NOMES QUE EMPEZAN POR…

 

Continuamos o noso traballo ao redor dos nomes do alumnado da aula. Nesta ocasión centramos a atención na inicial de cada un. Se vos apetece podedes facer a mesma actividade na casa cos nomes da familia.

NOMES QUE TEÑEN…

Na aula seguimos traballando ao redor do nome propio. Nesta ocasión había que atopar os nomes dos nenos da clase que teñen determina letra. Pero no listado Noa non puido poñer o tercer nome que ten L porque faltaba o espazo para el. A ver quen lembra que nome de clase ten L ademais de Lúa e Noel. Podedes enviar un comentario coa resposta.

Sen lugar a dúbidas o que máis gustou da actividade foi emprear os rotuladores fluorescentes novos.

O NOME DE NOEL

 

Noel xa lle ten atopado o lugar ideal ao seu nome na casiña. El optou polo salón, o espazo que máis usa. Quedoulle perfecto no andel!  A ver se alguén máis se anima a enviarnos o sitio escollido.

O NOME PROPIO

Coma todos os anos, o nome propio é o primeiro texto ao redor do que comezamos a traballar na aula.  Para o alumnado de infantil é un texto sinxelo, curto e cheo de contido. En clase estamos vendo como se escribe o de cada neno, contando cantas letras teñen e outras actividades a través dun pequeno proxecto que desenvolveremos nas vindeiras semanas. 

Se vos apetece, na casa tamén podedes facer as mesmas propostas pero cos nomes da familia. E non esquezades colocar nun lugar visible o cartel que levaron os nenos para casa co seu nome escrito.Se vos animades podedes enviarnos unha foto do lugar escollido a escoladeleiro@gmail.com e publicaremos as imaxes. Seguro que aos cativos lles gusta velas.

O NOME DE NOEL

 Xa temos o lugar elixido por Noel para colocar o seu nome. Xusto ao lado dos contos que ten no salón e que escolle para contar á noite. Un lugar perfecto para identificar as letras no cartel e nalgúns dos seus contiños.

Tamén nos enviou unha foto coas castañas asadas que apañamos na escola. Di que estaban que estaban moi boas. Moitas grazas Noel por compartir connosco tan bonitos momentos.

O CASTIÑEIRO DA ESCOLA

Unha escola rural coma a nosa ofrece a posibilidade de gozar constantemente da natureza e os seus recursos. Coa chegada do outono, o castiñeiro do xardín desprende os seus froitos que cada día recollemos con coidadiño. O venres fixemos o reparto da colleita. Previamente realizamos cucuruchos de papel reciclando folios vellos que cada neno decorou e personificou co seu nome. E por último chegou o momento de contar e gardas as castañas. Xa nos contaredes se estaban ricas.

O NOME DE NOA

 

Noa Lede xa nos enviou a foto co lugar escollido para colocar o seu nome. Ela optou pola súa habitación, xusto enriba do seu escritorio. Un lugar perfecto para practicar se hai algunha letra que lle fai rabiar .A ver quen máis se anima a mandarnos fotos coa súa elección.

Tamén nos enviou esta foto dun divertido boneco que fixo coa súa mamá. Mirade que chuliño lle quedou reciclando un tubo de papel hixiénico e empregando elementos da natureza. Un bonito modo de darlle a benvida ao outono. Grazas Noa por compartir connosco as túas imaxes. 

COS NOMES PARA CASA

Hoxe, como cada principio de curso, os nenos levaron para casa un pequeno cartel co seu nome para colocar nun lugar visible. Cada ano o nome ten unha complexidade engadida para avanzar no coñecemento da lingua escrita, polo que debe de substituír ao anterior. Podedes colocalo na habitación, na porta do armario, na cociña, no baúl dos xoguetes … pero sempre ao alcance dos cativos. Se vos animades podedes enviarnos unha foto do sitio escollido por eles  a escoladeleiro@gmail.com e publicaremos as imaxes no noso blog, seguro que aos cativos lle gusta velas.

O NOSO NOME NA LINGUA DE SIGNOS

 

Grazas á mestra Malú, estamos aprendendo o abecedario e algunhas palabras na lingua de signos española (LSE). Hoxe vos deixamos este vídeo co alfabeto e unha proposta. Trátase de que animades aos nenos a deletrear o seu nome empregando esta lingua coma facemos na escola. Neste enlace tedes un exemplo de como o fan os alumnos do CEIP Tierra de Pinares. Se vos animades a enviarnos un vídeo facéndoo, publicarémolo. Pode participar toda a familia, será divertido tentar adiviñar como se chaman.

COS NOMES PARA CASA

 Como todos os anos, o nome propio é o primeiro tipo de texto ao redor do que estamos a traballar. Ademais de servir para identificar as nosas cousas, o nome propio axuda aos máis pequenos a descubrir a linguaxe escrita. Por este motivo, hoxe todos levaron para casa un cartel con el en grao de complexidade crecente dependendo da súa idade.

