ROSALÍA NA BIBLIOTECA

As propostas ao redor da figura de Rosalía de Castro tamén chegaron á biblioteca.

Xogos co seu nome, quebracabezas co seu rostro e, sobre todo, actividades cos seus poemas.

CALDO DE GLORIA

O pasado 23 de febreiro conmemorouse o Día de Rosalía de Castro. Como cada ano, unímonos á proposta de cociñar o “Caldo de Gloria” inspirado no seu poema “Miña casiña, meu lar”. Desta volta, acompañamos a receita dun código QR para facilitar o acceso á iniciativa. A través del podedes ver o poema que traballamos en clase e o vídeo onde un bo cociñeiro galego prepárao na na cociña da casa de Rosalía.

DÍA DE ROSALÍA DE CASTRO

 

O Día de Rosalía pasou a celebrarse o 23 de febreiro trala aparición de nova documentación  que desvela a data real do seu nacemento. Dende hai varios anos a Fundación Rosalía de Castro propón conmemoralo lembrando o poema “Miña casiña, meu lar”, no que unha muller pobre consigue facer un humilde caldo de gloria  a pesar de que carece de todo. Dende a nosa escola unímonos a esta iniciativa propoñendo a todas as familias elaborar un caldiño. Podedes ler as instrucións que da Rosalía no seu poema, empregar a nosa receita,  seguir os consellos de Xoanqui Ameixeiras do vídeo anterior ou facer a vosa propia versión.

MANTEIS PARA O CALDO DE GLORIA

 

A fundación Rosalia de Castro propuxo enviar manteis individuais co poema “Miña casiña, meu lar” aos comedores escolares que fixeran Caldo de Gloria. A mestra Marta de Ribadumia púxose en contacto con eles para informarlle de que, como na nosa non había comedor, as familias fixeran o Caldo de Gloria na casiña. E mandáronnos manteis para todos. Grazas profe Marta!

O CALDO DE GLORIA DE ERIK

 

OS MOUCHOS DE NOA, ERIK E MARTA

 

PARA MERENDAR… O MOUCHO DE ROSALIA

E xa que andamos a voltas cos mouchos, non podíamos deixar pasar a oportunidade de levalos ao obradoiro de cociña da fin de semana. Neste enlace tedes unha chea de opcións. Nós decantámonos por unha moi nutritiva a base de froitas. Facendo clic aquí tedes un vídeo co proceso. Pero se sodes máis de sándwichs, no seguinte tedes outra suxestión. 

ROSALIA NA BIBLIOTECA

 

As actividades ao redor da figura e obra de Rosalía de Castro tamén chegaron á biblioteca escolar. Zapatocas preparounos un recuncho con todos os fondos que temos desta autora. A nosa aula aproveitou as últimas visitas semanais a este espazo para lelos e facer actividades de relacionar as portadas cos títulos.

Ademais, a nosa mascota propuxo que cada escola contribuíra a decorar unha das paredes da biblioteca. Con tal fin debíamos empregar poemas da escritora relacionados co mundo animal. 

Na nosa aula escollemos o da imaxe anterior e memorizamos a divertida versión musicada por Migallas que vos deixamos a continuación.

O CALDO DE GLORIA DE MARTA

CALDO DE GLORIA

Esta semana veu marcada polas actividades ao redor da escritora Rosalía de Castro con motivo do aniversario do seu nacemento. Entre elas, a iniciativa  o “Caldo de Gloria” da súa Fundación. Unha proposta inspirada no poema “Miña casiña, meu lar” no que a poeta explica como facer un caldo. Nesta liña, o venres convidamos ás familias a facer na casa e comer cos meniños un caldiño. Podedes seguir as instrucións que dá Rosalía no seu poema, ou facer a vosa propia receita.

FELIZ DÍA DE ROSALÍA!

A  Asociación de Escritores en Lingua Galega anima á cidadanía a celebrar o Día de Rosalía regalando aos seres queridos un libro e unha rosa.

Dende a nosa escola unímonos a esta fermosa iniciativa adaptándoa as idades dos nosos alumnos. En lugar do libro,  os rapaces reescribiron e levaron para agasallar un anaquiño personificado do fermoso poema “Parece unha rosa”. 

A flor, elaborámola empregando os folios reciclados que decoraramos imitando a técnica de Eric Carle que tanto nos gusta. Esperamos que gocedes da poesía e das flores na casa tanto coma nós na escola.

UNHA TORTA DE AMORODOS PARA ROSALÍA

Ao rematar febreiro as fresas comezan a estar no seu mellor momento. Cada ano aproveitámolas para celebrar o aniversario de Rosalía de Castro cunha saborosa torta de amorodos con nata. Este curso non podemos realizala na aula, pero vos animamos a elaborala na casa e logo ler un dos fermosos versos rosalianos. Se non sabedes cal escoller, neste enlace tedes un vídeo co poema “Adiós ríos, adiós fontes” que o curso pasado realizamos no noso centro.

