FESTA DE FIN DE CURSO

Case sen darnos conta o fin de curso chegou. É o momento de despedirse dos amigos e mestres ata setembro. Pero toda despedida ten que ir precedida dunha boa festa e na nosa tivemos un pouquiño de todo... Primeiro os xogos…

Coa corda

O paracaídas

Os aros  

Os zancos  

¡Ata con patinetes!  

Despois de tanto brincar  entrounos fame… Biscoitos, galletas, tortas, filloas … ¡ata pizzas!... ¡que ben cociñan as familias!

Tras recuperar forzas, viñeron as actuacións que con tanto agarimo preparamos nas diferentes escolas: A que sabe a lúa, Dona Carme, Rebelión na colmea, O baile do Garutiño… E a que máis ilusión espertaba entre nós por ser a que tantas veces ensaiaramos: Os tres porquiños.

E para rematar, unha pequena sorpresa, a representación da "Ratiña presumida" na que interviñeron todos os mestres.  

ANIVERSARIO DE PAULA E LAURA

O venres tivemos a nosa última clase do obradoiro de cociña. Despedímonos celebrando os aniversarios do verán. Paula cumpre cinco anos en xullo e Laura en agosto. Nesas datas non hai escola e, como non queremos quedarnos sen festa, decidimos adiantalos un pouquiño. Nesta ocasión tamén optamos por facer dúas tortas e xogar a repartir as cinco candeas: tres e dúas, catro e unha, cinco e ningunha…

Ao aumentar o número tamén aumentan as opcións … ¿sabedes xa por cal optamos?...

Pero o que máis nos gustou foi botar os fideos de cores para adornalas. Como se parecían moito aos “pos máxicos” que trouxeramos do Salón do Libro cando cociñamos o batido máxico de amorodos, pensamos que tal vez volverían a facer efecto. Ángela atopou o listado que redactaramos e volvemos a pedir: calma, felicidade, tranquilidade, valor … pero sobre todo, saúde moita saúde para as nosas familias, e traballo que tanta falta fai nestes tempos de crese.

PREPARÁNDONOS PARA O VERÁN

O xoves levamos a revista escolar, onte o noso calendario escolar da poesía … no transcurso da vindeira semana iremos rematando os nosos traballiños e chegaran aos fogares dos cativos. Teñen ganas de ensinarllos á familia e esperamos que elas síntanse tan orgullosas das súas producións coma eles mesmos. Se os conservades, dentro duns anos, poderedes volver a gozar lembrando as cousiñas que facían e os amigos que tiñan cando eran pequerrechiños.

LIBROS DE COCIÑA

O pasado luns dedicamos a nosa visita semanal á biblioteca escolar a localizar os libros de cociña. Neles descubrimos multitude de receitas: sinxelas, divertidas, temáticas, para festas, sen lume, con froitas… Coma sempre, ademais de gozar vendo as ilustracións e decidindo cal nos gustaría realizar para o vindeiro curso no noso obradoiro de cociña, reflexionamos sobre como están organizados os exemplares, cal é a súa pegatina e como temos que facer para buscar o que nos interesa. Para os que lles guste este tipo de lecturas, aquí lle deixamos o enlace á guía de lecturas saborosas do curso pasado, e o acceso directo aos libros de cociña do noso catálogo virtual clicando aquí. Se queredes xogar a crear caras con alimentos como os da imaxe, picade en “caras cociñeiras”.

BICOS DE VENTO

Todos coñecemos os bicos tradicionais, que se dan na cariña, e os bicos que lanzamos polo aire coa man. Fai tempo que aprenderamos que existen os bicos de spray, que se mandan con dous dediños e facendo psssssssss. A mestra ensinaranos que vira nunha película os bicos de bolboreta, que se dan pestanexando con agarimo. Pero o outro día, ao traballar o libro de Antón Cortizas “Sopra neste furadiño” para o noso calendario da poesía, descubrimos que existen ¡os bicos de vento!. Ao principio quedamos abraiados e tivemos que practicar para aprender a dalos. Entrábanos risa e non saían, soprabamos moi forte e molestaban, demasiado rápido e non chegaban… Ata que, paseniño, fomos collendo xeito e, agora… ¡como nos gustan os bicos de vento!

ENSALADA DE PASTA

Como xa sabedes, Félix está pasando o terceiro trimestre en Roma e axudándonos a coñecer esta cidade e o país ao que pertence. A través do obradoiro de cociña mergullámonos tamén na súa gastronomía, aínda que, coma sempre, adaptándoa ás idades dos pequenos e os seus recursos. En semanas anteriores experimentaramos coas pizzas e os xeados, hoxe tocoulle á pasta. Lazos de pasta, tomate, cenoria, atún, xamón cocido, aceite, vinagre, sal… botamos de menos as olivas pero, como non tiñamos, apañamos cun toque extra de vinagre de Módena e ¡a comer!.

UNHA SEMANA CON ANDERSEN

Onte, cando vimos a maleta, non sabíamos que atoparíamos dentro. Na nosa inxenuidade tíñamos a esperanza de que, a bruxa do dente, que ás veces agocha as cousas da mestra para facela rabiar, escondera dentro os tres ordenadores que desapareceron da zona de informática. Pero non, agora xa estamos seguros de que os roubaron da nosa querida biblioteca ao redor da que tanto traballamos para conseguilos. Pero ao que íamos, a maleta que veu cargada de contos do escritor Hans Christian Andersen para a “hora de ler”. Son tantos que case non sabemos por cal decidirnos, e non soamente libros, tamén ten películas: O soldadiño de Chumbo,  Polgariña, O traxe novo do Rei… Onte Paula escolleu “A Sereíña” e hoxe Antía  “O Parruliño Feo”. Despois vimos no encerado dixital “A Raíña das Neves”. Ven para quedarse unha semana con nós, nos seguintes días investigaremos sobre este autor a ver se conseguimos convencelo e queda máis tempo entre nós. Se na casa tamén queredes aprender xogando, picade no LIM do seguinte enlace http://www.blogoteca.com/orecantodemik/index.php?cod=111584

UN COLLAGE MOI ESPECIAL

Tendo as obras de Picasso como modelo e seguindo a idea que nos deu o papá de Martiño cando veu a falarnos do seu traballo, estamos creando un “collage” moi especial. Taboíñas, restos de  madeira, rotuladores, ceras, cola… Esta semana queremos rematalo, non sabemos se non quedará tan bonito como os que realizaba Picaso. O que si temos claro é que gozamos experimentando con estes materiais.