O ARCO DA VELLA E A SERPE DE ANA E NOA

 

Ana e Noa tamén se uniron á iniciativa de cociñar os poemas de Florencio Delgado que fan referencia ao arco da vella e a serpe. Mirade nas imaxes de todo o proceso que ben lle saíron.

A SERPE E O ARCO DA VELLA DE NOA

Con motivo do Día das Letras Galegas, traballamos en clase algúns dos poemas de Manuel Delgado e decidimos levalos ás propostas culinarias da fin de semana. Noa animouse a cociñalos e mirade nas imaxes que ben lle quedaron.

ROI POETA

Mirade o precioso poema sobre a situación que nos toca vivir inventou Roi. Nada máis fermoso que expresar a través da poesía os nosos sentimentos e desexos. Seguro que si Roi, coma ti ben dis no teu poema, isto pasará e todos xuntos ímolo celebrar. Grazas por compartir tan lindas palabras connosco, ¡estás feito un artista!

Continuade mandándonos os vosos poemas, será un xeito fabuloso de desenvolver a creatividade dos meniños.

LÍA POETISA

Mirade que poesía máis bonita inventou Lía. Nola enviou ao correo xunto con ese lindo debuxo de Rosalía de Castro e un bico para todos. Moitas grazas Lía por compartir a túa arte connosco. A ver se nos chegan máis poemas e enchemos o blog de versos.

NA CASIÑA CON POESÍA

O pasado 21 de marzo celebrouse o Día Mundial da Poesía. Para conmemoralo dende a nosa casiña, propoñemos aos meniños que nos envíen un anaquiño do seu poema favorito e o ilustren. Pode ser de calquera poeta ou inventado. Ou se o preferides enviar un audio ou vídeo recitándoo como suxiren na aula de Ribadumia. Para quentar motores, publicamos o que eliximos de Rosalía de Castro para o seu universo e que reescribiron e debuxaron entre todos.

Para os indecisos nos seguintes enlaces tedes algunhas suxestións

https://www.pequeocio.com/poesias-cortas-para-ninos-sobre-las-estaciones-del-ano/

https://www.guiainfantil.com/articulos/ocio/poesias/9-poemas-cortos-para-leer-con-ninos/

LETRAS GALEGAS 2018

Este ano o Día das Letras Galegas está dedicado a María Victoria Moreno. Na biblioteca estamos montando un recuncho cos libriños que esta autora ten publicados adaptados á idade dos nosos alumnos.  O luns limos e ilustramos un poema de “Eu conto, ti cantas”, unha bonita obra en verso que nos regalou o ANPA polo día do libro. Con estes debuxos e outros que fixemos no transcurso da semana, imos participar no III Concurso de Debuxo Letras Galegas que convoca o ANPA do CRA de Ribadumia.

Se na casa tamén queredes aprender cousiñas sobre a vida e obra de esta autora, podedes facer clic nas imaxes de abaixo e accederedes ás actividades en liña do Seminario Galán.

¡FELIZ DÍA DA POESÍA!

Cada 21 de marzo conmemórase o Día da Poesía. Na nosa aula celebrámolo levando para casa un poema de Antonio Rubio que comezaramos a reescribir fai tempo. Trátase do libriño “Zapato” ilustrado por Óscar Villán e musicado por Cristina Martín Sanz.

ROSAS E REPOLOS

Convertidos en rosas e repolos, os meniños xa remataron a ilustración do poema de Rosalía que elixiran  para decorar a biblioteca.  Mirade na imaxe que riquiño lles quedou.

REMATAMOS CON MANUEL MARÍA

Aínda que gozamos elixindo, lendo e ilustrando os textos de Manuel María, a semana pasada dimos por rematado o traballo ao seu redor co poema “O autobús”  que realizamos entre todos a proposta do equipo de biblioteca do centro. Cada clase elaborou un dos publicados en “Primavera das letras” e con todos decoramos a biblioteca do colexio para renderlle unha pequena homenaxe ao autor. Pero sen lugar a dúbidas o que máis gustou aos cativos foi representarse montándose nese velliño bus que na súa imaxinación lles leva á escola.

PARA MERENDAR… ¡UN POEMA DE MANUEL MARÍA!

Xa que andamos a voltas con Manuel María decidimos celebrar o Día das Letras Galegas cociñando un dos seus poemas: “A lebre”. Para os que desexen imitarnos, a continuación vos deixamos o poema e a receita.

I CONCURSO DE DEBUXO DAS LETRAS GALEGAS

O concurso de debuxo organizado pola ANPA do noso colexio para conmemorar o Día das Letras Galegas, serviunos de incentivo para traballar ao redor dos poemas de Manuel María. Cada cativo escolleu, escribiu e ilustrou o seu favorito do libro “Os soños na gaiola” que ten publicado o autor. Como ademais había que incluír os datos persoais, repasamos os número de teléfono, a idade e ata o curso escolar. Levamos moito traballiño pero todos os meniños quedaron encantados co resultado. 

