O NOME DE NOEL

 

Noel xa lle ten atopado o lugar ideal ao seu nome na casiña. El optou polo salón, o espazo que máis usa. Quedoulle perfecto no andel!  A ver se alguén máis se anima a enviarnos o sitio escollido.

O COCHE DE UVAS DE NOEL

 

Noel tamén realizou a nosa proposta culinaria con uvas. El prefire chamalos coches de carreiras. Mirade nas fotos que nos enviou que ben lle saíron. 

TESOUROS DE OUTONO

Coa chegada do outono o parque da nosa escola énchese de pequenos tesouros: castañas, ourizos, landras, follas de diferentes formas, tamaños e cores … Con eles cada día a hora do recreo convértese nun recurso cheo de posibilidades didácticas que aproveitamos de diversos xeitos.

A semana pasada a recollida e o reparto de castañas serviunos para traballar as cantidades e o reconto. Cada meniño levou cinco para casa. Se vos animades a cociñalas podedes enviarnos fotos ao correo e comentarnos se estaban ricas.

Ás veces, desprender as castañas dos ourizos sen picarse tamén é todo un esforzo de coordinación.

 As castañas gordas hainas que separar das planas que carecen de valor culinario, pero teñen un potencial impresionante para a creatividade artística. Mirade na imaxe que estegosauro máis espectacular fixeron Noa e Aarón empregando as castañas planas para as púas do lombo e as landras para as patas.

OS COCHES DE UVAS DE LÚA

Xa temos outra cociñeira na nosa escola. Lúa e o seu irmán Roi tamén se animaron a elaborar a proposta culinaria da semana pasada. Que coches máis ricos!

DINOSAUROS

¿SOY TUYO?

 

Hoxe na nosa visita semanal á biblioteca, Zapatocas tiñanos preparado este bonito conto. Con el comprobamos que non todos os dinosauros son iguais e decidimos comezar a investigar ao redor destes impresionantes seres. Preparados para acompañarnos?

OS COCHES DE UVAS DE ANTÍA

 

Antía tamén animouse a elaborar os coches de uvas que propuxemos a semana pasada. Mirade nas fotos que nos enviou que chuliños lle quedaron. Grazas Antía por compartir as imaxes connosco!

O COCHE DE UVAS DE BRAIS

 

Aproveitando que é tempo de vendima e as uvas están no seu mellor momento, inauguramos as nosas propostas culinarias da fin de semana cunha divertida receita: un coche de uvas.

Brais, coa axuda da súa irmá Lía, xa se animou a elaborala. Mirade nas fotos que nos mandou que chuliño lle quedou.

Grazas familia por compartir as imaxes connosco!

O NOME PROPIO

Coma todos os anos, o nome propio é o primeiro texto ao redor do que comezamos a traballar na aula.  Para o alumnado de infantil é un texto sinxelo, curto e cheo de contido. En clase estamos vendo como se escribe o de cada neno, contando cantas letras teñen e outras actividades a través dun pequeno proxecto que desenvolveremos nas vindeiras semanas. 

Se vos apetece, na casa tamén podedes facer as mesmas propostas pero cos nomes da familia. E non esquezades colocar nun lugar visible o cartel que levaron os nenos para casa co seu nome escrito.Se vos animades podedes enviarnos unha foto do lugar escollido a escoladeleiro@gmail.com e publicaremos as imaxes. Seguro que aos cativos lles gusta velas.

FELICIDADES MARIA!

 

Por fin chegou o día polo que María levaba semanas agardando. Hoxe cumpriu 5 anos e en canto chegou á escola quixo preparar a súa torta de aniversario. Parabéns!

A BIBLIOTECA ESCOLAR

 

Rematado o período de adaptación dos novos alumnos, esta semana comezamos co horario habitual de actividades. Onte foi o día de visita á biblioteca escolar. Alí recibiunos Zapatocas, a mascota, puidemos ver unha chea de libros e levar para casa o que máis nos gustou.

BENVIDOS AO CURSO 2022/23

Tras o período estival chega a volta ao cole. É o momento do reencontro cos amigos do curso anterior e de coñecer aos novos compañeiros. O primeiro día arroupados polas familias pero, enseguida, coa autonomía que dá a confianza do ambiente seguro.

Nesta primeira semana os pequenos foron coñecendo espazos e actividades. Os maiores retomando a rutina escolar. Para a vindeira semana, rematado o período de adaptación, comezamos co horario de especialistas. Benvidos ao novo curso!