UNHA CHEA DE DEPORTES

A pesar da choiva, o pasado venres asistimos á xornada de exhibición de deportes organizada polo Concello de Ribadumia. Durante toda a mañá, en sesións de 15 minutos,  puidemos coñecer e practicar tenis, baloncesto, capoeira, lanzamentos, fútbol, ioga, pole dance e tenis de mesa. Mirade nas fotos que ben o pasamos.

¡AO RICO BOCATA!

Xa están en marcha os álbums para converterse en Capitán Arroaz. Co obxectivo de fomentar o consumo de peixe, cada martes, os meniños que traían e coman bocatas de produtos do mar: atún, mexillón, sardiña … lograrán un selo para o seu álbum. Cando o completen, Os Arroaces daranlle un diploma e unha sorpresa.

COÑECENDO A ZAPATOCAS

Onte comezou a funcionar a nosa biblioteca escolar. Cada luns pasaremos parte da xornada nas súas instalacións realizando diversas actividades. Empezamos presentando a nosa mascota Zapatocas aos novos alumnos e actualizando e personificando os carnés de biblioteca. Despois, cada neno escolleu un libro para levar a casa, menos ao que lle tocou a mochila viaxeira. Esta última irá pasando por todos os fogares e ten como obxectivo dar a coñecer algúns dos fondos e materiais dispoñibles.

TESOUROS DE OUTONO

Coa chegada do outono son moitos os froitos que a natureza nos ofrece. Figos, abelás, landras, castañas … cada día, nas nosas andainas descubrimos pequenos tesouros que levamos ao aula e aproveitamos para diversas actividades. Esta é unha das moitas avantaxes dunha escola rural coma a nosa. A semana pasada empregamos landras para contar e abelás para xogar a “Rabo de boi”. Hoxe tocoulle quenda as castañas e foron moitas as que apañamos. Nos vindeiros días repartirémolas e os meniños poderán degustalas na casa ou gardalas para o Magosto.

OBSERVANDO A LÚA

Mirade que fotos máis bonitas da lúa chea enviounos a mamá de Marcos. Agora xa a temos en cuarto minguante, pero … por que cambiou de forma? Como o fixo? O seguinte vídeo, que veremos mañá na clase de informática, responde a estas e outras preguntas. 

Animádevos a seguir mandando fotos e a observar detidamente o ceo cos vosos fillos, seguro que quedades abraiados.

COMEZAMOS COAS ANDAINAS

Un ano máis, imos a sumarnos á idea das escolas da milla coa nosa propia versión adaptada as idades dos nosos alumnos. Co obxectivo de evitar o sedentarismo, cada día sairemos a camiñar pola contorna escolar ata sistematizar un quilómetro diario. Deste xeito, ademais de evitar a tan prexudicial obesidade infantil, serviranos de adestramento para a final de curso facer o anaquiño do Camiño de Santiago que pasa pola nosa localidade.

LÚA CHEA

Con motivo do 50 aniversario da chegada do home á Lúa, este curso faremos un proxecto que terá este satélite coma protagonista. Hoxe, cos meniños, vimos no calendario da escola que esta noite haberá lúa chea e comezamos a falar dela. Aproveitando o bo tempo, animamos a todas as familias a que esta noite dediquen uns minutiños a observala cos nenos. Se vos animades podedes quitarlle fotos e mandalas ao correo da escola escoladeleiro@gmail.com . Publicaremos as imaxes neste blog, seguro que aos meniños lles gusta velas e comparala coas dos seus compañeiros. Paralelamente na aula serviranos de detonante para comezar a investigar e a aprender cousiñas sobre este astro.

Mentres que os maiores da clase van quentando motores, os pequenos continúan co seu período de adaptación ampliando o número de horas de permanencia na escola e facendo novos amigos.

A VOLTA AO COLE

Aínda que onte foi o primeiro día de escola, os meniños acudiron á escola arroupados polas súas familias e tivemos unha xornada escolar informativa e de adaptación ao novo curso escolar. Hoxe os maiores xa acudiron en horario completo e os máis pequerrechiños continuaron co seu período de adaptación. Paseniño iremos collendo ritmo e retomando todas as actividades.

BENVIDOS AO CURSO 2019-20

Tras a parada estival xa estamos de volta para darvos a benvida ao novo ano escolar. Lembrámovos que o vindeiro mércores día 11 ás 10:00 horas teremos a reunión de princio de curso onde falaremos de todo o que temos programado. Non esquezades vir acompañados dos nenos, haberá unha mestra para estar con eles facendo actividades mentres nós falamos. Aos novos alumnos serviralle para ter un primeiro contacto coa escola arroupados pola súa familia e aos maiores para comezar con máis ganas.

Para os que desexen ir organizándose, arriba teñen  o calendario escolar e, a continuación,  o horario do período de adaptación dos novos alumnos. 

Se tedes calquera dúbida podedes chamar ao colexio ou enviarnos un correo electrónico a escoladeleiro@gmail.com.

Para ver mellor as imaxes, facer clic enriba delas.