FESTIVAL NADAL 2015

Hoxe xogamos e enredamos cos amigos, limos contos de Nadal, pintamos e coloreamos, escoitamos e cantamos panxoliñas, rimos cun contaconto en inglés, tivemos unha gran merendola, recibimos a visita do Apalpador, actuamos, bailamos … Foi unha mañá do máis completa. Agora toca descansar e gozar en familia. Volvemos o día 7 de xaneiro. ¡¡Bo Nadal!!

ENSAIANDO…

“Buscando Papá Noel a árbore de Nadal” é o título da panxoliña que imos dramatizar mañá no festival. Hoxe os cativos ensaiaron por última vez e, coma sempre, todos divertímonos facéndoo que é o importante.
 Para os que desexen cantala tamén en familia, a continuación vos deixamos o vídeo que prepararon  dela para os rapaces do CEIP Isaac Díaz Pardo. Aos meniños gústalle moito velo e cantar a modo de Karaoke.

PAPÁ NOEL

Este venres, para non quedarnos sen  o noso tradicional obradoiro de cociña, propoñémosvos realizalo na casa elaborando o simpático Papá Noel que fixo Carla. Na escola xa preparamos unha receita cos ingredientes e os cativos non dubidaron en enriquecer o prato coas máis diversas suxestións: chourizo para o gorro, flocos de millo para a barba, galletas salgadas e pebidas de chocolate para os ollos … se vos animades a cociñar esta ou outras receitas de Nadal cos nenos, xa sabedes … non dubidedes en enviarnos fotos a escoladeleiro@gmail.com e publicarémolas no blog.

CORRE QUE TE PILLO

Hoxe de novo baseámonos nos poemas de Federico García Lorca para brincar. Neta ocasión a segunda estrofa de “Los reyes de la baraja” serviunos para xogar ao pilla e rir pintando a cara dos atrapados. Para os que non se lembren dos seus versos, a continuación deixamos a versión musicada de Vicente Monera que tanto nos gusta.

E xa postos a enredar, fixemos un repaso de todos os xogos que aprendemos durante o trimestre, mirade nas fotos que ben o pasamos.

PREPARANDO O FESTIVAL DE NADAL

Elixir unha panxoliña, distribuír os personaxes, deseñar os traxes, recortar, pegar, probar, ensaiar … ¡Canto traballiño levamos preparando o noso festival, pero canta ilusión esperta nos cativos!. Como podedes ver no blog do colexio, o vindeiro venres 18 imos celebrar a festa de Nadal 2015, non esquezades que este ano realizarémola na Casa de Cultura de Ribadumia polo que os que aínda non trouxeron a autorización cuberta, teñen que facelo antes do xoves.

ANIVERSARIO DE JOSÉ

O REI MELCHOR

Despois de cociñar o Rei Gaspar e o Rei Baltasar, non podíamos deixar atrás o Rei Melchor. Agora xa somos uns expertos en isto de cociñar reis. Os meniños quedaron coas ganas de elaborar a Papá Noel así que, se vos animades a realizalo na casa, non dubidedes en enviarnos fotos a escoladeleiro@gmail.com e publicarémolas no blog.

O APALPADOR

Onte dedicamos a nosa visita semanal á biblioteca escolar a lembrar a figura do Apalpador, ese persoeiro que todos os anos polo Nadal baixa das montañas do Courel a deixarnos unha morea de agasallos. Son xoguetiños que el mesmo realiza coa madeira de mellor calidade que atopa. Vimos os seus contos e despois decidimos que xoguete queriamos que nos trouxera à escola para compartir cos compañeiros. Escribimos as cartas e xa as temos listas para darllas o día da festa de Nadal se pode vir a visitarnos.

¡ATA SEMPRE XOSÉ NEIRA VILAS!

Esta semana os xornais trouxeron unha mala nova, a morte do escritor galego Xosé Neira Vilas. Na nosa biblioteca escolar temos un dos seus libros “Cantarolas”, que tamén contén versos da súa compañeira Anisia Miranda.

Na nosa aula quixemos renderlle unha pequena homenaxe lendo algúns dos poemas contidos nesta obra e especialmente “Historia dun grilo”. Neste enlace da páxina web da Fundación Xosé Neira Vilas, tedes unha escolma de cancións compostas e interpretadas por músicos galegos inspirándose nestes poemas. A editorial Kalandraka acaba de sacar unha nova edición do libro ilustrada por Leandro lamas.

CONCURSO DE POSTAIS DE NADAL

Como todos os anos por estas datas, o Concello de Ribadumia organiza un concurso de postais de Nadal.  A nosa escola participa na categoría de infantil e o gañador recibirá un agasallo o día 5 de xaneiro ao remate da Cabalgata de Reis. Nas bases do concurso ven recollido que os traballos teñen que facer alusión ao Nadal. 

Para realizar ben os nosos debuxos montamos un recuncho con todo o material que atopamos relacionado co tema: tarxetas, revistas, contos, libros, postais … Os cativos observaron detidamente todos os fondos que tiñan ao seu alcance e, coa axuda da mestra Ana, foron decidindo que querían representar nos seus traballos. Na seguinte presentación podedes ver o resultado.

Pero sen lugar a dúbidas, o que máis gustou aos meniños foi introducir os seus debuxos na urna que onte trouxeron do concello para depositar os traballos.

¡CANTAS NANAS!

A semana pasada, na nosa visita semanal a biblioteca, descubrimos que no recuncho de nanas hainas de todas clases. E non soamente para durmir aos meniños, tamén para as gata, os vampiro e ata… ¡O Coco!. Ese persoeiro tradicionalmente malvado pero que en nós provoca risa, porque na versión de Gloria Fuertes que tanto nos gusta, é o neno quen leva a “O Coco” se durme pouco.

Pero, sen lugar a dúbidas, os cantos de berce preferidos dos cativos son os traídos da casa, eses nos que aparecen eles de pequerrechiños, co biberón ou a chupeta, no colo de mamá ou papá ou simplemente no berce. Eles están desexando ensinarllos aos seus amigos e as mestra e, como non podía ser doutro xeito, empregalos para arrolar a Zapatocas.

O REI BALTASAR