TESOUROS DE OUTONO

 

Follas de diferentes tamaños, formas e cores, landras, castañas,  paus ... con todos estes tesouros que cada día atopamos á hora do recreo, os meniños crean, inventan, experimentan, xogan e, sobre todo, deixan voar a súa imaxinación. O feito de que a nosa escola estea inmersa en plena natureza, permítenos aproveitar e gozar destes tesouros que o outono nos ofrece.

PAMPULLOS

Esta semana a primavera tróuxonos un bonito agasallo. Á volta das vacacións de Pascua, atopamos o xardín do parque da escola cuberto de pampullos. Non puidemos resistirnos á tentación de apañalos e elaborar pulseiras de flores.

AS CLASES AO SOL

 

Seguindo as recomendacións sanitarias, aproveitamos o bo tempo dos últimos días para trasladar as actividades escolares ao exterior. Como somos pouquiños, en canto o sol comeza a quentar, sacamos as mesas e as cadeiras e … ¡a traballar ao aire libre!.

ANDANDO E MOITO MÁIS

Agora que xa levamos máis dunha semana de andaina diaria e os pequenos saben máis ou menos camiñar en fila, comezamos a integrar a observación da contorna e os xogos nos nosos percorridos. Gardar o equilibrio para evitar caer a un imaxinario río cheo de crocodilos, enredar coa alfombra de follas que o outono deixou no xardín, descubrir as primeiras setas que empezan a saír … son algúns dos múltiples estímulos que cada mañá atopamos.

AS ESCOLAS DA MILLA

O sedentarismo converteuse nunha ameaza para os meniños que pasan máis horas sentados fronte á televisión e o ordenador que xogando ou realizando actividades ao aire libre. Para combatelo, o programa escolar “Las escuelas de la milla” anima a todos os colexios a axudar aos nenos a percorrer unha milla diaria cos seus compañeiros de clase. Ao igual que o curso pasado, na nosa escola decidimos participar adaptando o reto ás idades dos nosos alumnos. Se a climatoloxía o permite, cada día camiñaremos ao redor do centro ata acadar o quilómetro diario. Deste xeito, ademais de adquirir hábitos saudables e outros beneficios, estaremos en forma se a final de curso decidimos volver a facer un anaquiño do Camiño de Santiago como o ano pasado.

Comezamos hoxe facendo un percorrido pequeniño pero traballando aspectos importantes como saber ir en fila, seguir o camiño marcado, no empuxar, adaptar o ritmo da marcha aos máis pequenos, esperar polos demais … 

COÑECENDO O AULA DE NATUREZA

Onte a mestra Ana veu a explicarlle aos meniños como vai ser o traballo que van realizar na aula de natureza durante o curso. Ensinounos as ferramentas e utensilios, falounos das medidas de protección, presentounos as súas mascotas e incluso mostrounos unha chea de sementes para que apreciaramos o diferente que poden chegar a ser. Para rematar contounos a bonita historia de “O carballo con botas” que ten unha semente moi especial como protagonista: a landra.

E falando de landras, mirade na foto que boneco máis xeitoso fixo con elas Laura e a súa mamá. Estes días o patio de recreo está cheo destes froitos secos e aos cativos encántalles xogar con eles. Neste enlace tedes varias ideas por se vos apetece a fin de semana axudar aos vosos fillos a levalas á práctica. 

ADAPTÁNDOSE Á ESCOLA NO RECREO

Xogar ao pilla e á roda, facer castelos de area, tirarase pola randeeira, abanearse no bambán e na moto, enredar coas follas e as pedriñas, pasear a carretilla … nada mellor que o patio de recreo para experimentar, relacionarse, crear vínculos afectivos e, sobre todo, axudar aos máis pequenos a integrarse nas rutinas da escola de xeito gradual.

UN RECREO ESPECIAL

Hoxe, á hora do recreo, o vento toleirón sopraba con forza. Cando fomos buscar a mangueira para regar e evitar que o aire levantara a area e entrara nos ollos, descubrimos que xunto ao invernadoiro a herba estaba cortadiña e a temperatura era ideal. Inmediatamente decidimos cambiar o noso campo de xogo para esa zona. Ao principio, os pequenos estaban descolocados no novo espazo pero, tras uns minutos de adaptación, mirade nas fotos que ben o pasaron enredando na herba.

O VENRES AO SOL…

Que ben o pasamos hoxe xogando no patio de recreo. Despois de toda a semana sen poder subir ao tobogán polas pozas creadas pola choiva, está mañá gozamos do lindo con este agasallo de bo tempo que nos fixo o outono. Enredabamos tan felices todos xuntos, que a mestra non puido resistir a tentación de quitarnos estas fotos.

RECREOS CHUVIOSOS

Aínda non chegou o outono pero non para de chover. Levamos varios días sen poder saír ao patio do recreo e xa está inundado con tanta auga. Pero non por iso deixamos de xogar libremente despois da merendar. Hoxe probamos a facer carreiras cos cabalos de goma espuma, casiñas cos túneles, equilibrios cos zancos, lanzamentos coas pelotas de tea… aínda que preferimos xogar ao aire libre, dentro da escola tamén o pasamos ben enredando cos amigos.

O NOSO PRIMEIRO DÍA DE ESCOLA

Estivemos cos amigos, xogamos, cantamos, debuxamos, escribimos, merendamos, enredamos coa area nova que botaron no patio de recreo, brincamos no parque, montamos no tobogán, limos o conto “As sete cabuxas e o lobo” … tivemos unha mañá do máis completa. Pero sobre todo, portámonos como auténticos chicos maiores, incluso os máis pequerrechiños que viñan á escola por primeira vez.

NOS DÍAS DE CHOIVA… VISITA AO SALÓN DE PEITEADO

Volven os días de choiva e non podemos saír ao patio de recreo, pero si xogar nos diferentes recunchos da aula. Unha boa opción é aproveitar o mal tempo para lavar, peitear e amañar os cabelos no salón de peiteado que temos no recanto dos disfraces. Mergullados no seu xogo simbólico, os cativos deixasen acicalar cunha paciencia admirable.

¿DAMOS UN PASEO EN MOTO?

Nun día tan fermoso e cálido como o de hoxe, a hora do recreo sabe a pouco. Enredar coa area, lanzarse polo tobogán, xogar ao pilla, charlar cos amigos ao sol ou un emocionante paseo en moto…  ¡Como agradecemos este pequeno adianto da primavera!.

¡SAÍU O SOL!

Despois de tantos días de choiva, vento, temporal e incluso “cicloxénise explosiva”, hoxe, por fin, puidemos gozar dun recreo no patio. Primeiro tivemos que arranxar os buratos que deixaran as pozas da auga e secar os tobogáns, pero despois brincamos felices. Fixo tan bo tempo que ata foron necesarias as viseiras. Unha mágoa que as previsións para mañá volvan a dar choiva.