CARTAS PARA O APALPADOR

Cando se achega o Nadal, O Apalpador baixa das montañas do Courel cunha morea de agasallos de madeira para repartir entre os meniños galegos. Dende vai varios anos, sempre ven ao festival de Nadal a recoller as cartas coas nosas peticións para as aulas. A semana pasada xa estivemos consultando diversos catálogos e todos escribiron as misivas. Durante as vacacións intentará traernos á escola algo do que pedimos para compartir. Para os que desexen saber máis sobre este persoeiro, neste enlace tedes cancións  e algunhas actividades.

A NOSA PANXOLIÑA

O vindeiro venres 21 celebraremos o noso tradicional festival de Nadal no Auditorio de Ribadumia. Xa vai tempo que comezamos cos preparativos e o “Villancico de las vocales” e título da panxoliña que imos cantar e dramatizar nós. Estes días andamos a ensaiar na escola e, para os que desexen facelo tamén en familia, a continuación vos deixamos o vídeo coa versión karaoke.

ANIVERSARIO DE LÍA

PINCELADAS MUSICAIS

Onte, os músicos da Banda de Música Municipal de Ribadumia viñeron a visitarnos. Explicaron o concerto “Pinceladas musicais” que darán este domingo 16 de decembro ás 19:00 horas no Auditorio Municipal. Cunha  fermosa canción tocada co clarinete, describíronnos unha bonita historia que os meniños  representaron nun orixinal cadro cheo de pinceladas musicais. Durante o concerto expoñerán e explicarán este traballo, non volo perdades.

O NADAL NA BIBLIOTECA

O Nadal tamén chegou a nosa biblioteca escolar. Coma o ano pasado, Zapatocas preparounos un recuncho con lecturas que teñen esta temática como eixo central. Entre todos os alumnos do colexio preparamos unha árbore con bolas decoradas  cos nomes de cada neno. Paseniño iremos lendo todos estes libros.

O MONSTRO DAS CLOACAS

A semana pasada, unha noticia que limos no Diario de Arousa levounos a descubrir ao monstro das cloacas. Alimentase das toalliñas húmidas que tiramos polo váter e produce atascos nas depuradoras con consecuencias moi danosas para o medio ambiente.

Primeiro reflexionamos sobre onde va a auga cando tiramos da cadea do inodoro e que pasaría se fora vertida directamente ao mar. Falamos das depuradoras e vimos o seguinte vídeo para coñecer como funcionan.

Limos que as toalliñas húmidas non se disolven coa suficiente rapidez como para desintegrarse antes de chegar á depuradora de augas. Para comprobalo fixemos un sinxelo experimento que podedes realizar tamén na casa. Metemos en dous envases de auga diferentes unha toalliña e papel hixiénico, axitámolo e observamos o resultado. Evidenciamos como o papel foise disolvendo mentres a toalliña permaneceu practicamente intacta. A partir de agora temos claro que non podemos tirar as toalliñas ao váter ou contribuiremos a alimentar ao monstro das cloacas.

ANIVERSARIOS DE SUEVIA E YASMINA

PALMEIRA DE FROITAS

Despois de tantos días a voltas co picudo vermello e as palmeiras, non podíamos deixar pasar a oportunidade de levar esta temática ao noso obradoiro de cociña.

A PALMEIRA DE LEIRO

Dende que limos no xornal a noticia de que o picudo vermello facía estragos nas palmeiras, queríamos ver o exemplar que hai preto da escola. Despois dunha semana de espera, onte por fin a choiva deunos unha tregua e puidemos camiñar ata o xardín da igrexa de San Xoán de Leiro onde se atopa. Quedamos abraiados co seu tamaño, vese por riba dos tellados das casas. Había algunhas polas tiradas no chan e puidemos comparalas con nós e apreciar o seu gran tamaño. Reflexionamos sobre a cantidade de anos que fixeron falta para que acadara ese tamaño e comprendemos a mágoa que sería se o picudo a atacara. Hoxe Suevia tróuxonos un tríptico con información sobre ese insecto, seguro que nos vindeiros días aprendemos máis sobre el.

O PLÁSTICO NO MAR

Esta semana, a partir da noticia da erupción do volcán de Guatemala, falamos do que significa a evacuación das casas ou da nosa escola en caso de perigo. Realizamos un simulacro e reflexionamos sobre a importancia do proceso a seguir. Tamén vimos imaxes das inundacións de Viveiro pero, sobre todo, conversamos ao redor dos estragos que ocasionan os plástico no mar cando descubrimos unha cría de golfiño cunha bolsa enredada no fociño.

EN NEGRO CONTRA AS VIOLENCIAS

UNHA SORPRESA INESPERADA

Como xa sabedes, sempre que o tempo nolo permite, imos camiñar ao redor da escola. Hoxe, cando saímos, había un coche de tráfico na porta. Nun primeiro momento os meniños mirárono con certo receo pero, os gardas civís, moi amablemente, propuxéronos ver o seu vehículo. Non dubidamos en aceptar a súa invitación. Falaron connosco do importante que é viaxar co cinto de seguridade posto e deixáronnos subir ao interior do coche. Queremos agradecerlle aos axentes a súa xenerosidade e paciencia cos cativos.

O REI MELCHOR

XVI CONCURSO DE POSTAIS DE NADAL

Ao chegar estas datas, o Concello de Ribadumia convoca o seu tradicional Concurso de Postais de Nadal. Coma todos os anos, coa axuda da mestra Ana, os meniños crean as súas pequenas obras de arte para participar. A cada un dos finalistas de cada unha das categorías premiaráselles cun agasallo que entregarase o día 5 de xaneiro de 2019 ao remate da Cabalgata de Reis. Pero lembrade que soamente pódese presentar unha postal, se ides participar dende casa avisade para non entregar a da escola.

