ANIVERSARIO DE MARCOS

III XORNADA DE EDUCACIÓN VIAL

Un ano máis, o pavillón de Sisán converteuse por unhas horas nun impresionante circuíto con semáforos, pasos de peóns, rotondas e sinais. Os meniños equipados con bicicletas, patinetes, motos e outros vehículos, puideron circular e aprender as normas básicas de educación vial grazas á colaboración da DXT, de Paco de Autoescola Barrantes e ao ciclista profesional Gustavo César Veloso. Rematamos a xornada cunha divertida actuación de monicreques titulada “Caperucita peatona y el lobo veloz” a cargo da mestras Montse de Lois e Olalla de educación física. Graciñas todos polo seu traballo e aos que contribuíron para que estas xornadas fosen posibles.

LETRAS GALEGAS 2018

Este ano o Día das Letras Galegas está dedicado a María Victoria Moreno. Na biblioteca estamos montando un recuncho cos libriños que esta autora ten publicados adaptados á idade dos nosos alumnos.  O luns limos e ilustramos un poema de “Eu conto, ti cantas”, unha bonita obra en verso que nos regalou o ANPA polo día do libro. Con estes debuxos e outros que fixemos no transcurso da semana, imos participar no III Concurso de Debuxo Letras Galegas que convoca o ANPA do CRA de Ribadumia.

Se na casa tamén queredes aprender cousiñas sobre a vida e obra de esta autora, podedes facer clic nas imaxes de abaixo e accederedes ás actividades en liña do Seminario Galán.

FLORES DE FROITAS

Coma todos os anos, no noso obradoiro de cociña tamén lle dImos a benvida á primavera preparando unhas nutritivas flores de froita.

EXCURSIÓN A PONTEVEDRA

Como outros anos, esta mañá fomos a Pontevedra a participar nas actividades organizadas para escolares por Afundación. A primeira hora asistimos á preciosa representación de teatro de monicreques Antón Comodón. A continuación vos deixamos un pequeno vídeo resumo da súa actuación.

Despois de recuperar forzas coa merenda, visitamos o Café Moderno, un emblemático edificio onde vimos a exposición “De mar a mar: O camiño de Santiago en 3D”. Utilizando unhas gafas vermello-cyan que nos regalaron, conseguimos o efecto das tres dimensións. Rematamos a xornada participando nun obradoiro onde os rapaces puideron deseñar o seu cuarto.

E CHEGOU O GRAN DÍA: I CONGRESO ALIMÉNTATE BEN

Despois de varias semanas organizando o material, facendo carteis e preparando obradoiros, o xoves chegou o gran día e marchamos cheos de ilusión ao Pazo de Congresos de Santiago a amosar o noso traballo. Ao chegar déronnos as acreditacións, montamos o noso stand e comezaron as actividades.

Os meniños, degustaron produtos lácteos, equipados de cestas realizaron unha compra saudable atendendo á composición do alimentos, probaron brochetas de froitas, xogaron cos persoeiros do Sabor da Aventura está no Mar, visitaron os stands dos outros colexios e rotativamente foron convidando a todos a coñecer o noso. Participaron en diferentes actividades lúdicas, educativas e deportivas e repuxemos forzas cun nutritivo menú.

 Despois do chantar viñeron os xogos e, a última hora a entrega de premios. O xurado concedeunos un accésit, un premio de innovación educativa que non supón contía económica, pero si o recoñecemento como boa práctica educativa digna de mención. Parabéns a todos o que fixeron posible este recoñecemento e a organización do evento polo ben que estivo todo estruturado e coordinado.

A continuación un pequeno resumo de todo o acontecido en fotos

O NOSO ESTAND DO CONGRESO NA TVG

Aínda que xa vos contaremos noutra entrada todo o acontecido hoxe no Congreso, adiantámosvos a reportaxe que saíu na Televisión de Galicia. Facede clic na imaxe e accederedes ao vídeo.

PREPARANDO O I CONGRESO ALIMENTATE BEN

Co obxectivo de recoñecer o traballo dos centros participantes no programa Aliméntate ben, fai uns meses, a Consellería organizou unha convocatoria para seleccionar dez centros de infantil e primaria que participarían no I Congreso escolar Aliméntate ben. O noso centro presentou un proxecto e, entre todas as candidaturas, fomos un dos dez escollidos de toda Galicia. Dende a nosa escola estamos moi contentos e queremos compartir con toda a comunidade educativa esta boa nova.

Durante o último mes, as maiores da clase xuntos cos nenos doutras aulas da escola, traballaron duramente para montar un stand e obradoiros onde mostrar o mércores 3 de maio no Palacio de Congresos de Santiago, o traballo desenvolvido no noso centro ao redor dos hábitos nutritivos saudables. Ademais, durante o congreso, un xurado valorará a calidade das propostas presentadas polo alumnado e seleccionará a mellor. Mañá, co alumnado seleccionado do centro, realizaremos un ensaio xeral e o mércores con moita ilusión marcharemos a Santiago.