Axudade ao voso fillo a colocalo nun lugar visible (na porta da habitación ou armario, na neveira da cociña, no seu escritorio …)  para que dispoña dun modelo para reproducilo e poder avanzar na aprendizaxe da linguaxe escrita. Se vos animades, enviarnos unha foto do sitio escollido a escoladeleiro@gmail.com e publicaremos as imaxes no noso blog, seguro que aos cativos lle gusta velas.

AS NOSAS NOVAS AMIGAS

Co inicio de curso, tamén chegan os nomes das novas compañeiras. Estes días estámolos a empregar para traballar o trazo das letras minúsculas á vez que os meniños avanzan no coñecemento da lingua escrita.

O NOME MÁIS LONGO DE TODOS

Xa temos a solución ao reto relacionado cos nomes das nosas familias. Lembrámosvos que había dous finalistas: Ainhoa e Santiago. Marcos confírmanos que o que máis letras ten é Santiago. Pero aínda atopou outro máis longo: María del Carmen!

ESCRIBINDO CON ARTE

Esta fin de semana de sol e calor, Marta, o seu irmán Pablo, as nosas antigas alumnas Mencía e Suevia e as súas mamás, fixeron unha autentica obra de arte en equipo cos nomes dos nenos da escola. Cunhas cunchiñas, area e moito agarimo, mirade nas fotos que preciosos quedaron. Xogade a buscar o voso, están todos!

DÍAS DE PRAIA

Aínda que temos que seguir tendo coidadiño e manter a distancia de seguridade, xa podemos ir á praia. Nela ábrese un mundo de posibilidades que Marta xa quixo compartir connosco. Pódemos escribir nomes na area, debuxar, deixar pegadas, facer figuras, realizar construcións con moldes ou sen eles, xogar ao tres en raia, crear mandalas con cunchiñas, experimentar con recipientes … Se vos apetece mandarnos as vosas fotos coas vosas creacións, seguro que inspiramos aos compañeiros e descubrimos novas posibilidades.

OS NOMES DA FAMILIA

Fai moito tempo que non xogamos cos nomes e hoxe vos propoñemos retomar o tema empregando os de toda a familia. Trátase de facer un listado con todos eles como na foto que nos enviou Marcos cos da escola, non fai falta que poñamos foto se non temos. Podemos escribir os que queiramos: os dos primos, tíos, avós, irmáns … Despois contamos cantas letras ten cada un e anotamos o número. E para rematar vemos o que ten máis, menos ou igual. Tamén podemos facer tarxetas con eles e ordenalas de máis a menos número de grafías ou á inversa.

A ÁRBORE XENEALÓXICA DE ROI

Mirade que árbore máis chuliña construíu Roi coa axuda da súa familia. Cóntanos que gustoulle moito este reto. Recortaron os nomes e Roi foi poñéndoos  cadanseu sitio. Animádevos a facer a vosa, seguro que o pasades tan ben coma el.

XOGANDO CON CAROZOS

Hoxe, cos carozos que sobraron do Magosto que celebramos a semana pasada, estivemos aprendendo un dos xogos cos que enredaban os nosos avós cando eran pequenos. Tratase de facer unha torre o máis alta posible sen que caía ao chan poñendo cada neno un carozo por quendas.

 Tamén comprobamos que podemos facer nomes con eles e nos vindeiros días seguiremos experimentando e creando. Probade a xogar tamén vós na casa cos meniños, seguro que atopades un montón de usos creativos. Animádevos a mandarnos fotos e publicarémolas no blog para compartir ideas.

OS NOSOS CARNÉS DE BIBLIOTECA

Cada semana, cando os meniños acuden á biblioteca e escollen o libro que levaran para casa, a mestra Ana ten que rexistralo nun programa informático.  Para facilitar esta tarefa, cada neno ten o seu  carné cun número de lector. A principio de curso cada cativo personificouno co seu nome e un debuxo. Agora xa están plastificados e todos teñen sistematizado que teñen que buscalo e introducilo no libro que levan para facilitar o seu control.

OS NOMES NA NOSA CASA

Xa nos chegou o primeiro correo co lugar escollido para colocar o nome propio: o encerado. Sen lugar a dubidas Marcos elixiu o mellor sitio da casa para practicar como escribilo. A ver se alguén máis se anima a enviarnos fotos e continuamos publicándoas nesta entrada.

QUENTANDO MOTORES

Agora que os pequenos xa están adaptados á escola e os seus espazos, toca comezar co traballo propiamente escolar. Paseniño iremos aprendendo moitas cousiñas pero empezamos co nome propio porque é un texto sinxelo, curto e pleno de contido para o neno. Como outros anos, hoxe todos levaron para casa un folio plastificado co seu nome. Axudade ao voso fillo a colocalo nun lugar visible ( na porta da habitación, na neveira da cociña, no seu escritorio…)  para que dispoña dun modelo para reproducilo e poder avanzar na aprendizaxe da linguaxe escrita. Se vos animades, enviarnos unha foto a escoladeleiro@gmail.com del sitio escollido e publicaremos as imaxes no noso blog, seguro que aos cativos lle gusta velas.