ENTROIDO 2024

Este ano os piratas invadiron o noso festival de Carnaval. Grazas ao gran esforzo realizado pola ANPA do colexio, puidemos realizar unhas simpáticas fotografías nos espectaculares photocalls  que prepararon.

Ademais argallaron unha busca do tesouro chea de probas divertidas.

Tras superalas conseguimos o mapa do tesouro, puidemos atopalo e levar a recompensa para casa.

Tamén contamos coa actuación do Mago Paco que veu cargado de contos cheos de imaxinación.

Chegado o momento da merenda, recuperamos forzas con orellas, filloas, rosquillas e outros doces típicos destas datas elaborados con moito agarimo polas familias.

Rematamos a xornada cun desfile e a actuación de todas as escolas baixo a dirección da mestra Olalla de música. 

Moitas grazas a todos o que fixeron posible tan estupenda festa e en especial á ANPA do centro.

TEMPO DE ENTROIDO

AS ORDES DO MECO

ENTROIDO 2023

Este curso por fin puidemos volver a celebrar o Carnaval xuntándonos todas as aulas do colexio. O Xurásico e a prehistoria foron os temas centrais dos disfraces de grandes e pequenos.

As familias prepararon uns traxes espectaculares e a ANPA varios decorados impresionantes.

A primeira hora da mañá o Maggo Deimi fíxonos rir e deixounos abraiados coa súa maxia.

Despois chegaron o baile de Entroido e os xogos.

Repuxemos forzas cunha rica merendola e saímos a realizar o desfile pola contorna.

O broche final púxoo a mestra Olalla de musica coa bonita actuación dos meniños a ritmo de bailes que tiñan a prehistoria como eixo central.

CARAS DE FILLOAS

 

É tempo de Entroido e chegan as filloas. A nosa proposta culinaria da fin de semana pasada veu cargada delas, pero cunha versión divertida desta típica sobremesa.

Na nosa receita suxerimos diversas froitas que vimos neste enlace, pero cada chef elabora a súa propia variedade.

Cada unha é diferente pero primeiro temos que preparar a masa.

Despois cociñala con moito coidadiño.

Por último escoller as nosas froitas favoritas.

E decorala como máis nos guste.

FILLOAS

O Entroido chega ao seu fin, e nada mellor que despedilo cunha saborosa receita de filloas acompañada carnavalescas lecturas.

ENTROIDO 2022

Este curso volvemos a celebrar o Entroido a nivel de aula para cumprir coas medidas sanitarias. “A volta ao mundo” no sentido  máis amplo da palabra foi a temática ao redor da que xiraron os nosos disfraces, cunha homenaxe especial á artista xaponesa Yayoi Kusama.

No transcurso da maña no puidemos xuntarnos co resto das clases pero divertímonos igual cantando, bailando, lendo contos, facendo manualidades e xogando. 

AS FILLOAS DE ERIK

 

ENTROIDO 2021

Este curso todo é diferente, pero non por iso menos divertido. O venres comezamos a nosa particular festa co “Baile dos animais” e sesión de fotos.

Despois preparamos a receita semanal baseándonos na idea dos nenos de Ribadumia B empregando os folletos publicitarios dos supermercados. Eliximos entre filloas e orellas, limos os ingredientes e buscámolos na publicación.

Sen darnos conta chegou a hora do recreo e, tras recuperar forzas cunha rica merenda de carnaval, gozamos dun solleiro día xogando coa area.

Á hora de ler veu cargada de contos de Entroido e rematamos a xornada decorando unha careta de peliqueiro.

AS FILLOAS DE MARTA

 

AS FILLOAS DE COLORES DE NOA

 

O CARNAVAL NA BIBLIOTECA

 

O Entroido tamén chegou á biblioteca e Zapatocas xa nos preparou un recuncho cheo de lecturas con este tema coma eixo central. Estamos desexando mergullarnos neste carnaval de libros.

TEMPO DE ENTROIDO

 

Como xa todos sabedes, este venres celebraremos a festa de Carnaval na aula disfrazados de animais no sentido máis amplo da palabra. Pero xa comezamos a quentar motores seguindo as ordes do Meco. Hoxe tocaba traer as uñas pintadas. Todos cumprimos o seu mandato como podedes ver na imaxe. Agora vos propoñemos xogar. A ver se adiviñades de quen son as mans.

Aproveitamos a ocasión para compartir convosco o precioso conto !Vivan las uñas de colores!

ENTROIDO 2020

Como vedes nas fotos, este ano as familias prepararon uns disfraces espectaculares co sistema solar como eixo central. Contacontos, manualidades, cancións, xogos, películas, bailes e unha riquísima merenda con doces típicos destas datas. A mañá estivo cargada de actividades e o sol acompañounos durante toda a xornada. Moitas grazas a todos polo voso esforzo e colaboración.

ORDES DO MECO

O DISFRACE DE LÍA

A conta atrás para a nosa festa de Entroido xa comezou e as familias colaboran cunha creatividade impresionante. Mirade a foto que nos mandou Lía do disfrace que está a facer aproveitando recortes de feltro que lle sobraron doutras manualidades, Grazas por compartir connosco o voso inxenio.