MAÑÁ: ESTAMOS DE FESTA

Non vos esquezades, mañá celebramos a festa do Samaín e aínda estades a tempo de apañar na horta unha cabaza e decorala. Se non tedes, non vos preocupedes, hoxe na clase xa estivemos facendo probas cunha xigante que nos trouxo a mamá de María e outra mediana das de Martiño. Cando teñen o primeiro contacto coa polpa da cabaza, algúns nenos senten noxo  e non queren tocala,  pero cando xa conseguen ter as mans empezoñadas, pásano en grande coas sensación  que esta textura produce. É divertido ver como escorregan as sementes cando queremos collelas. Para que o vindeiro curso todos poidamos ter moitos calacús, estivemos a separar as pebidas para levalas para casa e sementalas. Pero primeiro temos que esperar a que sequen para que non se poñan podres.

ANIVERSARIO DE ANDREA, JOSE ANTONIO E PABLO

O pasado venres os catarros deixáronnos sen apoio no obradoiro de cociña, pero os maiores, que xa son especialistas nesto de facer tortas de chocolate,  fixéronse responsables do tema e axudaron sen problemas aos máis pequenos e inexpertos. Para evitar enredar tanto, tivemos que renunciar a usar a nosa louza e cambiala por utensilios de plástico rexeitables, pero polo demais, xa estamos adaptados a cociñar para un maior número de comensais.

XOGANDO CO MILLO

Pouco a pouco imos descubrindo que, con ganas e imaxinación, son moitas as posibilidades lúdicas que ten este humilde cereal. Co follato e as barbas da espiga, Martiño e a súa mamá, fixeron a simpática boneca da imaxe. Na escola, con carozos estivemos levantando a torre do poema de Antonio Machado. Hoxe, no libriño Xoguetes e sons da natureza que temos na biblioteca de aula, vimos como facer un colar con grans de millo e un bailarete cun anaco de carozo. Seguro que vós tamén tedes múltiples propostas, se nolas enviades poderemos publicalas para aprender e divertirnos todos.

FROITOS DE OUTONO

Grazas á colaboración das familias, o noso recuncho vaise enchendo de: cabazas, castañas, landras, marmelos … Nos vindeiros días, paseniño, iremos observando, comparando e estudando todos os froitos. Esta semana ímola dedicar ao millo. Hoxe estivemos vendo cales era as partes da espiga e como se chamaban, como tiñamos que facer para esfollar e que hai utensilios que facilitan o traballo. Pero o que máis nos gustou foi debullar. Ao principio custounos darlle con xeito, os nosos dediños esvaraban e os grans non saían, pero despois non queríamos parar. No encerado dixital vimos que coas espigas poden facerse bonecas e xoguetes como os das imaxes. Seguro que os nosos avós saben desto unha chea e nos poden facer algunha para traer a clase e ensinar aos nosos amigos. Os nosos maiores tamén foron pequerrechiños e xogaban a crear os seus propios xoguetes, animádevos a ensinar aos máis pequenos toda esa riqueza do noso patrimonio e evitemos que se perda.

MONSTROSÁNDWICH

Un par de rebandas de pan de molde, unha de chourizo, outra de queixo, un anaquiño de xamón york, relado de cenoria, un tomate cherry e unha oliva. Isto é o que usamos o venres para crear un auténtico monstro que non dubidamos en comer enteiriño. Aínda que houbo algún meniño que primeiro lle fixo a autopsia para quitarlle o tomate, a cenoria, a oliva… Deste xeito comprobamos que á hora de merendar monstros cada un ten os seus gustos, hai quen o prefire sen chourizo e outros con porción dobre de tomate, quen descubriu que a cenoria está rica e quen tiña claro que son indixestos e soamente comeu o xamón… A min persoalmente gústanme os monstros vexetais pero é cuestión de probar, o que está claro é que, se os monstros entran na clase de Leiro, ¡merendámonolos!.

¡QUE RICAS AS UVAS!

Tróuxonolas a mamá de Carlos e estivemos comendo nelas toda a semana. O outono ven cargado de froitos: uvas, castañas, noces, abelás, millo, cabazas, marmelos, mazás, landras, cogomelos… As previsións meteorolóxicas dan melloría para a fin de semana, a proposta é aproveitar para saír á horta e ao monte a apañar  neles. Se atopades, podédelos traer para observalos na aula e montar un recuncho de froitos do outono con todos. Seguro que nos divertiremos e aprenderemos moito xuntos. Coa mestra Ana estamos a mergullarnos no mundo dos cogomelos, se queredes ver o que están a facer os cativos, visitade o seu blogue da natureza ou picade directamente aquí.