Non esquezades que mañá na Casa de Cultura de Ribadumia, ademais de entregar os premios aos gañadores do concurso, haberá contacontos, xogos, animación e sorteo de agasallos entre os asistentes.

OS MÉRCORES, XOGOS DE CARTAS

O poema de Federico García Lorca “Los reyes de la baraja” que aprendemos o trimestre pasado, ademais de servimos para xogar ao pilla, empregámolo como detonante para comezar a traballar as matemáticas a partir das cartas.

O primeiro, recoñecer os protagonistas do poema: os reis da baralla e os seus paus. E con este obxectivo xogamos a ver quen sacaba cada unha das figuras á vez que repasabamos a escritura dos nomes propios. Este trimestre os mércores xogaremos ás cartas, xa vos contaremos.

CORRE QUE TE PILLO

Hoxe de novo baseámonos nos poemas de Federico García Lorca para brincar. Neta ocasión a segunda estrofa de “Los reyes de la baraja” serviunos para xogar ao pilla e rir pintando a cara dos atrapados. Para os que non se lembren dos seus versos, a continuación deixamos a versión musicada de Vicente Monera que tanto nos gusta.

E xa postos a enredar, fixemos un repaso de todos os xogos que aprendemos durante o trimestre, mirade nas fotos que ben o pasamos.

¡ATA SEMPRE XOSÉ NEIRA VILAS!

Esta semana os xornais trouxeron unha mala nova, a morte do escritor galego Xosé Neira Vilas. Na nosa biblioteca escolar temos un dos seus libros “Cantarolas”, que tamén contén versos da súa compañeira Anisia Miranda.

Na nosa aula quixemos renderlle unha pequena homenaxe lendo algúns dos poemas contidos nesta obra e especialmente “Historia dun grilo”. Neste enlace da páxina web da Fundación Xosé Neira Vilas, tedes unha escolma de cancións compostas e interpretadas por músicos galegos inspirándose nestes poemas. A editorial Kalandraka acaba de sacar unha nova edición do libro ilustrada por Leandro lamas.

NA HORA DE LER… ¡NOVEDADES DE ANDALUCÍA!

Esta semana foron varias as novidades literarias que viñeron a enriquecer os fondos da nosa biblioteca relacionados con Andalucía. “¿Dónde cantan los pájaros que cantan?” de Juan Ramón Jiménez, “Cómo se llaman las niñas flamencas”, “Quiero bailar flamenco”,  “Mi primer libro de Lorca”, “Juan Ramón Jiménez para niños y niñas… y otros seres curiosos” e da mesma colección o de Federico García Lorca. Como non podía ser doutro xeito, rapidamente comezamos a dedicar a nosa hora de ler a estas pequenas xoias. Con cada un deles van xurdindo diferentes actividades que xa vos iremos contando.

VERDE QUE TE QUIERO VERDE

Aínda que realmente chámase “Romance sonámbulo”, a este coñecido poema de Federico García Lorca gústanos chamalo “Verde que te quiero verde”. A semana pasada estivemos traballando ao redor del e divertíndonos cantándoo co ritmo flamenco que lle da Ketama na versión que ten con Manzanita. Para ilustralo axudámonos dos libros “Como dibujar animales” e “Vamos a dibujar… un barco”. Con eles descubrimos como realizar un cabalo e un barco dun xeito facilísimo e moi xeitoso.

LA TARARA

Como xa vos comentaramos nunha entrada anterior, na escola estamos a traballar ao redor dalgúns escritores andaluces. Esta semana centrámonos no poema “La Tarara” que Federico García Lorca compuxo a partir dunhas coplas populares. Estes versos, nalgunhas zonas de España, son empregados como xogo de roda que nós aproveitamos para aprender.

Hai moitas versións musicadas de “La Tarara”, a continuación vos deixamos a de Antonio Vega que é a que máis nos gusta.

TORTA DE AMORODOS

Dende o día do 177 aniversario do nacemento da escritora Rosalía de Castro, tíñamos ganas de celebralo coa nosa tradicional torta de amorodos, pero as festas do Entroido fixeron que o aprazaramos. Hoxe lembramos a nosa poeta favorita recitando os seus poemas, escoitando o libro-disco “Rosalía pequeniña” e, por suposto, cociñando unha riquísima torta de amorodos con nata.

TOKIO

Este é o título do conto que limos a semana pasada na biblioteca escolar. Con el descubrimos algunhas cousas curiosas de Tokio, como que hai moitos corvos, que regalan panos de man de papel con publicidade ou que as casas son moi caras. Pero o que máis nos chamou a atención deste libro foi o nome da editorial que o publica: media vaca. 

Na nosa biblioteca non temos ningún andel co seu anagrama porque unicamente temos este volumen. Os contos de todas aquelas editoriais das que soamente adquirimos un ou dous exemplares están xuntos nun estante que aproveitamos para coñecer.

Neste andel atopamos o libro “Margarita”, o poema de Rubén Dario que tanto nos gusta e que limos fai un par de semanas. A continuación vos deixamos a súa versión en curtametraxe, veredes que bonito.