Hoxe,
día mundial da
poesía, quixemos conmemorala comezando un poema que terá dezanove rimas,
tantas coma nenos somos en clase. Imitando a Ana Mª Fernández e os seus versos
“Polas rúas”, estamos a
inventar outros empregando os nomes propios dos nenos e o transporte que elixen
no caderno “máquinas
para viaxar” que anda a visitar os fogares dos cativos. 
Comezamos co tren, buscamos
na biblioteca os libros que temos relacionados co tema e aproveitamos para
aprender cousas relacionadas con el. A primeira protagonista é Mencía, pero nas
vindeiras semanas iremos engadindo nesta mesma entrada o resto das nosas
creacións, esperamos que vos guste viaxar con nós polas rúas de…
Como
funciona un muíño, que son os petróglifos, quen vivía no Monte do Castro hai moitos
anos… todo isto e máis poderemos aprender da man dos Bolechas co libriño que
hoxe levamos para casa. Foi un agasallo que trouxo esta mañá a Alcaldesa de
Ribadumia para todos os nenos da escola, nós, a cambio, ensinámoslle a dar
bicos de bolboreta e de spray. Se o coidades, no seguinte trimestre traerédelo
de novo á escola e empregarémolo para seguir desenvolvendo o proxecto do millo que
empezamos en outono.
Iso
foi o que cociñamos o venres no noso obradoiro de cociña. Despois de tantos
días a voltas cos contos dos Irmáns Grimm, non podíamos deixar pasar a
oportunidade de crear o atractivo principal da historia de “Hansel e Gretel”. Paredes de pan de molde con crema de cacao,
porta de galleta con chocolate branco e ventás de obleas de coco e vainilla… 
O
éxito da receita estaba asegurado. Primeiro transformamos en triángulo unha das
rebandas pan. Xuntámola coa outra e démoslle
forma de casiña. Con coidadiño para non romper o pan, fomos untando a crema. A mañá
estaba fría, moi fría, pero a primeira hora puxemos a crema de cacao xunto ao
radiador para que abrandara e poder estendela con facilidade. Colocamos as galletas
para a porta e as fiestras. 
Un lacasito
para o faiado e, co resto do pan, construímos
a cheminea. Despois cada quen empezou comendo o que máis lle gustaba: a porta,
o tellado, as ventás… O mellor era que podíamos probar o que quixeramos porque
na nosa casiña non había bruxa.
Este
é o título do libro onde atopamos a adiviña que eliximos para o mes de outubro.
Por agora seguimos coas relacionadas cos contos dos Irmáns Grimm. Esta obra
ofrécenos a oportunidade de poñer a proba o que sabemos dos personaxes dos
relatos clásicos a través de adiviñanzas, con pistas claras para que todos as
poidamos acertar. Seguro que xa sabedes a solución … ¿Quen se anima a enviar un novo
comentario coa resposta ao mes de outubro?.
Ás
veces vense voar pola aula, ou pousadas nalgún sitio, pero sobre todo están na
bolsa onde gardamos as espigas
do millo que trouxemos no outono. A nós gústannos porque nos lembran o poema de
Xosé Mª Álvarez Blázquez, non pican, nin nos fan mal. Pero agora
descubrimos que, xunto co gurgullo, son grandes inimigas do gran. 
Furaron case
todos os que tiñamos, estragando algunhas espigas por completo. 
No seguinte
trimestre investigaremos sobre estas pragas e as súas consecuencias. Hoxe
servíronnos de escusa para contar e sumar. Algúns xa estaban familiarizados con
esta operación matemática pero para outros foi unha divertida novidade.
É
tempo de amorodos. Con nata, en torta, con zume de laranxa, en macedonia… Son
múltiples as posibilidades que ofrece este froito. 
No noso obradoiro de cociña
non podiamos deixar pasar a oportunidade e o venres preparamos un nutritivo
batido. Agás o momento de empregar o batedor, é unha receita que poden facer os
cativos con bastante autonomía. Animádevos a probar...
Este é o tema do caderno viaxeiro que xa comezou a
visitar os fogares dos cativos da nosa aula. Como sabedes este ano o Salón do
Libro Infantil e Xuvenil de Pontevedra está dedicado ás máquinas.
Na nosa escola, tamén imos traballar ao redor deste tema con diferentes
propostas. “Maquinas para viaxar” é unha delas. Cada neno, coa axuda da súa
familia, escollerá unha máquina na que lle gustaría viaxar, cunha única
condición: non se poden repetir as que xa estean escollidas. Posteriormente en
clase traballaremos ao redor do medio de transporte elixido. Se o desexan,
tamén poden traer información ao respecto para contar aos compañeiros o que descubriron. Por agora sabemos que...
Hoxe
comeza a semana da prensa na escola. Nestes días os xornais cobran unha
especial relevancia nos centros educativos. Esta mañá, na biblioteca, optamos por
ver a revista que adoita acompañar ao periódico dominical, en concreto a do día
10 de febreiro de La Voz de Galicia. 
Nela atopamos unha ilustración moi especial: ¡Un sofá bico!. Descubrimos
que realmente chámase sofá labios e foi deseñado por Salvador
Dalí con Óscar Tusquets. Buscamos algúns dos libros que temos deste artista e
atopamos outra obra que tamén chamou poderosamente a nosa atención: un teléfono
bogavante. Nas vindeiras semanas seguiremos coñecendo a vida e obra deste
famoso pintor.
¡Como
medran as verduras que plantamos
e coidamos coa mestra Ana!... No que vai de curso, xa foron varios os
afortunados que levaron para casa grelos. Con cada produto da horta,
a profe Ana vai facendo sorteos
para que, no transcurso do ano académico, todos os nenos do colexio poidan probalos. A última colleita foi de leitugas. Ana pensou que o mellor xeito de que houbera
para todos era cociñar na escola un rolo
vexetal. A semana pasada tocoulle a nosa clase elaboralo. No blogue de natureza xa está
colgada a entrada coa receita, podedes visitalo clicando aquí
ou ver as fotos na galería
da web do centro.
O
noso calendario escolar do vindeiro curso xa está en proceso de elaboración. Este
ano ímolo dedicar ás adiviñas. Como andamos a voltas cos Irmáns Grimm,
comezamos co libro “El país de las adivinanzas”. Nel
hai que descubrir obxectos ou personaxes relacionados cos contos
clásicos.
Para agochar a resposta, colocamos unha portiña… Nas vindeiras
semanas iremos completando o noso particular almanaque do curso 2013 / 2014. Con
cada mes traballaremos un libro de adiviñas e animámosvos a resolver a que
elixamos. Para empezar… ¿quen nos envía un comentario coa solución á do mes de
setembro?...
Como
podedes ver na imaxe do cartel anunciador, un circo instalouse no centro de
Mosterio para realizar varias funcións esta fin de semana. Unha oportunidade
para ver preto da casa un espectáculo que case sempre esperta o interese dos pequenos.
