miércoles, 30 de septiembre de 2020

ANDAINAS

Como en anos anteriores, para evitar o sedentarismo e adquirir hábitos saudables, cada día saímos a camiñar pola contorna escolar. Facemos un percorrido de aproximadamente un quilometro que aumentamos ou diminuímos dependendo do cansazo dos nenos e a climatoloxía. Con estas andainas, ademais de previr a obesidade infantil,  aproveitamos para observar a natureza e descubrir os pequenos tesouros que nos ofrece.

lunes, 28 de septiembre de 2020

QUEN LLE TEN MEDO AS ARAÑAS?...

Hoxe, cando chegamos á biblioteca, Zapatocas, tíñanos preparada unha inesperada sorpresa: un recuncho sobre arañas. Primeiro quedamos un chisco abraiados. Despois coa lectura do conto “Eu non fun”, que a nosa mascota nos deu, vimos porque son tan necesarias.

Para os que non o coñezan, a continuación vos deixamos un vídeo doo conto realizado pola Escola infantil Forcarei

A VOLTAS COA CEBRA CAMILA


Fai uns días limos o conto de A cebra Camila e as súas bágoas servíronnos para traballar a numeración. O venres tocoulle quenda aos amiguiños que a socorren: a serpe, o caracol, a oca, a chicharra … Son moitos os animais que nos axudan cada día en diferentes situacións. Este curso imos dedicalo traballar ao redor destes seres no sentido máis amplo da palabra: animais domésticos, salvaxes, en perigo de extinción... Xa vos contaremos.

jueves, 24 de septiembre de 2020

PIZZA DE SANDIA

Este curso, como medida de prevención e hixiene fronte ao COVID-19, a sesión semanal que dedicabamos a cociñar en clase non poderemos realizala.  Pero propoñémosvos continuar mergullando aos meniños no mundo culinario dun xeito diferente. Cada semana na aula traballaremos ao redor dunha  receita que levarán para casa. A fin de semana podedes elaborala cos cativos e enviarnos as fotos ao correo da escola.


Comezamos hoxe vendo como cociñar unha rica pizza de sandía e os meniños escribiron a receita que vos deixamos a continuación. 



 No encerado dixital observamos vídeos de como preparala con diferentes versións.  Falamos dos ingredientes que levaban, tentamos adiviñar os seus nomes, expresamos as nosas preferencias e buscamos información sobre as froitas que non coñecíamos. Agora soamente nos queda degustala. Xa nos contaredes nos comentarios que tal vos sae e non esquezades mandar as fotos a escoladeleiro@gmail.com e publicaremolas no blog.



miércoles, 23 de septiembre de 2020

ZAPATOCAS


Rematado o período de adaptación dos novos alumnos, esta semana comezamos coas actividades do centro e as clases cos especialistas. O luns estivemos con Zapatocas, a mascota da biblioteca. Ensinounos como escribir o seu nome e deunos a coñecer as novas normas de funcionamento e hixiene. Ela tamén anda con máscara para protexerse do virus. Este curso non poderemos levar contos para casa, nin manipular libremente os fondos, 
pero gozaremos igual da lectura realizando outro tipo de actividades.

martes, 22 de septiembre de 2020

¡FELICIDADES MARÍA!

 

Hoxe celebramos o primeiro aniversario do curso. Este ano debido aos protocolos sanitarios non podemos facer a nosa tradicional torta de chocolate. Por agora toca celebralo dun xeito diferente pero tamén divertido. Non puidemos cociñar pero si cantar e facer xogos coa homenaxeada como protagonista. ¡¡Parabéns María!!

domingo, 20 de septiembre de 2020

A CEBRA CAMILA



Esta semana limos e comezamos a traballar ao redor do conto A cebra Camilia. Ademais de gozar coa súa lectura, as bágoas da protagonista servíronnos de detonante para traballar a serie numérica, as grafías dos números e as cantidades.

Para que na casa tamén poidades coñecer este fermoso relato, a continuación vos deixamos a versión realizada polo CEIP Coiron Dena.

viernes, 18 de septiembre de 2020

COS NOMES PARA CASA


 Como todos os anos, o nome propio é o primeiro tipo de texto ao redor do que estamos a traballar. Ademais de servir para identificar as nosas cousas, o nome propio axuda aos máis pequenos a descubrir a linguaxe escrita. Por este motivo, hoxe todos levaron para casa un cartel con el en grao de complexidade crecente dependendo da súa idade.

