O SAMAÍN NA BIBLIOTECA

O vindeiro mércores celebraremos na nosa escola a festa do Samaín. Para coñecer mellor esta tradición, Zapatocas preparounos na biblioteca un recuncho con contos e diverso material relacionado co tema. Paseniño estamos léndoos e entre risas enfrontándonos aos medos.

E como non podía ser doutro xeito, o Samaín tamén chegou ás clases de informática. A continuación vos deixamos un LIM por se queredes xogar tamén na casa. Picade na imaxe inferior e accederedes ás actividades.

UNHA MISIVA ESPECIAL

A semana pasada a irmá de Gael fíxonos chegar unha carta cun debuxo dun lobo que nos gustou moito. Decidimos redactar unha resposta e darlle as grazas por tan agradable presente. Entre todos puxémonos de acordo co contido e serviunos de detonante para traballar ao redor das partes dunha misiva. Entre isto e os contos de cartas que andamos a ler, aos meniños entráronlles moitas ganas de escribir aos seus amigos e familiares. Animádevos na casa a axudar aos nenos a envialas e veredes que ben o pasades e a ilusión que fai recibilas.

A PALMEIRA DA IGREXA DE LEIRO

Dende que limos no xornal que o picudo vermello continuaba a facer estragos nas palmeiras de Cambados, queríamos saber se a que está máis preto da nosa escola estaría afectada. Hoxe por fin chegou o bo tempo e, xuntos cos nenos de Ribadumia B, fomos a vela. Continúa tan bonita coma sempre e ademais de dar un agradable paseo, puidemos ver os seus froitos, o tamaño das polas e a súa gran altura.

COMER UN LOBO

Dende que limos este divertido contiño, decidimos que chegara o momento de cambiar as tonas e ser nós quen comera ao lobo. Así que se na casa tamén queredes cociñar un para merendar, a continuación vos deixamos a receita.

DÍA MUNDIAL DO CORREO

A mascota da nosa biblioteca tamén gusta de ollar a prensa diaria. O pasado mércores, no xornal que nos trouxo Marta, leu que cada 9 de outubro se celebra o Día Mundial do Correo. Quixo celebralo connosco e preparounos unha bolsiña coa noticia do periódico e unha chea de contos de cartas. Dende entón, cada día o encargado elixe cal quere que leamos. Son libros cheos historias, con sobres, postais e unha chea de sorpresas que paseniño imos descubrindo á vez que nos mergullamos no mundo das cartas.

¡CANTAS NOTICIAS!

A semana pasada foron moitas as novas que chamaron a nosa atención no Faro de Vigo: a invasión de abrollo en Arousa, un iate de luxo con helicóptero e lancha, o ataque de avespas velutinas ao condutor dun tractor … ata unha moi curiosa sobre o ioga para cans na revista semanal XL que nos trouxo Marcos. Pero foi no artigo sobre o picudo vermello de La Voz de Galicia de Erik no que estamos afondamos máis. Vimos esa mesma nova na prensa dixital e un par de vídeos sobre este daniño insecto que anda a facer estragos nas palmeiras. Cando o tempo o permita queremos ir ver o exemplar que hai preto da nosa escola para ver se está afectado, mentres vos deixamos un dos vídeo por se queredes saber máis sobre o picudo vermello.

A LÚA E OS LOBOS

No contiño Quen levou a lúa?  ao redor do que traballamos a semana pasada na biblioteca, limos que os lobos ouvean á lúa chea. Non sabemos se será verdade pero imos investigar e intentar aprender cousiñas deste impresionante animal.

Paralelamente estamos traballando a educación documental para comprender como está organizada a nosa biblioteca escolar. Cada semana facemos actividades cos libros que lemos para saber onde están colocados e como temos que facer para acceder á información que buscamos.

Para que dende a casa tamén coñezades cómo está organizada, a continuación vos deixamos a nosa guía de usuarios que hoxe levaron os alumnos novos e os veteranos o curso pasado.

PASTELIÑOS DE ABELÁS

O venres, chegou o momento de elaborar unha rica receita coas abelás que apañaramos na horta da escola. Mirade nas fotos que sinxeliña de facer e que saborosa.

O SISTEMA SOLAR

Onte aproveitamos a nosa sesión semanal no aula de informática para traballar ao redor do sistema solar. Para os que desexen aprender xogando tamén dende casa, a continuación deixamos o vídeo que vimos e os xogos LIM que realizamos. 

Picade enriba da imaxe e accederedes ás actividades.

A PRENSA NA ESCOLA

Grazas á colaboración das familias e á mestra Marta de Ribadumia que nolos traen, este curso a lectura dos xornais volve a formar parte das rutinas da nosa aula. Sempre que podemos, especialmente os martes e os xoves, ollamos o periódico e comentamos aquelas novas que nos parecen de interese.

Esta semana, a limpeza das praias de Vilagarcia dunha planta chamada abrollo chamou especialmente a nosa atención. Investigamos sobre ela, vimos vídeos e incluso a mestra Marta tróuxonos unha para observala. Descubrimos que bota ourizos con espiñas que produce danos nos pés das persoas, nas patas dos animais e picadas nas rodas das bicicletas. Así que moito coidadiño co abrollo.

ANIVERSARIO DE GAEL

REPARTIMOS AS CASTAÑAS

Hoxe descubrimos que algunhas das castañas que apañaramos estaban estragándose.  Con coidadiño separamos as que estaban picadas e observamos a eiruga que había no seu interior. Despois fixemos cucuruchos con folios que non servían e repartimos as que estaban en bo estado. Pero antes cada meniño contou as que les correspondían para levar todos o mesmo número.

INFORMÁTICA

A semana pasada comezamos coas clases de informática. Cada luns, a través de xogos, realizaremos diversas actividades para aprender a manexar o rato, facer clic, premer e arrastrar. Paralelamente empregaremos os ordenadores para reforzar contidos traballados na aula á vez que os meniños vanse familiarizando coa linguaxe informática.

Esta semana foi o contiño “A que sabe a lúa?” o que empregamos como detonante para traballar todos eses aspectos. Se na casa tamén queredes xogar picade na imaxe inferior e accederedes ao LIM.