XOGOS CON GLOBOS

Marta e a súa amiga Suevia decidiron por en practica os xogos con globos que o mestre de educación física da nosa escola recomenda. Mirade no vídeo que ben o pasaron e animarvos a practicar coma elas, veredes que divertido.

OS ARRASTRES DE MARTA

Coa nova proposta do mestre de educación física mirade no vídeo de Marta que ben o podedes pasar practicando. Un divertido xeito de darlle unha nova vida as caixas de cartón e aos tubo de papel de cociña. Se probades a decoralos como se fosen auténticos coches de carreiras seguro que vos quedan moi chuliños e vos divertides dobremente. Neste enlace e aquí tedes algunhas ideas.

O XOGO DOS BIRLOS

Seguindo as suxestións do mestre de educación física, Marta practica o xogo dos birlos á vez que lle dá outra vida aos tubos de papel hixiénico. Probade na casa e veredes o ben que o pasades. Se os decorades primeiro, quedaranvos  moi chuliños e divertirédesvos dobremente. Tedes algunhas ideas aquí. 
E a continuación máis propostas de educación física:

http://craderibadumia.blogspot.com/2020/04/a-mover-o-corpo.html

http://craderibadumia.blogspot.com/2020/04/movete-connosco-na-casa.html

http://craderibadumia.blogspot.com/2020/04/circuito-de-psicomotricidade.html

http://craderibadumia.blogspot.com/2020/04/xogo-de-orientacion-e-situacion-espacial.html

MARTA DEPORTISTA

O feito de ter que estar na casiña non debe impedir que fagamos exercicio cada día. Nos vídeos que Marta realizou xunto co seu irmán Pablo son unha boa mostra disto. Animádevos a imitalos e continuade enviándonos outras opcións.

.

Neste enlace tedes algunhas suxestións e a continuación déixivos o "Baile do movemento" do "Duo Tiempo del Sol" para motivarvos.

DEPORTE NA CASIÑA

Hoxe vos traemos esta proposta que nos enviou o mestre de educación física xunto co vídeo inferior que contén unha chea de posibilidades. E para motivarvos, déixovos a presentación co último día que xogamos ao pañuelo. Así vos lembrades dos vosos amigos e o mesmo vos animades a xogalo en familia aínda que sexa no corredor da casa.

AS MESTRAS ESPECIALISTAS

Onte a profesora Olalla de música contounos como van ser ás súas clases e as actividades que va a desenvolver . Hoxe, antes da merenda, tocoulle quenda á mestra Belén de audición e linguaxe coa que aprenderemos articular e pronunciar mellor.

Despois do recreo, coa profesora Olalla de Educación Física, lembramos todo o que faremos para estar en forma e aumentar as nosas capacidades.

E, como tamén nos dará informática, a última hora, antes de marchar para casa, fomos á aula de ordenadores para ensinarlla aos novos alumnos e recordar as normas de comportamento.

COAS RAQUETAS PARA CASA

Agora que os cativos xa remataron de traballar en ximnasia coas raquetas e as pelotas que nos regalara o papá de Candela, chegou o momento de personificalas co nome de cada neno e levalas para casa. Seguro que hoxe se divirten intentando demostrar o aprendido e practicando en familia. Unha vez máis, graciñas papá polo teu agasallo.

PÁDEL

Dende que fai unhas semanas o papá de Candela trouxéranos palas e pelotas de pádel de Salnés Padel para repartir entre os cativos, todos tíñan ganas de xogar con elas. O xoves a mestra Araceli comezou a traballar sobre o tema na clase de ximnasia e seguro que pronto aprenderán moitas cousiñas sobre este deporte. Para empezar todos descubriron que pillar as pelotas non é doado pero … ¡que ben o pasaron!. ¡Moitas grazas papá!.

PSICOMOTRICIDADE EN KENIA

Altos coma xirafas, gateando veloces coma guepardos, a catro patas coma cebras, reptando coma crocodilos… É divertido explorar as posibilidades do noso propio corpo mentres imitamos aos animais que coñecemos de Kenia.

PSICOMOTRICIDADE CON CAROZOS

Na aldea, despois da esfollada, é doado conseguir unha presa de carozos. Xa viramos que podemos transformalos en xoguetes, pero a semana pasada empregámolos tamén para facer psicomotricidade e desenvolver a nosa coordinación.

Divertímonos comprobando que podemos facelos rodar coma unha pelota co pé ou man. Lanzalos ao aire e recollelos antes de que nos caian ao chan resultounos máis complicado. Pero o gran día do carozo tivémolo o martes, cando a mamá de Aaron tróuxonos un saco deles para facer a brasa do Magosto. Non deixamos pasar a ocasión e fixemos torres, o noso nome, debuxos, camiños… ata xogamos a encestar cando chegou a hora de recoller.

¡FELIZ DÍA DAS LETRAS GALEGAS!

Hoxe estamos de celebración pero non vos esquezades de deitarvos cediño. Mañá imos de excursión e hai que madrugar para chegar pronto á escola e non perder o autobús. Ademais, lembrade que non poderedes durmir despois de xantar, temos que aproveitar o día e aprender moitas cousas sobre o mundo das abellas. O mércores en clase de psicomotricidade estivemos xogando a imitalas e a compartir panal. Tamén aprendemos unha variante de “As abelliñas de San Miguel”, na que en lugar de virarnos, cae de cachas o neno nomeado, para axiña volver a erguerse e seguir coa roda. Coma sempre o máis divertido ven ao final cando caemos de cu todos á vez.

