Xa temos o lugar elixido por Noel para colocar o seu nome. Xusto ao lado dos contos que ten no salón e que escolle para contar á noite. Un lugar perfecto para identificar as letras no cartel e nalgúns dos seus contiños.
Tamén nos enviou unha foto coas castañas asadas que apañamos na escola. Di que estaban que estaban moi boas. Moitas grazas Noel por compartir connosco tan bonitos momentos.
Co gallo da festa do Samaín que celebraremos o vindeiro 28 de outubro, Zapatocas preparounos na biblioteca escolar un recuncho especial dedicado aos pantasmas cunha chea de contos divertidos. Tamén envioulle á mestra o seguinte vídeo cunha canción que nos encantou e coa que Zapatocas xogou a converterse en pantasma. Queredes enredar na casa tamén? Soamente necesitades unha saba ou un anaco de tea e … a cantar pantasmas!
Noel xa cociñou a saudable receita que propoñiamos
elaborar esta fin de semana. Mirade nas fotos que nos enviou que chuliño lle
quedou con uvas negras o ourizo. Grazas Noel por compartir as imaxes de todo o proceso connosco.
Unha escola rural coma a nosa ofrece a posibilidade de
gozar constantemente da natureza e os seus recursos. Coa chegada do outono, o castiñeiro
do xardín desprende os seus froitos que cada día recollemos con coidadiño. O venres
fixemos o reparto da colleita. Previamente realizamos cucuruchos de papel
reciclando folios vellos que cada neno decorou e personificou co seu nome. E por
último chegou o momento de contar e gardas as castañas. Xa nos contaredes se
estaban ricas.
Noa Lede
xa nos enviou a foto co lugar escollido para colocar o seu nome. Ela optou pola
súa habitación, xusto enriba do seu escritorio. Un lugar perfecto para
practicar se hai algunha letra que lle fai rabiar .
Tamén nos enviou esta foto dun divertido boneco que fixo coa súa mamá. Mirade que chuliño lle quedou reciclando un tubo de papel hixiénico e empregando elementos da natureza. Un bonito modo de darlle a benvida ao outono. Grazas Noa por compartir connosco as túas imaxes.
Antes
da pandemia, cada semana adoitabamos cociñar cos rapaces na aula para
mergullalos no mundo culinario á vez que practicamos a lectoescritura. Dende o
ano pasado, como medida de prevención sanitaria, realizamos o obradoiro de
cociña dun xeito diferente. Cada semana traballamos cos meniños ao redor dunha receita que levan para casa. A fin de semana podedes
elaborala cos cativos e enviarnos as fotos ao correo da escola.
Como estamos en época de vendima, propoñemos comezar cociñando un ourizo de uvas. No seguinte vídeo que vimos na escola, tedes o proceso a seguir. A parte de pelar e cortar a pera deberá facela un adulto, pero os pequenos poden espichar as uvas e decorar o ourizo. Seguro que lles encanta.
Xa temos outra chica maior na aula. Hoxe María cumpre
catro anos. Parabéns María!!!
Hoxe, como cada principio de curso, os nenos levaron para casa un pequeno cartel co seu nome para colocar nun lugar visible. Cada ano o nome ten unha complexidade engadida para avanzar no coñecemento da lingua escrita, polo que debe de substituír ao anterior. Podedes colocalo na habitación, na porta do armario, na cociña, no baúl dos xoguetes … pero sempre ao alcance dos cativos. Se vos animades podedes enviarnos unha foto do sitio escollido por eles a escoladeleiro@gmail.com e publicaremos as imaxes no noso blog, seguro que aos cativos lle gusta velas.
Hoxe comezou a funcionar a biblioteca escolar recuperando
o empréstito de libros que estivo suspendido dende o inicio da pandemia. Cos
carnés que realizamos o venres pasado, cada meniño escolleu un libro a súa
elección. Van protexidos nunha bolsiña co nome e número de lector. Dentro levan
tamén unha nota coas normas de funcionamento. Esperamos que gocedes moito
compartindo estas lecturas cos vosos fillos. Se vos apetece podedes enviarnos
fotos deses momentos ao correo da escola e publicarémolas neste blog.
Aínda o verán no chegou a seu fin pero no xardín da escola xa empezan a facer a súa aparición os froitos de outono. O patio de recreo xa está cheo de landras coas que facemos carreiras de coches e inventamos numerosos xogos. Hoxe descubrimos ao pé do castiñeiro unha chea de ourizos e algunhas castañas. Entre todos, con coidadiño para non picarnos, apañamos as que atopamos. Despois repartímolas e levámolas para casa. Xa nos contaredes se estaban ricas e, se vos animades, podedes mandarnos fotos coméndoas ao correo da escola escoladeleiro@gmail.com.
A modiño os pequenos van aumentando o tempo de
permanencia na aula. Agora xa merendamos todos xuntos e, se todo segue
funcionando igual de ben, o xoves daremos por rematado o período de
adaptación.
Este curso os alumnos novos son maioría e os primeiros días
necesitan explorar o espazo e familiarizarse co novo entorno escolar. Paseniño
van descubrindo recantos e material diverso que no transcurso do ano académico
iran aprendendo a utilizar.
Mentres, as maiores da aula, van retomando as rutinas e coñecendo
aos seus novos compañeiros de xogos.
Como sucedeu o curso pasado, o inicio das clases vai vir
marcado polas recomendacións sanitarias. Dende a escola xa empezamos a
traballar para actualizar os protocolos
que acaban de publicarse e ter todo listo dende o primeiro día. Estámonos poñendo
en contacto con todas as familias por teléfono ou correo electrónico para
informarlles do que está a acontecer e aclarar dúbidas. Polo pronto lamentamos
comunicarlles que a reunión fixada para o vindeiro 9 de setembro non poderá
realizarse. Ese día comezarán as nenas de 5º de infantil (4 anos) en horario de
9:00 a 14:00 horas. Os novos alumnos de 4º infantil (3 anos) virán seguindo o calendario
da imaxe inferior:
