BOLBORETAS DE UVAS

O venres inauguramos o noso obradoiro de cociña cunha nutritiva receita con dúas froitas típicas do outono: as mazás e as uvas. Aos máis pequenos aínda lles custa entender que non se poden comer os ingredientes antes de elaborar a receita pero, paseniño e con agarimo, irán aprendendo.

¡CANTAS NOTICIAS!

Onte comezamos co traballo ao redor da prensa. Lucía tróuxonos varios xornais e,  tras reflexionar sobre que cousas podíamos atopar neles, empezamos a ver algunhas das novas que nos pareceron máis interesantes. Os efectos causado polo picudo nas palmeiras de Cambados, a liberación da tartaruga sen aleta que xa está recuperada, a marcha a China do oso panda… foron algúns dos artigos que limos, pero o da balea azul foi que máis interese espertou entre os nenos. 

OS NOMES NA NOSA CASA

Xa nos chegou o primeiro correo co lugar escollido para colocar o nome propio: o encerado. Sen lugar a dubidas Marcos elixiu o mellor sitio da casa para practicar como escribilo. A ver se alguén máis se anima a enviarnos fotos e continuamos publicándoas nesta entrada.

SEMANA EUROPEA DO DEPORTE

Hoxe con motivo da Semana Europea do Deporte, os meniños tiveron a oportunidade de practicar Zumba, judo, fútbol, pádel … No transcurso da mañá fomos rotando polas diversas actividades e coñecendo as posibilidades dos diferentes deportes. Rematamos moi cansadiños pero con  medallas para todos.

OS BONEQUIÑOS DE ROI

Cada outono o patio da escola enchese de landras, pequenos tesouros cos que os meniños enredan durante o recreo. En si mesmas xa teñen un gran valor para os cativos, pero se ademais lle engadimos un pouquiño de imaxinación e a axuda da familia, creamos autenticas xoias para os nenos. Hoxe quedamos abraiados cos que trouxo Roi para compartir connosco, mirade que riquiños.

CON LIBROS PARA CASA

Hoxe comezou a funcionar a biblioteca escolar. Zapatocas, a nosa mascota, tiña preparados os carnés cos números de lector de cada neno e paseniño fomos personificándoos.  Como xa vos comentaramos na reunión de principio de curso, cada alumno leva un libro a súa elección, menos ao que lle toca a mochila viaxeira que rotativamente pasará por todos os fogares. Para facilitar a viaxe dende a biblioteca ata casa, os contos van protexidos nunha bolsiña que  vos pedimos coidedes para que sirva durante toda a escolaridade.

COÑECENDO ÁS MESTRAS ESPECIALISTAS

Esta semana, a través de diferentes xogos e actividades, as mestras de audición e linguaxe, música, ximnasia, informática e inglés foron presentando aos meniños o traballo que van realizar nas súa clases. O venres dimos por rematado o período de adaptación e o luns xa comezamos co horario de especialistas e obradoiros que vos dimos na reunión de principio de curso.

COÑECENDO O AULA DE NATUREZA

Onte a mestra Ana veu a explicarlle aos meniños como vai ser o traballo que van realizar na aula de natureza durante o curso. Ensinounos as ferramentas e utensilios, falounos das medidas de protección, presentounos as súas mascotas e incluso mostrounos unha chea de sementes para que apreciaramos o diferente que poden chegar a ser. Para rematar contounos a bonita historia de “O carballo con botas” que ten unha semente moi especial como protagonista: a landra.

E falando de landras, mirade na foto que boneco máis xeitoso fixo con elas Laura e a súa mamá. Estes días o patio de recreo está cheo destes froitos secos e aos cativos encántalles xogar con eles. Neste enlace tedes varias ideas por se vos apetece a fin de semana axudar aos vosos fillos a levalas á práctica. 

A BANDA DE MÚSICA MUNICIPAL DE RIBADUMIA

Hoxe tivemos unha visita moi especial. Os músicos da banda municipal viñeron a ensinarnos algúns dos seus instrumentos e a darnos un pequeno concerto.  Escoitamos atentamente como auténticos chicos maiores pero tamén bailamos, cantamos e sobre todo rimos ao son da música. Para os que desexen máis información sobre a súa escola de música, poden visitar a súa web clicando aquí.

QUENTANDO MOTORES

Agora que os pequenos xa están adaptados á escola e os seus espazos, toca comezar co traballo propiamente escolar. Paseniño iremos aprendendo moitas cousiñas pero empezamos co nome propio porque é un texto sinxelo, curto e pleno de contido para o neno. Como outros anos, hoxe todos levaron para casa un folio plastificado co seu nome. Axudade ao voso fillo a colocalo nun lugar visible ( na porta da habitación, na neveira da cociña, no seu escritorio…)  para que dispoña dun modelo para reproducilo e poder avanzar na aprendizaxe da linguaxe escrita. Se vos animades, enviarnos unha foto a escoladeleiro@gmail.com del sitio escollido e publicaremos as imaxes no noso blog, seguro que aos cativos lle gusta velas.

TODOS XUNTOS

Tras unha semana de incorporación paulatina, o venres xa merendaron e xogaron no patio todos os meniños xuntos.

PREPARADOS, LISTOS… ¡XA!

Este curso son moitos os pequenos que se incorporan á nosa aula. Separase de papá e mamá non sempre é doado. Cada meniño víveo cun ritmo diferente. Paseniño, se temos moita paciencia e agarimo, todos conseguirano.

REUNIÓN PRINCIPIO DE CURSO

O vindeiro luns 11, as familias dos nenos da aula de Leiro, terán a reunión informativa de principio de curso ás 10:00 horas. Nela falaremos, entre outros, dos seguintes temas:

ü  Información xeral sobre o curso 2017/2018 e normas de funcionamento.

ü  Horarios dos nenos, mestres especialistas e de atención ás familias.

ü  Calendario escolar. Festas e saídas.

ü  Biblioteca escolar: normas de funcionamento e empréstito. As mochilas viaxeiras.

ü  Blog da escola.

ü  Período de adaptación dos novos alumnos.

Para desenvolver  o proxecto “O primeiro día de escola mellor en familia”,  os proxenitores virán acompañados dos alumnos. Mentres a titora fala convosco, eles quedarán a cargo doutra mestra realizando diversas actividades e xogos.

BENVIDOS AO CURSO 2017/18

Rematado o período de vacacións de verán, queremos dar a benvida a toda a comunidade escolar ao novo ano académico que hoxe comeza. Para a vindeira semana publicaremos a data e hora da reunión de principio de curso así como o calendario do período de adaptación dos novos alumnos. Mentes, para os que desexen ir organizándose, a continuación lles deixamos o calendario escolar 2017/18 da Comunidade Autónoma de Galicia.