lunes, 30 de mayo de 2016

REMATAMOS CON MANUEL MARÍA


Aínda que gozamos elixindo, lendo e ilustrando os textos de Manuel María, a semana pasada dimos por rematado o traballo ao seu redor co poema “O autobús”  que realizamos entre todos a proposta do equipo de biblioteca do centro. Cada clase elaborou un dos publicados en “Primavera das letras” e con todos decoramos a biblioteca do colexio para renderlle unha pequena homenaxe ao autor. Pero sen lugar a dúbidas o que máis gustou aos cativos foi representarse montándose nese velliño bus que na súa imaxinación lles leva á escola.

jueves, 26 de mayo de 2016

XORNADA DE EDUCACIÓN VIAL


Unha charla sobre educación vial adaptada a idade dos nosos alumnos, vídeos sobre a importancia de desprazarnos de xeito seguro, un obradoiro de cociña para elaborar un semáforo, un circuíto para aprender a conducir coas nosas bicicletas e patinetes grazas a Paco Torres da Autoescola Barrantes, visita ao interior dun coche patrulla e …  ¡ata montamos na moto dos axentes da DXT!. A pesar da choiva, o martes na escola de Sisán pasámolo xenial, tivemos de todo, dende unha merenda de sinais de tráfico ata a creación do noso propio carné de conducir con selo oficial do CRA de Ribadumia, mirade na seguinte presentación que ben o pasamos. Graciñas a todos os que co seu esforzo e colaboración fixeron posible o desenvolvemento desta actividade.


lunes, 23 de mayo de 2016

REMATAMOS O NOSO CALENDARIO DE GOYA



Durante todo o trimestre levamos moito traballiño para elaboralo, pero graciñas a el, coñecemos bastantes obras do autor, algúns datos importantes da súa biografía, traballamos os números ata o 31, repasamos os meses do ano e a diferenza entre os días laborables e festivos. Pero sobre todo seleccionamos e limos libriños que falan de Goya e as súas creacións.

A través deles descubrimos a familia real e os números romanos, a festa de San Isidro Labrador e o seu refrán, os horrores da guerra e como superar os medos a través da pintura.

domingo, 22 de mayo de 2016

CARLA VIAXA SEGURA, ¿E TI…?


Xa temos a nosa primeira participante da escola de Leiro na campaña de educación vial “Eu tamén viaxo seguro que estamos a desenvolver no colexio. A ver se entre todos conseguimos que ninguén poña un coche en marcha sen que os meniños estean ben atados e protexidos na súa cadeira. 

jueves, 19 de mayo de 2016

RATÓN QUE TE PILLA EL GATO

Dende que un destes venres chuvioso viramos como a mestra Marina e os nenos de Sisán xogaban á hora do recreo no Local Social a “Ratón que te pilla el gato”, tíñamos moitas ganas de aprender. A semana pasada xa que andábamos a voltas co conto de Manuel María “O bigote de Mimi” e os problemas deste gatiño cos ratos, aproveitamos para practicar o xogo.

martes, 17 de mayo de 2016

PARA MERENDAR… ¡UN POEMA DE MANUEL MARÍA!

Xa que andamos a voltas con Manuel María decidimos celebrar o Día das Letras Galegas cociñando un dos seus poemas: “A lebre”. Para os que desexen imitarnos, a continuación vos deixamos o poema e a receita.

lunes, 16 de mayo de 2016

I CONCURSO DE DEBUXO DAS LETRAS GALEGAS


O concurso de debuxo organizado pola ANPA do noso colexio para conmemorar o Día das Letras Galegas, serviunos de incentivo para traballar ao redor dos poemas de Manuel María. Cada cativo escolleu, escribiu e ilustrou o seu favorito do libro “Os soños na gaiola” que ten publicado o autor. Como ademais había que incluír os datos persoais, repasamos os número de teléfono, a idade e ata o curso escolar. Levamos moito traballiño pero todos os meniños quedaron encantados co resultado. 

Non esquezades que mañá na Casa de Cultura de Ribadumia, ademais de entregar os premios aos gañadores do concurso, haberá contacontos, xogos, animación e sorteo de agasallos entre os asistentes.

jueves, 12 de mayo de 2016

¡EU TAMÉN VIAXO SEGURO!