EN OUTUBRO, ANTONIO MACHADO

Este é o autor que eliximos para o mes en curso no noso calendario escolar da poesía. Gústanos sobre todo o seu poema “La plaza tiene una torre”, especialmente a parte onde o cabaleiro leva a flor, a dama, o balcón, a torre e ¡ata a praza!, aínda que non entendemos moi ben como fai para conseguilo. Pero nos divertimos cando xogamos coa mestra a que o cabaleiro tamén leva algún dos nosos nomes e temos que intentar adiviñar de quen se trata. Por certo, sabedes a quen está a levar nesta ocasión… ¿quen se anima a mandar un comentario coa resposta?...

UN MENÚ MONSTRUOSO

Como pratos fortes, “Pantasmiñas de arroz”, “Arañas con ovos recheos” e “Dedos de salchichas cortadiños”. Para a sobremesa, “Mazá con miñoca de gominola”, Dentadura de mazá con piñóns” e “Ourizo cacho de pera e púas de piñóns”. Este divertido e terrorífico menú cociñárono Mencía e súa familia esta fin de semana, e como podedes comprobar nas fotos, pasárono de medo. Nestes días chuviosos de outono, nada mellor que organizar unha “monstruosa” comida familiar para ir preparando a festa do Samaín.

E non vos esquezades de enviarnos o “monstro bocata”, Mencía púxolle ata sombreiro para que fora monstruosamente elegante. Graciñas papá e mamá por compartir connosco estas propostas.

EXIPTO ESTÁ EN ÁFRICA

Vímolo a semana pasada nun mapa xigante que ten a mestra en clase. Ao principio custounos un pouquiño situarnos, pero despois os maiores rapidamente aprendemos a distinguir as zonas de auga, e como Exipto está na puntiña pegadiño ao mar…

MONSTRORECEITAS

O noso compañeiro Felipe da escola de Ribadumia, envíanos as fotos das receitas que preparou na casa coa súa mamá. Á súa creación chamoulle Monstro Comeaceituanas e está causando estragos entre as olivas do país. Para todos aqueles que estean animados a participar no noso blogue coa súa “foto receita” pero necesitan inspiración, recomendámoslle o libro que temos na nosa biblioteca escolar “Sándwiches  divertidos” e os outros títulos da colección “Diversión en la cocina” da editorial Arguval.

O monstro Comeaceitunas e os seus amigos 

ESTE VENRES COCIÑAMOS NA CASA

Esta semana o calendario laboral deixounos sen obradoiro de cociña ao ser festivo o venres. Dende o noso blogue propoñémosvos continuar con el na casa. Como andamos a voltas cos monstros, ¿que vos parece elaborar un “monstrobocata” como o da imaxe que atopamos na rede?. Se vos animades a realizalo, enviarnos as fotos ao enderezo da escola escoladeleiro@gmail.com. e publicaremos as vosas “foto receitas”, seguro que nos divertiremos dobremente: cociñándoas e vendo os resultados dos compañeiros.

O NOSO RECUNCHO DE MONSTROS

Contos, películas, DVDs, camisetas, peluches, xoguetes… pouco a pouco, e coa colaboración das familias, o noso recanto vaise enchendo de toda clase de ogros e monstruosidades. Hoxe, na hora de ler, a maiores da nosa bolsiña especial de lectura, puidemos escoller entre todos os libros deste peculiar  recuncho. A nosa encarga de decantouse por  “Una bicicleta para Coco”. Ademais de pasar un bo rato coñecendo a este simpático amigo do monstro das galletas, aprendemos a escribir o seu nome e a atopalo nos títulos dos contos.

FÉLIX ESTÁ EN EXIPTO

Contóunolo nunha carta que limos a semana pasada. Nela fálanos de pirámides, camelos, desertos, incluso dun río chamado Nilo… Hoxe, na biblioteca escolar, estivemos vendo os libros de Exipto que hai nela. Temos moitos e puidemos observar algunhas das cousas das que nos falou Félix. Tamén descubrimos outras sorprendentes: uns signos estraños que a mestra chamou xeroglíficos, reis e raíñas, xoias… ¡ata momias! E o que moitos non se esperaban: ¡que existen de verdade!. Nas vindeiras semanas iremos recompilando e organizando toda a información sobre este marabilloso país que o noso amigo está a visitar. Por agora, xa sabemos que se queremos atopar información de Exipto na biblioteca, temos que buscar na zona documental no número 9, nos libros que teñen unha pegatina branca.