MAGOSTO 2023

Xa temos listos os nosos envases para levar mañá as nutritivas castañas que asaremos coa axuda das familias.

PREPARANDO O MAGOSTO

Con cartóns de leite baleiros, folios que non servían e uns debuxos de castañas, mirade que recipientes realizamos para gardar as castañas do magosto.

XOGANDO CON CAROZOS

Unha vez rematada a festa do Magosto, foron moitos os carozos que sobraron e quedaron na escola. Como outros anos, decidimos reutilizalos e empregalos  para un dos seus usos tradicionais e que actualmente estase a perder: o xogo. Con eles podemos facer torres, camiños, debuxos, letras …. Desenvolver as habilidades motoras probando a encestar, lanzar, recibir, manter en equilibrio …  Traballar as matemáticas contando, xuntando, comparando, quitando … Mellorar as habilidades sociais compartindo, colaborando, respectando as normas … Potenciar a  creatividade, a imaxinación, a fantasía … Por se todo isto non fora suficiente, é un xoguete ecolóxico, biodegradable, non pesa e ao caer non fai ruído nin rompe. Así que esta semana de recreos chuviosos os meniños xogaron cos carozos e construíron, compartiron, crearon, imaxinaron pero sobre todo se divertiron.

SAMAÍN E MAGOSTO 2019

Bruxas, vampiros, zombis, esqueletos, demos … o mércores a nosa escola quedou invadida polos máis terroríficos e divertidos seres. A pesar da choiva e o mal tempo, os meniños pasárono de medo cantando coa banda de musica, aprendendo a importancia de reciclar, reutilizar e reducir coa bruxa Hermelinda e a fada 3Rs, lendo contos de medo e gozando dunha arrepiante e deliciosa merendola. 

Moitas grazas a todas as familias que colaboraron traendo riquísimos e elaborados doces típicos destas datas e aportando cabazos decorados para a exposición. E noso especial agradecemento as que pasaron toda a mañá asando castañas a pesar da choiva e o fume.

XOGANDO CON CAROZOS

Hoxe, cos carozos que sobraron do Magosto que celebramos a semana pasada, estivemos aprendendo un dos xogos cos que enredaban os nosos avós cando eran pequenos. Tratase de facer unha torre o máis alta posible sen que caía ao chan poñendo cada neno un carozo por quendas.

 Tamén comprobamos que podemos facer nomes con eles e nos vindeiros días seguiremos experimentando e creando. Probade a xogar tamén vós na casa cos meniños, seguro que atopades un montón de usos creativos. Animádevos a mandarnos fotos e publicarémolas no blog para compartir ideas.

SAMAÍN 2018

Este ano os zombis foron os protagonistas na nosa festa do Samaín. Dirixidos pola mestra Olalla e ao ritmo da canción Thriller de Michael Jackson, deleitaron ao publico co seu terrorífico e divertido baile. 

Pero antes, tivemos unha mañá chea de actividades. Primeiro o Seprona explicounos como podemos axudar a coidar o medio ambiente. Despois, bailamos ao ritmo da banda de música e tocamos os seus instrumentos. Recuperamos forzas cunha merendola aterradoramente deliciosa que prepararon as familias dos nenos de cinco anos. Coa barriguiña chea recibimos á bruxa Montse, que coa axuda das mestras Olalla, Ana, Belén e Olalla, dramatizaron un arrepiante conto que nos encantou. Todo isto sen esquecer unha espectacular exposición de cabazas e un rico Magosto. Moitas grazas a todas as familias pola súa axuda e colaboración, e en especial ás que estiveron toda a mañá asando castañas a pesar da choiva e o frío.

PREPARÁNDONOS PARA O MAGOSTO

Cada curso, na festa do Samaín, realizamos un Magosto e levamos castañas asadas para casa. Este ano, en lugar do tradicional cartucho, imos utilizar envases de Tetra Brik que decoraremos nun obradoiro o día da celebración. Hoxe estivemos envolvéndoos en papel de periódico e facendo a primeira parte do traballo. Os que non o trouxeron aínda están a tempo.

XOGANDO CON CAROZOS

Esta semana os carozos que sobraron do Magosto do venres foron os protagonistas dos enredos de onte. Comezamos construíndo a torre do conto de Rampunzel e rematamos xogando a encestar para recollelos.

SAMAÍN 2016

¡Que susto levamos ao chegar e ver un enorme Frankenstein na nosa aula! Pronto descubrimos que se trataba do mestre Alejandro e comezamos cos xogos.

