FESTA DE FIN DE CURSO

Despois de todo un ano do máis diferente, chegou o momento da despedida tamén dun xeito moi distinto. Como non podíamos xuntarnos coas familias e amigos doutras clases, decidimos seguir a proposta da mestra Marta e argallar “A festa da auga”. Á escola acudimos co traxe de baño, a toalla, as chanclas, dúas máscaras de reposto e unha muda de roupa na mochila polo que puidera pasar. Mentres esperabamos a que o día quentara máis para comezar cos xogos de auga, construímos unha divertida libélula con pinzas da roupa.

Despois quentamos motores cos bailes e xogos: O Twist dos ratiños, Son unha serpe, Tomadiños en parella, O baile dos animais, María a cocotera … con tanto movemento entrou fame e chegou a hora da merenda.

Despois de recuperar forzas o sol xa quentaba. Puxemos os traxes de baño e comezamos cos enredos de auga.

Primeiro carreiras por grupos para encher os caldeiros

Logo a pescar tapas de plásticos coma se fosen peixiños

Non podíamos deixar de practicar o noso xogo favorito: o pañuelito pero cunha versión máis divertida substituíndoo  por un globo con auga. 

E para rematar, a batalla con pistolas de augas e mangueira.

Case sen darnos conta chegou o momento de secarnos e cambiarnos de roupa

E xa con todo recollido, aínda tivemos un anaquiño de tempo para facer pulseiras cunhas peciñas para ensartar que nos deu a mestra Marta. Sen lugar a dubidas foi unha despedida de curso  moi diferente pero do máis divertida. Grazas a todas as familias pola súa colaboración e as mestras Ana e Marta por animarnos a facer esta inesquecible “Festa da auga”. Volvemos en setembro.