XEADO CON GALLETAS E NOCES

Achegase o verán e, para despedirnos do noso obradoiro de cociña por este curso, nada mellor que esta fresquiña receita.

A PORTA DE BRANDEBURGO NO XORNAL

Vímola no periódico que nos trouxo José a principios de semana. No recuncho que temos de Alemaña comprobamos que aparece nunha das imaxes de Rita e en todos os exemplares que falan de Berlín.  No libro que Carla deixounos para o recanto, limos que é un dos símbolos de Berlín e aproveitamos para coñecer un pouquiño das súas características e historia.

PARTIDAS EN FAMILIA CO DADO

Dende que empezaramos a familiarizarnos coa resta empregando a puntuación obtida co dado como elemento de subtracción, falaramos de botar unha partida en familia. Como ultimamente andabamos enredados con outras actividades, aprazámolo ata hoxe. Esta mañá estivemos elixindo ás catro persoas da casa coas que íamos xogar. Agora toca esperar polos resultados.

Os pequenos da clase tamén van botar a súa partida en familia pero neste caso o gañador será o que saque a cifra máis alta co dado. Previamente terán que escribir as grafías dos números obtidos por cada participante. Será unha boa escusa para reforzar eses trazos que se lles resisten.

REMATAMOS O NOSO CALENDARIO DE VELÁZQUEZ

A semana pasada completamos o mes de xullo cun “Autorretrato” do artista e onte, o de agosto, coa obra “Adoración dos Reis Magos”. Coma sempre buscamos nos diferentes libros cada cadro pero non sempre hai imaxes deles en todos os exemplares. O que gusta máis aos nenos é recoñecer nas ilustracións as obras que xa traballamos e lembrar o seus títulos. Pero o feito de atoparnos co rei Baltasar nunha pintura de Velázquez deunos moito do que falar.

NA HORA DE LER… ¡PELÍCULAS!

A semana pasada xa rematamos de ler todos os contiños dos Irmáns Grimm que tíñamos na nosa bolsiña de lecturas. Como non nos dera tempo de substituílos por outros, decidimos mirar no recuncho que temos montado na  biblioteca dedicado a estes autores. Comprobamos que, ademais de libros, hai un montón de DVDs con títulos que descoñecíamos: “Los tres pelos de oro del diablo”, “La bola de cristal”, “La doncella de los gansos”, “Los dos hermanos”… e outros moitos que coñecíamos a súa versión impresa pero non a película: “El satrecillo valiente”, “Los músicos de Bremen”… Sen dubidalo comezamos a escoller cal visionar primeiro. As que vimos ata agora gustáronnos tanto que optamos por dedicar durante uns días a hora de ler ás películas dos Irmáns Grimm.

ANIVERSARIO DE BORJA

UN RECREO ESPECIAL

Hoxe, á hora do recreo, o vento toleirón sopraba con forza. Cando fomos buscar a mangueira para regar e evitar que o aire levantara a area e entrara nos ollos, descubrimos que xunto ao invernadoiro a herba estaba cortadiña e a temperatura era ideal. Inmediatamente decidimos cambiar o noso campo de xogo para esa zona. Ao principio, os pequenos estaban descolocados no novo espazo pero, tras uns minutos de adaptación, mirade nas fotos que ben o pasaron enredando na herba.

A RAÍÑA DONA MARIANA DE AUSTRIA

Dende que vimos o cadro de “As Meninas” e varios contos que teñen á infanta Magarita como protagonista, este personaxe histórico gustou á maioría dos cativos. En diferentes obras de Velázquez recoñecimos ao seu pai o rei Felipe IV e ao seu medio irmá o príncipe Baltasar Carlos. Faltábanos a súa mamá, a raíña dona Mariana de Austria, pintura que eliximos para ilustrar o mes de xuño no calendario escolar que estamos elaborando. Son varios os libros que temos onde aparece recollida esta obra e o luns na nosa visita á biblioteca escolar estivemos buscándoa en todos. Pero, sen lugar a dúbidas, o exemplar que Mencía compartiu connosco foi onde a puidemos observar con  máis detalle.

UN ALIMENTO ESPECIAL…

Hoxe Adrián trouxo para compartir connosco un agasallo que lle deron á súa familia. Tratase dun pretzel alemán. Limos a información que nos aportou a súa mamá e descubrimos que se trata dun tipo de galleta ou bolo con forma de lazo e cun sabor lixeiramente salgado. Escoitamos no ordenador como se pronuncia esa palabra e intentamos reproducila. Vimos a súa receita e falamos dos seus ingredientes. Á hora da merenda, despois de observalo detidamente, partímolo en anaquiños e probámolo todos. ¡Que ben sabía esa galleta salgada de Alemaña!...

 Pero este non é o único alimento alemán que temos no noso recuncho, Rita trouxo varios paquetes de chocolates de diferentes sabores. Temos moitas ganas de probalos pero como están envasados podemos reservalos e traballar un chisquiño ao redor deles primeiro. Moitas grazas ás familias por compartir connosco e axudarnos a enriquecer o noso labor educativo.