Despois decoramos cartuchos para meter as castañas do noso Magosto e poder levalas para casa. Mentres, no Local social estaban preparándose o mariñeiro Luís e os seus amigos para falarnos das propiedades dos peixes. Trouxeron gorras para todos, unha chega de pegatinas e outras cousiñas que vos entregaremos a vindeira semana. 

Case sen darnos conta chegou a hora de ver a exposición de cabazas e gozar da rica merendola preparada por las familias. Coas forzas recuperadas enfrontámonos co bebedizo da mestra Montse que disfrazada de bruxa fíxonos rir e tremer de medo. 

Cos seus feitizos acabamos todos convertidos en momias e bailando “La momia de colores” baixo as indicación da mestra Olalla. E para rematar, a Banda Municipal de Ribadumia deleitounos coa súa musica. Graciñas a todos os que fixeron posible a festa e en especial aos que asaron as castañas.

A NOSA FESTA NOS XORNAIS

O xoves pasado non podíamos deixar pasar a oportunidade de traballar o xornal sendo o noso colexio o protagonista da noticia. O Diario de Arousa do domingo 1 de novembro publicou fotos da nosa festa do Samaín e Magosto. A mestra Marta trouxo o periódico e na aula aproveitamos para ver as imaxes e facer actividades ao redor da crónica.

La Voz de Galicia no seu formato dixital tamén fixo referencia á nosa festa e editou o vídeo que vos deixamos a continuación.

SAMAÍN E MAGOSTO 2014

SAMAÍN E MAGOSTO 2013

Aínda que chegaron os primeiros fríos do outono, os Teru Teru Bozu que construiramos con tanto agarimo a semana pasada, realizaron ben o seu traballo. O sol saíu con forza, foi quentando a mañá e, as familias, aínda que afumadas, asaron castañas para todos.

Exposición de cabazas decoradas, xogos con carozos, cancións, películas, bailes, contacontos e marcapáxinas con dragóns como protagonistas e, por suposto, obradoiro de cornetes para levar castañas asadas para casa.

Coma sempre, con tanta actividade entrounos fame e nada mellor que unha rica merendola ao sol cunha chea de doces preparados polas familias: biscoitos, tortas, rosquillas, chulas de calacú, filloas… ata terroríficos dedos monstruosos. Pero o mellor quedou para o final, a actuación do Mago Noel deixou abraiados aos pequenos e espertou a risa nos maiores. Graciñas a todos pola vosa colaboración e axuda. E os que desexen ver todas as fotos, poden visitar a galería do blogue do colexio, a súa páxina web ou clicar directamente aquí.

PSICOMOTRICIDADE CON CAROZOS

Na aldea, despois da esfollada, é doado conseguir unha presa de carozos. Xa viramos que podemos transformalos en xoguetes, pero a semana pasada empregámolos tamén para facer psicomotricidade e desenvolver a nosa coordinación.

Divertímonos comprobando que podemos facelos rodar coma unha pelota co pé ou man. Lanzalos ao aire e recollelos antes de que nos caian ao chan resultounos máis complicado. Pero o gran día do carozo tivémolo o martes, cando a mamá de Aaron tróuxonos un saco deles para facer a brasa do Magosto. Non deixamos pasar a ocasión e fixemos torres, o noso nome, debuxos, camiños… ata xogamos a encestar cando chegou a hora de recoller.

SAMAÍN E MAGOSTO 2012

¡Que frío facía o mércores cando chegamos á escola coas nosas cabazas!... Pero cos xogos de pelotas e as carreiras de vasoiras logo entramos en calor. Despois, xa quentiños, no aula de informática vimos uns divertidos debuxos do monstro do lago Ness e, na biblioteca, as últimas novidades en contos de medo. Entre risas e sobresaltos, escoitamos caladiños as historias. Como o noso monstro favorito é o das galletas, fixemos un marcapáxinas del. Decoramos un cucurucho para meter as castañas asadas e aprendemos a debuxar morcegos. Con tantas emocións a fame espertou. A pesar de que as predicións anunciaban chuvascos, o sol acompañounos á hora da merenda e biscoitos de noces, tortas de castañas, chulas de calacú… foron desaparecendo dos pratos como por arte de maxia. Coa barriguiña ben chea xogamos no patio todos xuntos e non fixeron falta nin os abrigos.
Pero o mellor veu ao final coa actuación do mago Noel. Abraiounos cos seus trucos, sorprendeunos con xogos malabares de luces de cores, fíxonos rir coas súas bromas…
todos queríamos saber o mesmo: ¿como o fai?... sen darnos conta chegou á hora de marchar e como non podían faltar as castañas, levamos os nosos cucuruchos cheos delas para casa. Graciñas a todas as familias pola súa colaboración e por axudarnos a facer deste, un día especial.