O MONTE, FONTE DE RECURSOS

Grazas a mamá de Noel e á Escola de Enxeñaría Forestal Universidade de Vigo, puidemos coñecer o traballo desenvolvido pola Comunidade de Montes Veciñais en Man Común de Baroña.

Vimos como utilizan parcelas do monte para cultivar froitos do bosque e cogomelos, pero tamén para a produción de mel e a cría de cabalos e ovellas. Ademais aprendemos como plantar e a importancia que teñen as árbores nos ecosistemas.

Tras recuperar forzas cuns saborosos bocatas, volvemos para casa cunha chea de agasallos. Grazas Xana!

DÍA DA PAZ

Onte, para conmemorar o Dia Escolar da Non Violencia e a Paz, Zapatocas propúxonos unha actividade baseada no mural “Construír” de Lidia Cao. Ao igual que as mulleres representadas na obra da artista, entre todos creamos unha construción que representa a paz. Cada alumno colocou con coidadiño unha peza co seu nome e a palabra que considera pode contribuír á non violencia. A paz, coma a nosa construción, precisa do esforzo de todos para conseguir o equilibrio.

DÍA DA ILUSTRACIÓN

Para conmemorar o Día da ilustración, onte levamos para casa unha guía de lectura que recompila os contiños que temos na biblioteca de Gómez. Paseniño na aula estamos lendo todos e facendo actividades ao seu redor.

A PANTASMA DAS BRAGAS ROTAS

Continuamos traballando ao redor dos libros ilustrados por Gómez. Nesta ocasión tócalle quenda a “A pantasma das bragas rotas”, un divertido conto cun final inesperado.

DÍA DA ILUSTRACIÓN

O vindeiro 30 de xaneiro conmemórase o Día da ilustración. Este ano dedicámolo a artista Gómez, autora das imaxes do libro Daniela Pirata. Estamos vendo e lendo moitos dos contos que ten ilustrado e realizando actividades ao seu redor. Comezamos a semana pasada coa divertida obra “Un dedo no nariz”

LIDIA CAO

A semana pasada, na nosa sesión semanal dedicada a traballar ao redor da prensa, coñecemos unha muller que ten un traballo moi especial. É muralista. Limos a noticia, vimos algunhas das súas obras e quedamos abraiados. Nos vindeiros meses seguiremos investigando ao redor desta artista galega.

FOTÓGRAFA

A palabra fotógrafa parece sinxela  pero para os nenos pequenos non é fácil de pronunciar. Descubrímolo na nosa sesión semanal dedicada á prensa. No xornal “La Voz de Galicia” limos unha noticia sobre unha fotografa de Vilagarcía que ten recibido varios premios polo seus traballos. A nova serviunos para, ademais de coñecer o seu labor, falar doutras profesións.

NAVEGANDO POLA NON VIOLENCIA

DÍA DA ELIMINACIÓN DA VIOLENCIA DE XÉNERO

O vindeiro día 25 conmemórase o Día Internacional da Eliminación da Violencia Contra as Mulleres. Para celebralo, na escola tivemos unha xornada de contacontos e obradoiros sobre igualdade.

A BRUXA E A SÚA CASA

 

Nesta ocasión recibimos as fotos dunha terrorífica bruxa cociñada pola nosa chef Antía. Para a elaboración dos pelos empregou un nutritivo plátano. Que medo!

E o noso bruxo Aarón animouse a preparar a casa da bruxa. 

Que bonita lle quedou!

A BRUXA SOFRONISA

Nunha das nosas visitas semanais á biblioteca escolar, descubrimos o conto “Daniela Pirata e a bruxa Sofronisa”. A partir da súa lectura comezamos a mergullarnos no fascinante mundo das meigas. 

 

As nosas cociñeiras Ana, Noa e Yaiza xa se puxeron en marcha e mirade que creacións máis divertidas nos mandaron. 

Na receita que traballamos en clase propoñiamos empregar tortiñas de arroz para facer a cara. As nosas chefs Noa e Ana optaron por empregar arepas. Un xeito de divertirse dobremente realizando a masa. 

Grazas familias por compartir as imaxes connosco! 

DANIELA PIRATA

Estes días o conto ao redor do que están a xirar parte das actividades que desenvolvemos na aula titúlase “Daniela pirata”. Este bonito álbum ilustrado ensínanos que todos podemos ser o que desexemos sen importar o noso xénero, pero tamén, que para ser capitán hai que ser xusto.