumentos que podemos visitar se viaxamos a Berlín. Vímolo  no libro “Mi viaje a Berlín” que temos na maleta dos Irmáns Grimm para “a hora de ler”. Ademais de coñecer os seus contos e a súa biografía, queremos aprender cousas do país onde naceron. Nesta guía de viaxe para nenos, podedes atopar museos curiosos, paseos divertidos, xogos, pasatempos e receitas. Nas vindeiras semanas continuaremos véndoa e coñecendo diversos aspectos da cidade onde tamén vive Sofía, a amiga inseparable do noso amigo Félix.

 

A PITA CEGA

Esta semana, mentres líamos o conto “O lobo e os sete cabritiños” da maleta dos irmáns Grimm, vimos nunha ilustración na que as sete cabuxas xogaban á pita cega. Moitos dos nenos non sabían de que se trataba e onte decidimos aprender.  Iso de recoñecer a un amiguiño empregando soamente o sentido do tacto é complicado e ninguén acertou. Nos vindeiros días seguiremos xogando para pouco a pouco ir descubrindo que son moitos os datos que podemos obter coas nosas mans: se leva o pelo longo ou curto, se ten pinzas ou un lazo, se os botóns do seu mandilón son grandes ou pequenos, se ten pendentes ou colar… Se esta fin de semana tamén queredes probar a xogar en familia, no seguinte enlace http://www.youtube.com/watch?v=bnRJ_f-2n7A tedes un vídeo coa canción e as normas, non é exactamente como o facemos na aula pero é divertido.

NA HORA DE LER, OS IRMÁNS GRIMM

Este ano, Alemaña celebrará o seu denominado “Ano Grimm“ para conmemorar o bicentenario da primeira edición dos contos destes irmáns. Na nosa escola tamén queremos unirnos  a esta conmemoración con diversas propostas. Comezamos a semana pasada cociñando unha torta de aniversario. Continuamos cunha maleta cargada cos seus libros para a hora de ler. Son tantos que o encargado de escoller cada día non sabe por cal decatarse. Tamén contén películas baseadas nas súas historias que, pouco a pouco, iremos vendo nos moitos recreos chuviosos que estamos tendo este mes. ¡Benvidos ao ano Grimm!

OS CONTOS DOS IRMÁNS GRIMM ESTÁN DE ANIVERSARIO

O pasado 20 de decembro cumpríronse 200 anos da primeira edición dos contos recompilados por Jacob e Wilhelm Grimm: Brancaneves, Cincenta, A casiña de chocolate, Polgarciño, Carapuchiña Vermella… E como en clase nos encanta celebrar aniversarios, decidimos unirnos á conmemoración engadindo as candeas correspondentes á torta de nata con froitos secos que cociñamos o venres.

A receita era ben sinxela, pero abrir os paquetes dos sobaos non sempre resulta doado. Tampouco o foi quitarlle o envoltorio pero, o máis complicado era conseguir que algúns dos pequenos non comeran os ingredientes antes de elaborar a torta…Co xeito fomos colocando os sobaos, cubríndoos con nata e engadindo os froitos secos sen casca. Por último o máis divertido, cantarlle aos contos dos Irmáns Grimm, soprar as candeas e comer a torta.