Dende a escola queremos salientar a importancia que ten na prevención de lesións en caso de accidente viaxar utilizando os sistemas de retención infantil. Para impulsar o seu uso e concienciar ás familias da necesidade de empregalo sempre aínda que sexan desprazamentos curtos, iniciamos a campaña ¡Eu tamén viaxo seguro!.
Trátase de concienciar aos meniños da necesidade de ir ben sentadiños na súa cadeiriña, abrocharse o cinto de seguridade antes de arrincar o coche e non quitalo ata que o motor estea apagado. A proposta é que enviedes ao noso correo escoladeleiro@gmail.com unha foto do cativo no coche sentando na súa cadeiriña co cinto posto. Con todas elas faremos unha exposición e publicarémolas no blog. 

martes, 10 de mayo de 2016

O RESCATE DOS GOLFIÑOS


Aínda que nas últimas semanas non publicamos ningunha entrada relacionada coas nosas actividades co xornal, foron moitas as novas ao redor das que traballamos na aula. O 400 aniversario da morte de Miguel de Cervantes, os accidentes provocados polo xabaril nas nosas estradas, a viaxe dun can nun coche tras ser atropelado, a nosa festa dos maios … pero a que máis nos gustou foi a do rescate de dous golfiños na illa de A Toxa

lunes, 9 de mayo de 2016

COÑECENDO A MANUEL MARÍA


Este ano o Día das Letras Galegas está dedicado ao autor Manuel María Fernández Teixeiro. Son numerosos os poemas que ten publicados adaptados as idades dos nosos alumnos e nos vindeiros días irémolos traballando. Hoxe, na nosa visita semanal á biblioteca escolar, descubrimos un recuncho que nos tiña preparado Zapatocas cos libros que temos deste escritor. Limos o seu conto “O bigote de Mimi”, escoitamos algúns dos seus poemas musicados no libro “Canta o cuco” e recitamos moitos do precioso exemplar “Os soños na gaiola”.
Se na casa queredes coñecer algúns dos poemas do autor e aprender xogado coas actividades LIM do Seminario Galán, podedes facer clic enriba das imaxes.

sábado, 7 de mayo de 2016

FLORES DE FROITAS

A primavera tamén chegou ao noso obradoiro de cociña.  Nada mellor que unha nutritiva e saudable merenda de flores de mandarina e amorodo para darlle a benvida.

jueves, 5 de mayo de 2016

DESPEDÍMONOS DE CANARIAS

Aínda que con moito retraso con respecto a cando o tíñamos previsto, onte por fin desmontamos o recuncho de Canarias e deixamos sitio para comezar a crear o espazo dedicado a Aragón. Así que xa sabedes, se na casa tedes contos, revistas, libros, DVDs, fotos, quebracabezas, postais, mapas, obxectos, folletos ou publicidade de axencias de viaxes, receitas… relacionado con esta Comunidade Autónoma e adaptado ás idades dos nosos alumnos, podédelo traer para o noso novo recanto.

miércoles, 4 de mayo de 2016

A MIN GÚSTAME LER EN…

Entre outras moitas actividades, este ano na escola quixemos celebrar o día do libro facendo unha exposición fotográfica na festa dos Maios baixo o lema: “A min gústame ler en…”. Cada pequeno, coa axuda da súa familia, retratouse lendo no seu lugar favorito. Para todos aqueles que non puideron vela o día da festa, a continuación publicámola en formato dixital, esperamos que vos guste. 

martes, 3 de mayo de 2016

EXCURSIÓN Á GRANXA ESCOLA

Apañamos flores e fixemos compost; plantamos chícharos e cenorias; regamos as leitugas; vimos, alimentamos e coñecemos curiosidades de diferentes aves e mamíferos; moemos millo e fixemos fariña, peneirámola, amasámola e elaboramos pan … A nosa visita á granxa escola de Serantellos foi do máis completa, ata o sol quentou forte e cambiamos os abrigos polas viseiras.

lunes, 2 de mayo de 2016