TORTA DE CHOCOLATE

O venres tíñamos todo preparado para comezar co noso obradoiro de cociña celebrando o aniversario de María. Pero os catarros, mocos e virus que esta semana andan a facer estragos entre os cativos da escola, provocaron que a nosa homenaxeada enfermase. Dende aquí lle mandamos moitos biquiños de eses que curan, para que o vindeiro venres poida apagar todas as candeas e festexar na aula o seu aniversario. Os que superaron o contaxio, non querían quedarse sen clase de cociña así que, tras lavar moi, pero que moi ben as manciñas, comezamos a preparar a torta. Mollar as galletas no leite sen rompelas, lembrarse de que non se poden comer antes de tempo, estender o chocolate, poñer outra capa de galletas, non meter os dedos na boca, limpalos co papel… pouco a pouco a torta foi collendo xeito e nós experiencia. Despois veu o mellor, comela entre todos. E por último o peor, fregar e recoller todo.

EN SETEMBRO: ANTONIO GARCÍA TEIJEIRO

Este mes, no noso “Calendario escolar da poesía” que realizáramos o ano pasado, dedicarámosllo ao escritor Antonio García Teijeiro. No seu momento, centrarámonos no seu libriño de poemas titulado “Ventos”, pero no transcorrer de setembro son varias as obras que vimos deste autor: “As catro estacións”, “Aloumiños”, “Volando por las palabras”… Esta semana fixemos varias actividades ao redor do seu poema “Un bico” e onte Paula tróuxonos un libro, “Para cantar e contar” no que aparece esta poesía. Nel, Antonio García Teijeiro, escribe un conxunto de doce sinxelos e fermosos poemas que teñen en común o motivo dos bicos. Dende a nosa escola mandámoslle un biquiño moi especial á avoíña de Paula por darlle e compartir con nós este fermoso libro.

NA MIÑA HABITACIÓN: O MEU NOME

Ou na cociña, ou no salón… en calquera sitio, con tal de que estea nun lugar ben visible e sirva para identificar as miñas cousas. Para os máis pequenos da aula, con letras maiúscula sinxelas; para os que xa o teñen controlado dende o curso pasado, acompañados do seu primeiro e segundo apelido; e para os maiores, en letra minúscula e ligada, para avanzar na aprendizaxe da linguaxe escrita. Dende os 3 anos, con seus nomes, ademais de ir aprendo o abecedario, descobren hipóteses sobre a linguaxe escrita tan importantes como saber que as distintas palabras escríbense con letras diferentes, que para cada palabra as grafías son sempre as mesmas e aparecen na mesma orde, que o número de letras no garda relación co tamaño das cousas ou persoas… Por todo isto, non vos esquezades de axudar ao voso fillo  a colocar na súa habitación nun lugar visible o seu nome.

CON CONTOS PARA CASA…

Hoxe, comezou a funcionar a nosa biblioteca escolar. Dende que viramos o bonita que quedara tras as obras de mellora, tíñamos unha chea de ganas de poder levar libros para casa. Os luns é o día semanal que temos asignado para gozar das súas instalacións. Lemos contos, realizamos traballos ao seu redor, miramos as ilustracións, aprendemos onde e como están organizados os libros... pero ao principio costa, os pequenos porque é o primeiro día que levan empréstitos para casa e, os maiores, porque ao cambiar a súa localización non atopan o que desexan…

Pouco a pouco todos van escollendo, uns coas ideas claras, outros cun chisquiño de axuda, pero o importante é que as bolsas de biblioteca e as mochilas viaxeiras xa comezaron a súa andaina anual polos fogares dos cativos.

E POR FIN… ADAPTADOS

Os primeiros días houbo quen non quería separarse de mamá, quen non se lembraba cómo se escribía o seu nome, quen esqueceu que non se podía pegar …  pero, tras unha semana de escola, xa estamos collendo o ritmo. Os maiores lembrando o que aprendemos o curso pasado e, os pequenos,  familiarizándose coa escola e os seus espazos. Para a vindeira semana, rematado o período de adaptación dos máis novos,  xa comezamos coas clase de psicomotricidades, inglés, música …

ADAPTÁNDONOS…

Ao cambio de escola ou a vir por primeira vez, ao aumento de compañeiros ou a estar sen mamá, á nova mestra ou a compartila con outros, a deixar o chupete na casa ou a erguerse cedo, a compartir os xoguetes ou a deixalos recollidos, a realizar tarefas ou a respectar un horario … ¡Cantos cambios nun par de días!... Para todos supón un esforzo os primeiros días de escola, pero con paciencia e agarimo, todos imos adaptándonos á nova situación, cada meniño na súa media e cosas súas circunstancias.

REUNIÓN DE PRINCIPIO DE CURSO

Lembrade que mañá mércores ás 10:30 teremos a reunión de principio de curso. Nela proporcionarémosvos información sobre as normas de funcionamento do novo ano académico, comentaremos as actividades previstas, os horarios dos nenos e de atención ás familias, falaremos de todo aquilo que sexa de voso interese e aclaremos as vosas dúbidas.  Deberedes acudir acompañados dos vosos fillos, mentres nós conversamos, outra mestra estará con eles para facilitarlle a incorporación á escola.

PREPARANDO “ESES PRIMEIROS DÍAS”…

Mentres na escola imos organizando todo para que os nenos se sintan cómodos dende o primeiro día de escola, dende a casa tamén hai algunhas cousiñas que temos que ter en conta para facilitarlles “eses primeiros días” e facer máis agradable o comezo do curso.

Durante as vacación os pequenos adoitan erguerse tarde. Agora toca cambiar horarios para adaptarse ao ritmo do colexio. Para evitar enfados e berros o primeiro día de escola, nesta semana debemos comezar a adiantar de forma progresiva a hora de erguerse e deitarse. A falta de sono e de descanso inflúe moi negativamente no comportamento dos cativos e no seu rendemento escolar. Os nenos deben ir cedo para cama e xa sabedes que nada mellor para axudar a conciliar o sono que un bo conto.

No seguinte enlace http://www.serpadres.es/3-6-anos/educacion-y-desarrollo/el-abc-de-la-vuelta-al-cole.html tedes un artigo con algúns consellos de interese  para facer máis doada “a volta ao cole”.

¡BENVIDOS AO CURSO 2012 / 2013!

Este ano ven cargado de novidades. Espazos renovados na biblioteca do centro e nova distribución da zona de literatura infantil, consulta e empréstito. Aumento do número de compañeiros aos que coñecer, cos que xogar e aprender, pero tamén cos que compartir. Novos mestres especialistas en música e audición e linguaxe.  

Pronto teremos a distribución de horarios e actividades, para os que se queiran ir organizando, aquí vos deixamos o calendario escolar 2012 / 2013, pero lembrade que non están incluídas as festas locais.

Dende este blogue desexamos a todos, maiores e pequenos, un estupendo curso 2012 / 2013.