¡GRACIÑAS ELENA!

A pesar dos anos transcorridos dende que María rematou a súa Etapa de Infantil, a súa avoíña continúa facéndonos chegar un dos seus fermosos calacús para decoralos na aula. Cando vai chegando a festa do Samaín, lémbrase de nós e, grazas iso, pasamos unha divertida mañá baleirando as cabazas da súa horta. Un millón de bicos para María, a súa mamá Elena e en especial para a avoíña.

XOGANDO COS MEDOS

A sesión semanal de xogos, estamos a dedicarlla a enfrontarnos aos nosos medos. Baseándonos na canción de Rosa León “Jugando al escondite” creamos a nosa propia versión substituíndo o lobo por cada un dos nosos temores.

CDU ILUSTRADA

Na nosa biblioteca os libros clasifícanse polas materias das que tratan seguindo a clasificación decimal universal (CDU). Así, a cada materia correspóndelle unha cor e un número dende o 0 ata o 9. O luns pasado comezamos a traballar cos meniños coa versión ilustrada por Óscar Villán. Paseniño iremos facendo actividades para que aprendan a manexarse con soltura na nosa biblioteca e desenvolvan habilidades como usuarios

¡GRAZAS A TODOS POR PARTICIPAR!

Despois dun par de semanas de preparativos, por fin deu chegado o día. Acompañados dos nosos amigos e familiares dimos a volta ao cole para apoiar a loita contra a leucemia infantil. Os donativos recadados pola comunidade educativa serán remitidos á Fundación “Unoentrecienmil”. Eses cartos serán destinados a unha Beca para a investigación da enfermidade. Graciñas a todos polo voso esforzo e participación.

OS PEIXES DE COLORES DA NOSA RÍA

Peixe rei, Doncella, Borracho, Maragota e Faneca Brava foron os nomes dos peixes que coñecemos a semana pasada lendo un artigo en La Voz de Galicia. Aínda que a faneca é famosa pola súas picadas e moitos dos meniños xa tiñan anécdotas que contar ao respecto. Quedamos abraiados coas súas bonitas colores e cada un elixiu ao seu favorito.

¡FELIZ DÍA DA BIBLIOTECA!

Hoxe conmemórase o Día da Biblioteca e son múltiples as actividades que se organizan nos centros educativos para celebralo. Na nosa escola, como andamos a voltas cos medos, decidimos facelo editando unha guía de lectura para valentes que hoxe publicamos en formato dixital. Nos vindeiros días, cando leamos todos eses contos e rematemos de traballar con ela na aula, os nenos levarana para casa en formato papel. Lembrade que despois quedan os libros a vosa disposición na biblioteca escolar.

ARAÑAS

Os medos tamén chegaron ao noso obradoiro de cociña. Os venres enfrontámonos a eles elaborando divertidos pratos que teñen os nosos temores como temática.

OS NOSOS MEDOS

Dende que limos “Contos de monstros” andamos a falar dos nosos medos. O primeiro identificalos, polo que cada neno dixo, escribiu e debuxou o seu. Despois, paseniño, buscar ferramentas para tentar que se fagan cada vez máis pequerrechiños a ver se conseguimos superaralos.

A VOLTA AO COLE CONTRA A LEUCEMIA

https://www.lavueltaalcole.com/

https://unoentrecienmil.org/

OS NOSOS CARNÉS DE BIBLIOTECA

Cada semana, cando os meniños acuden á biblioteca e escollen o libro que levaran para casa, a mestra Ana ten que rexistralo nun programa informático.  Para facilitar esta tarefa, cada neno ten o seu  carné cun número de lector. A principio de curso cada cativo personificouno co seu nome e un debuxo. Agora xa están plastificados e todos teñen sistematizado que teñen que buscalo e introducilo no libro que levan para facilitar o seu control.

O HOME BALA NO XORNAL

Nas últimas semanas, graciñas á mamá de Rosana e a mestra Marta de Ribadumia que nos traen xornais, podemos ver a prensa na aula. Estes días foron moitas as noticias que chamaron a nosa atención: os incendios, a Festa do Marisco, as riadas … pero o que sen lugar a dubidas máis gustou aos meniños foi a entrevista ao home bala que limos en La Voz de Galicia.

O CASTIÑEIRO DA ESCOLA

Unha das grandes avantaxes dunha escola rural como a nosa é a posibilidade de estar en contacto diario coa natureza e descubrir os tesouros que nos ofrece. A principios de curso foi a abeleira a que nos regalou os seus froitos. Estes días, na nosa andaina diaria, é o castiñeiro o que nos ofrece a súa colleita. Cada mañá, con moito coidadiño para non picarnos cos ourizos, apañamos as castañas que atopamos, ao chegar a clase contámolas e xuntámolas nunha caixiña para, cando teñamos dabondo para todos, repartilas.

O HOME BALA

Dende que viramos ao Home Bala na publicidade do Circo de Portugal, unha mestura de medo e curiosidade invadiu aos meniños. A partir dese momento comezamos a realizar diversas actividades para coñecer o traballo deste personaxe circense.

LECTURAS PARA VALENTES

Con motivo da festa do Samaín que celebraremos o vindeiro día 31, na escola estamos a traballar ao redor do medo. Comezamos quentando motores na biblioteca creando un recuncho con exemplares que teñen este tema como eixo central e paseniño iremos lendo todos os que poidamos . O luns estreámonos con “Contos de monstros” e comezamos a falar dos nosos medos. Onte tocoulle quenda a  “Ábreme con mucho cuidado ¡o te daré un mordisco!” e, entre risas e sustos, descubrimos un libro diferente. Hoxe o noso encargado do día escolleu un clásico: “Os Bolechas teñen medo”. E mañá … xa vos contaremos … 

O AUTO NOVO

O xoves pasado inauguramos a sesión semanal que imos dedicar aos xogos coñecendo unha das cancións máis populares dos “Pallasos da Tele”. Estes artistas circenses que coñeceremos en profundidade mais adiante, fixeron cantar e rir a miles de nenos con “El auto nuevo”.  Na nosa aula pasámolo xenial aprendéndoa e despois cantándoa na nosa andaina diaria.

PASTELIÑOS DE ABELÁS

RABO DE BOI

Como xa vos contamos na entrada anterior, o venres imos facer unha rica receita coas abelás da horta, pero onte empregámolas para aprender  o tradicional xogo de “Rabo de boi”.  O enredo é moi sinxelo, trátase de agochar nunha das mans o froito seco mentres se di o recitado que hoxe escribimos e tedes na imaxe. Ao rematar hai que adiviñar en que man está. Probade na casa veredes como lle gusta aos meniños.

AS ABELÁS DA HORTA ESCOLAR

A principios de curso, cando estivemos vendo as arbores froiteiras da nosa horta escolar, apañamos unha chea de abelás. Esta semana chegou o momento de inaugurar o noso obradoiro de cociña elaborando unha rica receita que teñen estes froitos secos como elemento principal. Hoxe, despois de degustalas, escribimos unha nota para casa cos ingredientes que temos que traer, pero ademais aprendemos un divertido xogo con elas que vos contaremos outro día.

VOTAMOS...

En determinados momentos da xornada, para traballar dun xeito máis individualizado cos meniños, a clase subdivídese en dous grupos atendendo a criterios pedagóxicos. O venres cada neno propuxo como quería que se denominara o seu subgrupo e fixemos un listado no encerado coas propostas. Despois cada cativo votou pola súa favorita, contamos os votos obtidos e as gañadoras foron: tartarugas e xirafas.