REMATAMOS O NOSO CALENDARIO DE VELÁZQUEZ

A semana pasada completamos o mes de xullo cun “Autorretrato” do artista e onte, o de agosto, coa obra “Adoración dos Reis Magos”. Coma sempre buscamos nos diferentes libros cada cadro pero non sempre hai imaxes deles en todos os exemplares. O que gusta máis aos nenos é recoñecer nas ilustracións as obras que xa traballamos e lembrar o seus títulos. Pero o feito de atoparnos co rei Baltasar nunha pintura de Velázquez deunos moito do que falar.

A RAÍÑA DONA MARIANA DE AUSTRIA

Dende que vimos o cadro de “As Meninas” e varios contos que teñen á infanta Magarita como protagonista, este personaxe histórico gustou á maioría dos cativos. En diferentes obras de Velázquez recoñecimos ao seu pai o rei Felipe IV e ao seu medio irmá o príncipe Baltasar Carlos. Faltábanos a súa mamá, a raíña dona Mariana de Austria, pintura que eliximos para ilustrar o mes de xuño no calendario escolar que estamos elaborando. Son varios os libros que temos onde aparece recollida esta obra e o luns na nosa visita á biblioteca escolar estivemos buscándoa en todos. Pero, sen lugar a dúbidas, o exemplar que Mencía compartiu connosco foi onde a puidemos observar con  máis detalle.

AS LANZAS

“La infantita quiere buñuelos” é o título dun dos libros que a biblioteca municipal de Meis cedeunos en préstamo temporal mentres esteamos a traballar ao redor da figura de Velázquez. Escollémolo para ilustrar o mes de maio do noso calendario escolar do autor. Nel cóntanos unha trasnada argallada pola infanta Margarita e Nicolasito, o anano representado no cadro As Meninas que anda a molestar ao can. A trama comeza cando a princesa quere tomar o chocolate con buñuelos destinado a súa media irmá e as damas. Pero non pode … o seu pai, o rei Felipe IV, ten que recortar os gastos da corte para facer fronte ás débedas da guerra e á mala xestión. Unha delas quedou inmortalizada na obra  “A rendición de Breda, ou As lanzas” de Velázquez que eliximos para o mes de maio. Entre realidade e fantasía, gozamos da lectura deste divertido libro á vez que coñecemos algúns dato da época do pintor.

FELIPE IV A CABALO

O noso calendario escolar de Velázquez continua avanzando. A semana pasada chegamos ao mes de abril e foron “Las Tres Mellizas” as encargadas de achegarnos o cadro “Felipe IV a cabalo”.

Aínda que tamén observamos a obra en detalle accedendo á galería on line do Museo do Prado e, por suposto, nos libros que temos na escola, o que máis gustou aos cativos foi ver a Velázquez pintándoa na animación do vídeo que vos deixamos a continuación.

A FRAGUA DE VULCANO

A semana pasada, cando limos o conto “Colás y su amigo Velázquez” vimos nas súas páxinas moitos dos cadros que xa coñecemos deste gran pintor español. De todas elas escollemos a obra “A fragua de Vulcano” para ilustrar o mes de marzo no noso calendario escolar de Velázquez. 

Pero, sen lugar a dúbidas, o que máis gustou aos cativos foi ver na Audioguía infantil do Museo do Prado ao deus Apolo cobrar vida no cadro e chamar por Vulcano.  Se na casa tamén queredes gozar con esta animación á vez que aprendedes algunhas cousiñas, podedes facer clic aquí, ao rematar a animación de As Meninas tedes que  pinchar en “volver al indice”, situar o cursor na frecha da dereita e continuar clicando nela ata que apareza a obra desexada, volver a facer clic sobre ela e comezará a infanta Margarita coa súa explicación.

AS FIANDEIRAS

No cadro que escollemos para o mes de febreiro, Velázquez  representa nun primeiro plano a unhas fiandeiras pero tamén conta “A fábula de Aracne”.

Aracne era unha moza cunha especial habilidade para tecer tapices, tanto que fixo unha competición coa deusa Minerva para ver cal das dúas creaba o tapiz máis fermoso. Inesperadamente Aracne vence no concurso. A deusa enfadada converte a Aracne nunha araña condenada a estar tecendo o resto da súa vida.

MATEO DE PASEO POLO MUSEO DO PRADO

Co noso calendario escolar de Velázquez xa chegamos ao mes de xaneiro. Nesta ocasión a princesa Margarita sae do cadro “As Meninas” para acompañar a “Mateo de paseo polo Museo do Prado”. De todas as obras do autor que aparecen no libro seleccionamos “O principe Baltazar Carlos cazador” para ilustrar esta folla do almanaque. Para todos os que desexen coñecer un pouquiño máis deste cadro, a continuación deixámoslle o seguinte vídeo de ArteHistoria.

