martes, 29 de octubre de 2013

CARPAS, TAMÉN PARA SUMAR

Aproveitando que as carpas que nos trouxo a mestra Ana espertaron o noso interese, decidimos empregalas para a suma. Descubrimos que con elas é moi doado. Primeiro imaxinamos que dous pratiños da cociniña eran estanques, introducimos varios peixes en cada un, puxemos o símbolo de sumar no medio e contamos.
Agora xa non necesitamos pratiños, os estanques son as nosas mans, os dedos que levantamos en cada unha as carpas, para sumar xútanmos as mans e contamos co nariz. Se queredes,clicando na imaxe inferior, podedes practicar sumas faciliñas, e se vos resultan demasiado doadas, cambiades o nivel de dificultade á dereita da pantalla.

E para todos aqueles que desexen coñecer as nosas carpas, pódense achegar ao estanque do xardín da escola, esta mañá, xunto cos nenos de Ribadumia,  botámolas dentro. Esperamos que se aclimaten ben ao seu novo hábitat pero sobre todo que nos axudedes a evitar que as molesten.

lunes, 28 de octubre de 2013

DÍA DA BIBLIOTECA

Co obxectivo de sensibilizar á sociedade sobre a importancia da biblioteca escolar como recurso fundamental no proceso de aprendizaxe, celébrase en outubro o mes da biblioteca.
Hoxe, na nosa visita semanal as súas dependencias, celebrámolo vendo o video-conto realizado polo CEIP Curros Enríquez de Celanova e que vos deixamos a continuación. Nel vimos que cada Bolecha ten unhas preferencias respecto aos libros que lles gustan e aproveitamos para expresar cales son as nosas: de princesas, bruxas, demos, dragóns, dinosaurios…


sábado, 26 de octubre de 2013

DRAGÓN, ¿ESTÁS AÍ…?

O vindeiro mércores día 30 celebraremos a festa do Samaín que este ano terá como tema central os dragóns. Temos previstos realizar diversos xogos que empezamos a practicar esta semana. Un dos nosos favoritos é “Dragón, ¿estás aí?", a nosa propia versión da canción “Jugando al escondite” de Rosa León, na que cada curso substituímos ao lobo por un personaxe relacionado co medo, este ano tócalle aos ¡¡DRAGOOOOONS!!... 



Por se vos animades a xogar en familia, aquí vos deixamos o vídeo coa canción…

viernes, 25 de octubre de 2013

TERU TERU BOZU

Teru Teru Bozu é un boneco tradicional xaponés, feito con papel branco que se colga nas ventás nos días de choiva. É unha especie de amuleto que se emprega para atraer o bo tempo nos eventos importantes. Como nós queremos que deixe de chover para poder saír ao patio e, sobre todo, para facer o Magosto a vindeira semana sen mollarnos, onte realizamos Teru Teru Bozu para todos. Neste enlace tedes o simpático vídeo que vimos á mañá para aprender a elaboralo. Tamén comezamos a memorizar a canción que leva asociada e que vos deixamos a continuación.

Se polo contrario desexamos atraer a choiva, hai que colgalos de xeito invertido. No seguinte enlace  tedes unha animación onde dous irmáns teñen desexos opostos e os seus Teru Teru Bozu comezan unha danza para loitar polo sol e a choiva respectivamente. Animádevos a construír os vosos Teru Teru Bozu e  personificalos, se mandades as fotos ao noso correo escoladeleiro@gmail.com  publicarémolas no blogue.

martes, 22 de octubre de 2013

OS DRAGÓNS NA BIBLIOTECA

Xa sabemos que na nosa biblioteca escolar temos unha chea de contos de dragóns, pero se desexamos atopar os que queremos, temos que aprender tamén onde e como buscalos. Na zona de literatura infantil, os libros están organizados por editoriais.
Este luns estivemos analizando como eran os anagramas de cada unha delas e localizándoos na portada, contraportada ou nos lombos dos contos. Despois buscamos os símbolos das editoriais nos andeis e descubrimos onde ten que estar colocado cada conto. Cando rematemos de traballar cos libros de dragón, xa sabemos onde temos que coller os nosos favoritos para levalos en préstamo a casa.



domingo, 20 de octubre de 2013

CARPAS… ¡PARA COCIÑAR!