Xa chegaron ao correo da escola as primeiras fotos da elaborada por Noa. Mirade nas imaxes que chuliña lle quedou e como se divertiu realizándoa.

NA HORA DE LER… ROSALÍA DE CASTRO

O vindeiro 24 de febreiro conmemórase o Día de Rosalía de Castro. Na nosa escola unímonos á celebración do aniversario do seu nacemento con diferentes actividades. Comezamos quentando motores esta semana coñecendo un pouco da súa vida e obra cos seus libros na hora de ler.

HOXE ÚLTIMO DÍA…

Xa están listos para a montaxe os vídeos das mestras, agora soamente faltan os dalgunhas familias. Se aínda non o fixestes, soamente tedes que gravarvos en horizontal un minuto imitando un grupo musical ou como máis vos apeteza. Seguro que aos meniños gústalle verse xunto aos seus compañeiros no resultado final cando o publiquemos. Tedes toda a información aquí. A continuación vos deixo o vídeo coa musica que imos bailar para motivarvos.

LETRAS GALEGAS 2020

A mestra Lupe no seu blog de música invita a toda a comunidade educativa a participar nunha proposta moi especial para conmemorar o Día das Letras Galegas. Disfrazarse, bailar, cantar ... todo vale para realizar un pequeno vídeo que terá de fondo a versións do grupo Astarot do poema de Rosalía de Castro "Adiós ríos, adios fontes". Toda a información aquí. Animádevos a participar, xa veredes que divertido resulta cando Lupe faga a montaxe con todos.

LÍA POETISA

Mirade que poesía máis bonita inventou Lía. Nola enviou ao correo xunto con ese lindo debuxo de Rosalía de Castro e un bico para todos. Moitas grazas Lía por compartir a túa arte connosco. A ver se nos chegan máis poemas e enchemos o blog de versos.

NA CASIÑA CON POESÍA

O pasado 21 de marzo celebrouse o Día Mundial da Poesía. Para conmemoralo dende a nosa casiña, propoñemos aos meniños que nos envíen un anaquiño do seu poema favorito e o ilustren. Pode ser de calquera poeta ou inventado. Ou se o preferides enviar un audio ou vídeo recitándoo como suxiren na aula de Ribadumia. Para quentar motores, publicamos o que eliximos de Rosalía de Castro para o seu universo e que reescribiron e debuxaron entre todos.

Para os indecisos nos seguintes enlaces tedes algunhas suxestións

https://www.pequeocio.com/poesias-cortas-para-ninos-sobre-las-estaciones-del-ano/

https://www.guiainfantil.com/articulos/ocio/poesias/9-poemas-cortos-para-leer-con-ninos/

ANIVERSARIO DE ROSALÍA

Cada 24 de febreiro conmemorase o día do nacemento da escritora Rosalía de Castro con diferentes actos. Na nosa escola xa vén sendo unha tradición celebralo cociñando unha torta de amorodos con nata.

ROSALÍA XA TEN A SÚA ESTRELA

A candidatura da escritora galega gañou cunha gran maioría na votación celebrada para escoller o nome da estrela HD 149143. Vímolo a semana pasada na prensa dixital e aproveitamos para buscar en internet o Río Sar e falar da súa importancia na vida de Rosalía.

O SEGREDO DAS NOSAS ÁRBORES

Hoxe puxemos en marcha unha nova proposta que paseniño ira pasando polos fogares de todos os meniños. Trátase dun caderno viaxeiro para apoiar a candidatura da Figueira da Casa-Museo de Rosalía de Castro como árbore do ano 2020.  A Árbore Europea do Ano creouse para dar a coñecer a existencia dun valioso patrimonio natural e cultural que todos deberíamos apreciar e protexer. A diferenza doutros concursos, non é importante a beleza, o tamaño ou a idade da árbore senón a historia e a conexión coas persoas.

Todos e cada un de nós seguro que temos unha árbore singular na nosa vida. A árbore que plantou  o avó, a que serve de cabana para os nenos, a que nos acompañou sempre, a que nos dá esa magnifica sombra no verán … Para nós son importantes aínda que non sexan as máis grandes, nin as máis vellas, nin as máis bonitas.

Trátase de elixir esa árbore significativa da nosa vida e axudar aos nenos a escribir o seu nome nese caderno viaxeiro. Tamén podedes contarnos o seu segredo, o porqué esa árbore é especial para vós e pegar unha foto dela cos nenos ou se o preferides enviala ao correo escoladeleiro@gmail.com. Conforme cheguen á escola a idea é que os nenos conten aos seus compañeiros esas vivencias relacionadas coas árbores e deste xeito valorarán, apreciarán e protexerán máis o medio ambiente.