PSICOMOTRIDIDADE CON GLOBOS

Dannos medo cando estoupan, tamén desconcerto cando non sabemos a causa,  pero sobre todo provocan risas e motivan. Poucos son capaces de resistirse a golpear un globo antes de que toque o chan.  Pero para conseguilo hai que controlar o propio corpo, a coordinación de movementos, calcular a traxectoria de caída, non tropezar cos demais mentres intentamos collelo…  En resumo, contribuímos ao desenvolvemento de destrezas e habilidades cun obxecto sinxelo e ao alcance de todos. Se queredes pasar unha  divertida tarde en familia aquí vos deixamos a nosa proposta, xogos con globos. Pero non esquezades que desinflados poden ser moi perigosos e provocar accidentes. Se os cativos os introducen na boca poden esganar, por este motivo tamén hai que recoller inmediatamente os restos dun globo roto.

REMATAMOS A SEMANA DA PRENSA

O venres puxemos punto final á Semana da Prensa, pero non ao noso traballo ao redor do xornal, que  continuará estando presente cada mañá a primeira hora cando ollemos o periódico. A despedida fixémola unha vez máis xogando. A semana pasada vimos como podíamos converter o  diario en volantes, cadeiras, sombreiros… nesta ocasión simplemente tivemos que engurrar forte follas do xornal e o potencial multiplicouse ao quedar convertido en pelotas.

Lanzar ao aire e collelas antes de que caeran ao chan; golpealas coa cabeza, as mans, os xeonllos… xogar ao fútbol… e cando rompen  ¡a encestar na papeleira!.

XOGANDO Á PETANCA

Xa estivemos practicando fai tempo cando limos a carta que Félix enviou a Sofía dende París, pero daquela aínda non tíñamos o material necesario e tivemos que improvisalo. Agora xa está a nosa disposición e, aínda que nos vexades con pinta carnavalesca, xogamos coa formalidade dun profesional. 

A verdade é que nunca falta un verme, unha mosca ou algún outro bicho que nos distraia pero… ¡hai tantas cousas que chaman a nosa atención e é tan difícil centrarse nunha soa!

O PARACAÍDAS

Aínda que algúns de nós enredabámonos e collíamos cando tíñamos que soltar e soltabamos cando tiñamos que coller…
hoxe en clase de psicomotrici-dade, coa axuda do paracaídas, aprendemos a importancia de coordinar a propia acción coa dos compañeiros. Cando lograbamos seguir as consignas do mestre acomodando ritmos, movementos e direccións; gozabamos provocando ondas,  mergullándonos no seu interior, lanzando a pelota… Sen lugar a dubidas, un elemento ideal para fomentar a cooperación. Probade na casa a crear o voso propio paracaídas cunha saba vella.

RUGBY, DIFÍCIL DEPORTE

Ao principio, cando recortamos a foto, parecía que se trataba de futbol pero,  cando limos a noticia, comprobamos que se trataba de Rugby. A maioría dos cativos nunca escoitara falar del. Buscamos na enciclopedia dos deportes como se xogaba e, como non nos quedou moi claro,  pedimos axuda  ao profe Rafa. Contounos que o gorro co que aparecen os xogadores nas fotos é para non lastimar as orellas e colocounos en posición para comprendelo. A verdade é que non entendimos case nada pero rimos moito. Ao final como sempre simplificamos as cousas e rematamos xogando ao rugby ao noso xeito.

CARTA DE FÉLIX DENDE PARÍS

Sofía, a protagonista do conto “Cartas de Félix” que estamos lendo na aula, recibiu outra misiva do seu peluche. Como podedes ver na imaxe, marchou para París. Antes das vacacións estivemos traballando sobre esta carta e incluso intentamos aprender a xogar á petanca. Agora imos a investigar e coñecer cousiñas desta cidade e do país onde está situada, xa vos contaremos.

DEPORTES NO XORNAL

Pouco a pouco imos familiarizán-donos coas sección do periódico. Ultimamente estámonos centrando nos deportes. A maioría de nós xa aprendemos a localizar as fotos sen maior dificultade, agora ven o difícil, saber de que deporte se trata. O fútbol distinguímolo con facilidade pero, co resto, aínda nos queda moito por traballar. Por agora andamos a recortar as fotos que atopamos nos xornais atrasados para ir identificándoos e clasificándoos coa axuda do profe Rafa. Se queredes saber porque temos nas fotos a cariña pintada de ratiños, visitade o blogue de música do cole ou picade directamente aquí, veredes que ben o pasamos na clase anterior.

SEMANA DA BUXAINA NA ESCOLA

O luns hai que lembrarse de traer decorada a buxaina que levamos o venres para casa. Pero sobre todo, non vos podedes esquecer de xogar moito en familia con ela esta fin de semana. Para o peón en formato papel, podedes empregar calquera cousa que teñades na casa: teas, botóns, lá, adhesivos, pastas, caramelos... será divertido crear un mural con todos. Para os que busquen inspiración aquí vos deixo unha páxina cunha pequena mostra de buxainas de diferentes países. Na columna da esquerda deste enlace http://www.baldufa.com/portalinicio.htm, tamén tedes unha interesante recompilación se picades en “países y peonzas”.Como nota curiosa sinalar este “trompo alimenticio” para promover hábitos nutritivos saudables. Picade na imaxe se queredes máis información.

POR SAN MARTIÑO, BUXAINAS AO CAMIÑO

¡Que doado parece cando a baila o profe Rafa e que difícil cando a lanzamos nós!. Intentámolo coa súa axuda, agarrándonos el o brazo, dicíndonos como debíamos colocarnos… pero ¡que complicado!... o que máis nos gusta é cando a colle coa man sen que deixe de bailar, pona na nosa e a buxaina continua bailando… Xa sabedes, o venres é o día do peón, a ver se entre todos conseguimos aprender e, sobre todo, evitar que desaparezan estes xogos que tanto nos poden facer desfrutar en familia. Así que papá, avó, mamá… practicades con nós e veredes canto rimos.