A CASIÑA DE CHOCOLATE

Agora que o noso amigo Félix volveu a Alemaña, non podíamos deixar pasar a oportunidade de levar ao noso obradoiro de cociña un dos contos máis famosos dos Irmáns Grimm. Aínda que non calculamos ben a cantidade de crema de cacao que necesitabamos e quedaron un pouquiño escasas, o venres non deixamos nin unha casiña de chocolate sen comer.

FILGUEIRA VALVERDE NO XORNAIS

Vímolo esta semana, en “El Diario de Pontevedra” e “La Voz de Galicia”. No primeiro anunciando unha “fotobiografia” que regalan hoxe co periódico ao mércalo. No segundo limos que axudou a fundar o Museo de Pontevedra e falamos das pinturas, xoias, mobles, moedas, instrumentos musicais, útiles da vida cotiá… que nel podemos atopar. Dende aquí animamos a todas as familias a visitar este museo gratuíto, con espazos como a recreación da cámara da fragata Numancia que poden resultar de interese para os cativos.

AS LANZAS

“La infantita quiere buñuelos” é o título dun dos libros que a biblioteca municipal de Meis cedeunos en préstamo temporal mentres esteamos a traballar ao redor da figura de Velázquez. Escollémolo para ilustrar o mes de maio do noso calendario escolar do autor. Nel cóntanos unha trasnada argallada pola infanta Margarita e Nicolasito, o anano representado no cadro As Meninas que anda a molestar ao can. A trama comeza cando a princesa quere tomar o chocolate con buñuelos destinado a súa media irmá e as damas. Pero non pode … o seu pai, o rei Felipe IV, ten que recortar os gastos da corte para facer fronte ás débedas da guerra e á mala xestión. Unha delas quedou inmortalizada na obra  “A rendición de Breda, ou As lanzas” de Velázquez que eliximos para o mes de maio. Entre realidade e fantasía, gozamos da lectura deste divertido libro á vez que coñecemos algúns dato da época do pintor.

UN LIBRO DE NÚMEROS ESPECIAL

Dende que celebraramos o día do número nas prendas de vestir, comezamos a elaborar un libriño individualizado e personalizado baseado na nosa vestimenta. Nel, paseniño, recollemos as fotos e os nomes de todos os nenos, ás grafías que aparecen nas diferentes prendas, como denominamos cada peza de roupa e como podemos escribir os número empregando letras.

Agora, cos maiores da aula, andamos co máis difícil, a numeración das páxinas e e a súa orde respectando esta disposición. Hoxe realizamos a portada e de paso aproveitamos para lembrar como debemos usar o afialapis. Pronto estará rematado, despois de tantos meses a voltas con el están desexando levalos para casa. Por certo, quen se lembra que número esqueceu a mestra incluír na portada do libriño … A ver quen nos envía un comentario coa resposta.

LETRAS GALEGAS 2015

Este ano o día das letras galegas está dedicado a Xosé Fernando Filgueira Valverde. Ao longo desta semana intentaremos que os cativos se familiaricen  un chisquiño coa figura e obra deste autor pontevedrés. Comezaron onte en informática coa mestra Araceli vendo e realizando as actividades LIM propostas polo Seminario Galán e que vos deixamos a continuación por se queren volver a facelas na casa. Soamente tedes que facer clic na imaxe inferior para acceder.

Hoxe estivemos lendo e comentando algúns dos carteis da exposición gañadora do concurso-exposición Letras Galegas 2015, aprendendo a escribir o nome do autor homenaxeado e facendo un quebracabezas da súa caricatura. Nos vindeiros días continuaremos coas actividades propostas no libriño que acompaña aos carteis e coas do equipo de normalización lingüística do centro.

FELIPE IV A CABALO

O noso calendario escolar de Velázquez continua avanzando. A semana pasada chegamos ao mes de abril e foron “Las Tres Mellizas” as encargadas de achegarnos o cadro “Felipe IV a cabalo”.

Aínda que tamén observamos a obra en detalle accedendo á galería on line do Museo do Prado e, por suposto, nos libros que temos na escola, o que máis gustou aos cativos foi ver a Velázquez pintándoa na animación do vídeo que vos deixamos a continuación.

FLORES DE FROITAS

Aínda que a choiva e o mal tempo queren seguir connosco, no noso obradoiro de cociña tamén quixemos darlle a benvida á primavera elaborando unhas saudables flores de froitas. A ver se o sol se anima, ven a merendar á escola e decide quedarse durante unha tempada.

A FERMOSURA DAS PALABRAS

Achegase o Día da Letras Galegas e na nosa escola imos celebralo traballando ao redor das palabras máis fermosas da nosa lingua. Trátase da iniciativa que puxo en marcha a mestra Ana o pasado mes de febreiro para conmemorar o Día de Rosalía de Castro. Dende entón, un caderno viaxeiro anda visitando os fogares dos nosos alumnos e cada familia vai escollendo e escribindo a que consideran a palabra máis bonita da lingua galega. Soamente hai unha condición: non se pode repetir.

Na aula estamos aproveitándoas para enriquecer o noso vocabulario á vez que aprendemos a súa ortografía e lembramos os nomes dos compañeiros. A ver si para a semana o noso caderniño remata a súa andaina e temos a lista definitiva.