Tras dúas semanas a voltas coas carpas koi, non podíamos resistir a tentación de intentar facelas no obradoiro de cociña, e aquí está o resultado.

sábado, 19 de octubre de 2013

KOINOBORI

Félix, na súa carta, falaba de que Sakura e a súa avoa estaban a facer carpas de papel. Esta semana soubemos que se trataba de Koinobori, bandeiras tradicionais xaponesas coas que se decoran edificios e casas o día do nenoSon izadas co desexo de que os rapaces medren fortes e con boa saúde.  A carpa máis grande, de cor negra, representa o pai; a seguinte, de cor vermella, á nai; e as restantes aos fillos. Na nosa aula tamén fixemos os nosos particulares koinobori cos membros da nosa familia e escoitamos a canción popular que adoitan cantar os nenos.


jueves, 17 de octubre de 2013

NA HORA DE LER: CONTOS DE DRAGÓNS

Dende que a semana pasada coñeceramos a lenda xaponesa da carpa que se converteu en dragón,  decidimos dedicar a hora de ler aos contos de dragóns. O nacemento do dragón, El tesoro perdido de la cueva del dragón, Dragones, La leyenda de SanJorge, Os dragóns do arco da vella, El dragón Danilo… na nosa biblioteca escolar temos contos de dragóns para todos os gustos.
Hainos malos e bos, que dan medo ou fan rir, que viven en países afastados ou preto das aldeas … Estamos aumentando o noso vocabulario con palabras relacionadas co tema, aprendendo a debuxar dragóns, a recoñecelos... pero sobre todo, a perderlles o medo e a divertirnos con eles. O que resta de mes ímolo dedicar aos libros de dragóns, se na casa tedes material relacionado co tema podedes traelo a escola e aprenderemos todos xuntos.

martes, 15 de octubre de 2013

OS XOGOS DE RODA PASAN AOS MARTES

Nos dous últimos anos, dedicabamos a última hora dos venres aos xogos populares. Este curso, entre as clases de música e o obradoiro de cociña,  ese día da semana xa temos actividades dabondo. A partir de agora será ao final da mañá dos martes cando lembremos todos eses xogos nos que é tan rica a nosa tradición oral. Hoxe, ademais de “A la rueda, rueda…”, intentamos ensinar aos máis pequenos as normas de “Guante, guante”; se na casa tamén queredes practicar, neste enlace, tedes unha versión parecida á que nós cantamos.


lunes, 14 de octubre de 2013

XAPÓN NA BIBLIOTECA

Para seguir aprendendo cousiñas do país nipón, temos que saber tamén onde están os libros que falan dese lugar. Hoxe, na nosa visita semanal á biblioteca, aproveitamos para ver o estante onde están colocados. Comprobamos que todos tiñan unha pegatina branca e o número 9. Como xa sabedes, na zona documental da nosa biblioteca, os fondos clasifícanse polas materias que tratan segundo a clasificación decimal universal (CDU).
 
 
 

viernes, 11 de octubre de 2013

A BANDEIRA DE XAPÓN

Grazas a Félix, comezamos a coñecer algunhas cousiñas do país nipón. Unha delas é a súa bandeira. Fai días que viramos cales eran as súas cores e o círculo que a caracteriza. É tan sinxela que non dubidamos en facela no obradoiro de cociña deste venres. Cun queixiño, rebandas de pan de molde e chourizo, realizamos o noso peculiar despregue de bandeiras gastronómicas.

jueves, 10 de octubre de 2013

A CARPA QUE SE CONVERTEU EN DRAGÓN

Conta unha lenda xaponesa que, toda carpa que consiga nadar río arriba e saltar a fervenza da porta do dragón, será recompesada e convertida neste ser mitolóxico. Varios peixes intentarono pero soamente a carpa Koi o conseguiu. É por isto que a carpa Koi é considerada como símbolo da perseveranza ante a adversidade. A partir desta bonita historia, na aula comezamos a ver como son os dragóns xaponeses. Descubrimos que teñen corpo de serpe, cabeza de crocodilo, cornos de cervo, melena de león, poutas de aguia e bigotes de carpa; pero a diferenza dos occidentais, carecen de alas para voar.

miércoles, 9 de octubre de 2013

O NOSO ESTANQUE

Xa sabemos que o pobre Félix caeu nun estanque cando os globos baixaron de súpeto en Xapón, por sorte Sakura e a súa avoa estaban preto de alí e axudárono a saír. No xardín da nosa escola tamén temos un, pero durante o verán secou e botáronlle pedras e lixo.
O luns estivemos a limpalo e enchémolo de auga.
O noso non é tan bonito como os xaponeses pero imos intentar que se pareza.
A mestra Ana tróuxonos carpas para botalas dentro cando rematemos de observalas, e a profe Ángeles plantas acuáticas para que os peixes teñan onde agocharse. Xa vos contaremos que tal lles vai no seu novo hábitat.