FELIPE IV VESTIDO DE CASTAÑO E PRATA

“Carlota y la princesa española” é o conto que escollemos para o mes de decembro no calendario escolar de Velázquez que estamos realizando. Carlota, o mesmo que varias nenas da nosa aula, quere ser princesa. Para confeccionar  un vestido como os das infantas,  acude coa súa avoa ao museo para ver retratos delas. Pensa que así terá a inspiración necesaria para facer o seu disfrace. Pero cando os personaxes dos cadros de Velázquez cobran vida, descobre que moverse co armazón de arame que leva debaixo da saia a infanta Margarita non é doado. Será o mesmísimo “Felipe IV vestido de castaño e prata” o encargado de poñer fin á aventura da protagonista do conto.

VELLA FRETINDO OVOS

Este bodegón de Velázquez é o cadro que escollemos do libro “Historia de los grandes cuadros” para ilustrar o mes de novembro no calendario escolar que estamos confeccionado. As obras deste xénero teñen como escenario tabernas ou cociñas e amosan moitas clases de alimentos así como tixolas e fontes. 

Esta mañá, na biblioteca escolar, buscamos este cadro nos diferentes libros do autor e non tivemos problema para atopalo representado en varios deles. Considerada unha das súas mellores obras, este óleo pintouno cando soamente tiña dezanove anos.

UN CADRO DE VELÁZQUEZ

Este é o título do libro que escollemos para o mes de outubro no noso calendario escolar 2015/16 de Velázquez. A través del, esta mañá na biblioteca escolar, mergullámonos na obra máis famosa do pintor: As Meninas. 

En cada páxina fomos coñecendo ademais do autor, as persoas representadas na obra: a infanta Margarita coas súas meninas María Agustina Sarmiento e Isabel Velasco; os seus acompañantes Mari Bárbola e Nicolás de Pertusato; a súa coidadora, Dona Marcela de Ulloa; un gardadamas; o apousentador real, José Nieto; e reflectidos estratexicamente nun espello, os reis Felipe IV e Mariana de Austria.

Como puidemos comprobar, este cadro aparece recollido en case todos os libros que temos na biblioteca que falan do autor, porque é a súa obra mestra e a culminación da súa carreira.

Se queredes coñecer en detalle o cadro da man da infanta Margarita podedes facer clic na imaxe e accederedes a audioguía infantil do Museo do Prado.

CADA MES UN CADRO E UN LIBRO

Como xa ven sendo tradición na nosa escola, no segundo trimestre do ano comezamos a confeccionar un calendario escolar temático que sirva aos maiores de lembranza do seu paso por infantil e aos demais de guía de lectura. Este curso ímolo dedicar a Velázquez. Como recollemos no título desta entrada, cada mes traballaremos un cadro deste artista e un libro onde apareza recollida a súa creación.

Empezamos o noso particular almanaque do curso 2015/16 en setembro coa obra “O vendedor de auga de Sevilla” e o exemplar “Velázquez para niños”. Nel limos que o artista naceu en Sevilla e observamos a pintura. Posteriormente explicamos e dramatizamos como se desenvolvía o oficio representado no cadro nunha época na que o abastecemento de auga non estaba xeneralizado.

Paralelamente estamos montando un novo recuncho en clase e na biblioteca escolar dedicado a este gran artista. Se na casa tedes libros, imaxes, postais, láminas, enciclopedias, xoguetes, contos … relacionado co pintor que vos apeteza compartir, podédelo traer para velo na aula, enriquecer o noso novo recanto e aprender todos xuntos.

VELÁZQUEZ NA BIBLIOTECA

Fai unhas semanas no suplemento dominical XL Semanal número 1423, vimos un anuncio no que aparecía o cadro “As Meninas”. Comentamos que fora creado por un pintor chamado Velázquez que tamén aparece autorretratado no lenzo. Hoxe aproveitamos a nosa xornada na biblioteca escolar para ver os libros que temos deste autor.

Comprobamos que o cadro representado na revista está en case todos os libros que temos del. Limos que unha das meniñas debuxada é a infanta Margarita e que o seu pai era o rei Felipe IV.

Tamén constatamos que todos tiñan a pegatina rosa e número 75 porque falan de arte. 

Fomos á zona documental buscamos a cor rosa e vimos onde temos que colocalos cando rematemos de traballar con eles. Na nosa biblioteca de aula tamén temos un pequeno espazo dedicado aos libros de arte e aproveitamos para recoñecelo.