Axudade ao voso fillo a colocalo nun lugar visible (na porta da habitación ou armario, na neveira da cociña, no seu escritorio …)  para que dispoña dun modelo para reproducilo e poder avanzar na aprendizaxe da linguaxe escrita. Se vos animades, enviarnos unha foto do sitio escollido escoladeleiro@gmail.com e publicaremos as imaxes no noso blog, seguro que aos cativos lle gusta velas.

jueves, 17 de septiembre de 2020

O CASTIÑEIRO DA ESCOLA


O verán vai chegando ao seu fin e o castiñeiro da escola empeza a darnos os seus froitos. Grazas a el, hoxe os pequenos descubriron de onde saen os ourizos, que teñen no seu interior e como conseguir sacar as castañas sen picarse. Entre todos apañamos unha chea delas.



En clase separamos algunhas que tiñan buratiños e realizamos un novo descubrimento: as eirugas do seu interior. Vimos como se desprazaban estes animaliños e os danos que ocasionaban no froito. Despois chegou o momento de repartilas e aproveitamos para contar e traballar a serie numérica e a estabilidade no reconto.

O FELPUDO DESINFECTANTE

Son moitas as medidas de seguridade que estamos tomando na escola para extremar a limpeza e a protección contra o virus. Desinfectar os zapatos antes de entrar á escola é unha delas. Onte realizamos varias actividades para aprender a empregar correctamente o felpudo desinfectante e normalizar o seu uso.


martes, 15 de septiembre de 2020

AS NOSAS NOVAS AMIGAS

Co inicio de curso, tamén chegan os nomes das novas compañeiras. Estes días estámolos a empregar para traballar o trazo das letras minúsculas á vez que os meniños avanzan no coñecemento da lingua escrita.


lunes, 14 de septiembre de 2020

PREPARADOS… LISTOS… XA!

Este curso a volta á escola veu cargada de normas. O uso da máscara, a distancia de seguridade, os estoxos individuais para non compartir o material, a clase cambiada para tentar obter o máximo distanciamento entre os alumnos … Pero a pesar de tantas regras, os meniños están interiorizando rapidamente os protocolos e cúmprennos mellor que moitos adultos.

Hoxe a ANPA do colexio repartiu entre todo os nenos unha máscara que levaron para casa. A continuación déixovos a imaxe da etiqueta correspondente.

jueves, 10 de septiembre de 2020

COMEZAMOS…

 


Como xa sabedes, para adaptarnos aos novos protocolos sanitarios, estamos realizando unha volta ao cole gradual. Hoxe tocoulle quenda ás novas alumnas de tres anos que se comportaron coma auténticas chicas maiores. Empezaron coñecendo algúns dos espazos da aula, pero tamén as medidas de protección contra o contaxio. Se queredes practicar na casa como lavar correctamente as mans, a continuación déixovos a canción de Nati e Chema que estamos aprendendo na aula.

martes, 1 de septiembre de 2020

BENVIDOS AO CURSO 2020/21

Este ano o inicio das clases vai vir marcado polas recomendacións sanitarias e será moi diferente ao dos anos anteriores. Dende a escola estamos traballando para cumprir cos protocolos que acaban de publicarse e ter todo listo dende o primeiro momento nun entorno seguro. Nos vindeiros días poñerémonos en contacto con todas as familias por teléfono ou correo electrónico para informarvos do que está a acontecer e aclarar dúbidas. Polo pronto lamentamos comunicarvos que a reunión fixada para o vindeiro 10 de setembro non poderá realizarse. As instrucións publicadas pola Consellería establecen un comezo  gradual como recolle a seguinte resolución: http://www.edu.xunta.gal/portal/sites/web/files/resolucion_incorporacion_gradual.pdf. Na nosa escola isto tradúcese en que o xoves día 10 soamente se incorporaran o nenos de 5º de infantil (4 anos). Os nenos de 6º de infantil (5 anos) comezarán o venres día 11. Os novos alumnos de 4º infantil (3 anos) virán seguindo o seguinte calendario: