FLORES DE FROITAS

VISITA AO “COLE” DOS AVÓS

Dentro do programa Voluntariado miúdo: Móvete no que participa a nosa escola, onte fixemos unha xornada de convivencia interxeracional cos avós da Residencia de Maiores de Ribadumia. 

Primeiro realizamos unha visita guiada polas súas instalacións para coñecer un chisquiño como son as súas actividades. Rematamos o percorrido no xardín, onde comezaron os xogos co paracaídas e as pelotas. Cando os avoíños xa estaban preparados, elaboramos con eles os decorados da obra de teatro baseada no precioso conto “Avós”. Merendamos para recuperar forzas e, acto seguido, as mestras Montse e Olalla de música deleitáronnos cunha emotiva representación de dito conto. Rematamos a xornada cunha plantación de árbores na horta da residencia.

MAIOS 2019

Un obradoiro de compostaxe, unha alfombra floral, unha merendola espectacular, gaiteiros, baile e, por suposto, o noso maio. ¡Canto traballamos na nosa festa pero que ben o pasamos!

¡FELIZ DÍA DO LIBRO!

Para conmemorar o Día do Libro, hoxe os meniños levaron para casa a guía de lecturas do circo que editamos dende a biblioteca escolar e ao redor da que estivemos traballando este mes.

VISITA AO PORTO E A LONXA DE PORTONOVO

Grazas ao programa “O Sabor da Aventura está no Mar” no que participa a nosa escola, onte puidemos gozar dunha excursión a Portonovo. Primeiro visitamos a Lonxa, onde nos explicaron o funcionamento da poxa e realizamos unha ficticia. Despois  vimos o etiquetado dos produtos e a información que proporciona. Ao rematar, tocoulle quenda ao porto e mostráronnos os diferentes tipos de redes e aparellos que empregan para capturar o peixe. E puxemos fin á xornada cunha rica merenda mariñeira para coñecer os produtos do mar dende o punto de vista culinario.

NUTRIAS MARINAS

A noticia publicada  en xaneiro no periódico Faro Vigo sobre as “nutrias marinas”, serviunos de detonante para buscar información e coñecer algunhas das características deste simpático mamífero.

Vimos varios vídeos, entre eles, no que podedes ver como nacen facendo clic aquí.

BOTERO NA BIBLIOTECA

Nas últimas semanas, dedicamos a nosa visita á biblioteca a ver os libros que temos do artista Fernando Botero e como temos que facer para localizalos. Consultamos a CDU e comprobamos que teñen a pegatina rosa e o número 75 porque tratan de pintura.