Fai tempo, nun dos paseos que adoitamos dar ao redor da escola, descubrimos no cedro un niño de eiruga procesionaria. O xoves, nun artigo na prensa dixital, soubemos que esta primavera haberá un incremento desta praga e que pode ser especialmente perigosa para os cans.
No seguinte vídeo, que vimos na escola, un veterinario explícanos cousas moi interesantes sobre esta eiruga coa que debemos ter especial
coidado.
Esta semana veu marcada polas actividades ao redor da escritora Rosalía de Castro con motivo do aniversario do seu nacemento. Entre elas, a iniciativa o “Caldo de Gloria” da súa Fundación. Unha proposta inspirada no poema “Miña casiña, meu lar” no que a poeta explica como facer un caldo. Nesta liña, o venres convidamos ás familias a facer na casa e comer cos meniños un caldiño. Podedes seguir as instrucións que dá Rosalía no seu poema, ou facer a vosa propia receita.
A Asociación de
Escritores en Lingua Galega anima á cidadanía a celebrar o Día de Rosalía regalando
aos seres queridos un libro e unha rosa.
Dende a nosa escola unímonos a esta fermosa iniciativa
adaptándoa as idades dos nosos alumnos. En lugar do libro, os rapaces reescribiron e levaron para
agasallar un anaquiño personificado do fermoso poema “Parece unha rosa”.
A flor, elaborámola empregando os folios reciclados que
decoraramos imitando a técnica de Eric Carle que tanto nos gusta.
Xa chegaron ao correo da escola as primeiras fotos da
elaborada por Noa. Mirade nas imaxes que chuliña lle quedou e como se divertiu realizándoa.
O vindeiro 24 de febreiro conmemórase o Día de Rosalía de
Castro. Na nosa escola unímonos á celebración do aniversario do seu
nacemento con diferentes actividades. Comezamos quentando motores esta semana
coñecendo un pouco da súa vida e obra cos seus libros na hora de ler.
Este curso todo é diferente, pero non por iso menos
divertido. O venres comezamos a nosa particular festa co “Baile dos animais” e sesión de fotos.
Despois preparamos a receita semanal baseándonos na idea dos nenos de Ribadumia B empregando os folletos publicitarios dos
supermercados. Eliximos entre filloas e orellas, limos os ingredientes e buscámolos
na publicación.
Sen darnos conta chegou a hora do recreo e, tras
recuperar forzas cunha rica merenda de carnaval, gozamos dun solleiro día
xogando coa area.
Á hora de ler veu cargada de contos de Entroido e rematamos
a xornada decorando unha careta de peliqueiro.
Hoxe celébrase o Día Internacional da Muller e a Nena na Ciencia. Na nosa escola dedicámolo a coñecer a unha das pioneiras no estudo científico dos insectos: María Sibylla Merian. Esta naturalista realizou pinturas detalladas do ciclo vital de eirugas, escaravellos, abellas, moscas … Ela utilizaba acuarelas para elaborar os seus debuxos e nós quixemos coñecer e probar esa técnica.
O Entroido tamén chegou á biblioteca e Zapatocas xa nos
preparou un recuncho cheo de lecturas con este tema coma eixo central.
Como xa todos sabedes, este venres celebraremos a festa de Carnaval na aula disfrazados de animais no sentido máis amplo da palabra. Pero xa comezamos a quentar motores seguindo as ordes do Meco. Hoxe tocaba traer as uñas pintadas. Todos cumprimos o seu mandato como podedes ver na imaxe. Agora vos propoñemos xogar. A ver se adiviñades de quen son as mans.
Aproveitamos a ocasión para compartir convosco o precioso conto !Vivan las uñas de colores!
“A partir da Candeloria, ningunha ave voa soa”, con este refrán, a tradición popular anuncia o día do casamento dos paxariños. Celébrase o 2 de febreiro, co comezo do retorno das aves migratorias e os cortexos que preludian a chegada da primavera. Na nosa escola aproveitamos o bo tempo das últimas mañás para observar os que voaban pola contorna e escoitar os seus cantos. Agora vos propoñemos levar este acontecimento á cociña elaborando a seguinte receita.
Collemos a idea neste enlace pero neste outro tedes outra versión. Tamén aquí podedes atopar ideas e os máis atrevidos que fagan clic nesta ligazón.
Continuamos mergullándonos na lingua de signos e aprendendo novas palabras, nesta ocasión co contiño “Limón”. Paralelamente estamos reescribíndoo e memorizándoo a través da súa versión musicada.
Por se queredes practicar tamén na casa, deixámosvos os seguintes vídeos.
E xa que andabamos a voltas cos limóns, non podíamos deixar pasar a oportunidade de ir velos á horta da escola. Había bastantes froitos e a mestra Ana da aula de natureza repartiu a colleita ente todos.
Cada día, normalmente á volta do recreo, chega a hora de ler. Para ese momento temos unha bolsiña cargada de libros que imos cambiando. A diario, o encargado escolle entre eles cal lemos. Esta semana veu chea de libros de pingüíns. Paseniño imos lendo e aprendendo unha chea de cousas sobre eles.
Fai uns días decoramos folios imitando o xeito de pintar do ilustrador Eric Carle. Agora que xa secaron, chegou o momento de recortar, pegar e crear. Comezamos elaborando a bolboreta do seu contiño “Unha eiruga moi larpeira”. Pero seguro que cos papeis que nos sobraron realizamos outros collages.