NOVEMBRO MES DA CIENCIA EN GALEGO

Para conmemorar o mes da ciencia en galego, esta semana Zapatocas tíñanos preparado un pequeno recuncho con diversos libros que teñen a ciencia como eixo central. O luns, ademais de velos, reflexionamos sobre o cartel anunciador de “ler ciencia” e intentamos atopar as diversas áreas do coñecemento na nosa biblioteca.

CONTANDO ATA DEZ

Cando polo Samaín baleiramos e decoramos entre todos a cabaza xigante que nos trouxo Elena, separamos as pebidas da polpa e reservámolas. Daquela puxémolas a secar e, aínda que algunhas colleron algo de humidade, a maioría serven para plantar e ter unha boa colleita para o ano. 

Hoxe cada meniño levou dez para sementar na casa cando chegue a primavera. Pero antes tiveron que preparar os sobres con folios reciclados para gardalas. E despois, contar e separar dez sen confundirse. Na casa podedes volver a contalas con eles e os que descubrades que aínda non saben a cantinela ou enganasen no reconto, axudarlle nas vindeiras semanas a conseguilo.

O PICUDO VERMELLO

Dende que a semana pasada leramos nos xornais que nos trouxeron Suevia e Marta os danos que o picudo provocou na palmeira do Concello de Vilagarcia, é moito o que falamos ao redor deste insecto. En internet vimos vídeos de como medra, os estragos que ocasiona, como o eliminan e o traballo que levaron os operarios municipais para talar  a palmeira.

MONSTRO PELUDO

O venres pasado, coa elaboración dun mostro peludo, dimos por rematada a temática do  medo no noso obradoiro de cociña.

FORMACIÓN DE USUARIOS DA BILIOTECA

Na nosa biblioteca os exemplares de literatura están ordenados por editoriais, deste xeito, aínda que os rapaces non saiban ler, poden recoñecer a editorial polo seu logotipo e volver a colocar o libro no seu lugar correspondente. Conforme imos rematando de ler os contos da guía de lectura para valentes que publicamos co gallo do día das bibliotecas, temos que aprender a devolver os exemplares ao seu andel. Para facilitar está habilidade, deseñamos unha serie de actividades baseadas nunha adaptación do cartel da CDU ilustrada por Óscar Villán que sistematicamente iremos traballando ao longo do curso.

XOIAS PARA INVESTIGAR

Esta semana foron moitas as conversas que tivemos ao redor das noticias que apareceron na prensa. Sempre xorden cousiñas que espertan o interese dos meniños e con frecuencia acudimos á biblioteca a buscar máis información ao respecto. Esta mañá centramos o noso traballo nunha nova que leramos cando andabamos a preparar a carreira contra a leucemia. Limos que Loli Beloso deseña xoias para investigar contra o cancro e, na prensa dixital, vimos fotos do seus traballo.

XOGANDO CON CAROZOS

Hoxe, cos carozos que sobraron do Magosto que celebramos a semana pasada, estivemos aprendendo un dos xogos cos que enredaban os nosos avós cando eran pequenos. Tratase de facer unha torre o máis alta posible sen que caía ao chan poñendo cada neno un carozo por quendas.

 Tamén comprobamos que podemos facer nomes con eles e nos vindeiros días seguiremos experimentando e creando. Probade a xogar tamén vós na casa cos meniños, seguro que atopades un montón de usos creativos. Animádevos a mandarnos fotos e publicarémolas no blog para compartir ideas.

BRUXA

Continuamos enfrontándonos aos nosos medos dende o obradoiro de cociña. Nesta ocasión tocoulle quenda ás bruxas. Aínda que no último momento tivemos que improvisar e substituír algún ingrediente que quedou esquecido na casa.

SAMAÍN 2018

Este ano os zombis foron os protagonistas na nosa festa do Samaín. Dirixidos pola mestra Olalla e ao ritmo da canción Thriller de Michael Jackson, deleitaron ao publico co seu terrorífico e divertido baile. 

Pero antes, tivemos unha mañá chea de actividades. Primeiro o Seprona explicounos como podemos axudar a coidar o medio ambiente. Despois, bailamos ao ritmo da banda de música e tocamos os seus instrumentos. Recuperamos forzas cunha merendola aterradoramente deliciosa que prepararon as familias dos nenos de cinco anos. Coa barriguiña chea recibimos á bruxa Montse, que coa axuda das mestras Olalla, Ana, Belén e Olalla, dramatizaron un arrepiante conto que nos encantou. Todo isto sen esquecer unha espectacular exposición de cabazas e un rico Magosto. Moitas grazas a todas as familias pola súa axuda e colaboración, e en especial ás que estiveron toda a mañá asando castañas a pesar da choiva e o frío.

¡GRACIÑAS ELENA!

A pesar dos anos transcorridos dende que María rematou a súa Etapa de Infantil, a súa avoíña continúa facéndonos chegar un dos seus fermosos calacús para decoralos na aula. Cando vai chegando a festa do Samaín, lémbrase de nós e, grazas iso, pasamos unha divertida mañá baleirando as cabazas da súa horta. Un millón de bicos para María, a súa mamá Elena e en especial para a avoíña.

XOGANDO COS MEDOS

A sesión semanal de xogos, estamos a dedicarlla a enfrontarnos aos nosos medos. Baseándonos na canción de Rosa León “Jugando al escondite” creamos a nosa propia versión substituíndo o lobo por cada un dos nosos temores.