EXCURSIÓN AO CAMPING FIEITÁS

Xogos de praia, obradoiros, construcións de chozas, cancións… estas foron algunhas das actividades que realizaron os cativos no cámping Fieitás. A pesar do mal tempo dos últimos días, onte en O Grove puidemos gozar dunha xornada cunha temperatura ideal. 

NOS DÍAS DE CHOIVA… VISITA AO SALÓN DE PEITEADO

Volven os días de choiva e non podemos saír ao patio de recreo, pero si xogar nos diferentes recunchos da aula. Unha boa opción é aproveitar o mal tempo para lavar, peitear e amañar os cabelos no salón de peiteado que temos no recanto dos disfraces. Mergullados no seu xogo simbólico, os cativos deixasen acicalar cunha paciencia admirable.

¿QUÉ VUELA?

No noso calendario escolar de adiviñas xa chegamos a xuño. A que escollemos para este mes é ben doada de acertar. O libro onde a atopamos contén 21 adiviñanzas relacionadas con animais ou obxectos que voan.  Seguro que sabedes a resposta… Agora soamente vos queda mandar un comentario coa solución… ou necesitades máis pistas…

LIM: FELIX EN NOVA YORK

ANIVERSARIO DE ANXO

TOUPORROUTOU A ONDE VAS NENA?

O luns, na nosa visita semanal á biblioteca, traballamos outra das conversas entre a lúa e o sol da obra de Roberto Vidal Bolaño. Cando levemos o noso pequeno escenario de monicreques para casa, poderemos volver a xogar a representar este fragmento.

O COELLO NA HORA DE LER

Dende que rematamos con Don Quixote, a nosa bolsiña de lectura veu cargada de libros de coellos. Hai exemplares que nos axudan a coñecer como nacen, medran ou alimentan, pero tamén contos nos que os seus protagonistas son estes animais. Na “Colección sentimientos” un coelliño axúdanos a recoñecer os nosos sentimentos e reaccións, con cada libro que lemos reflexionamos sobre as situacións nas que temos medo, enfado, tristeza… e buscamos alternativas que nos fagan sentir mellor en cada momento. O  “O coelliño Branco” lembrounos os ricos repolos que cultivamos coa mestra Ana no noso invernadoiro. Coa  fábula “Los dos conejos” descubrimos as consecuencias de perder o tempo discutindo… A ver mañá que libro de coelliños lemos, todo dependerá do que escolla o encargado.

¡EU NON FUN!

Este é o título do conto no que se basearon Martiño e a súa irmá Lía para preparar o teatro que hoxe puxeron en escena. O seus papás tamén traballaron duramente para crear o escenario de monicreques no que se desenvolveu a historia.

Pero todos gozamos vendo como estes pequenos artistas movían os personaxes e dramatizaban o enredo. Ao final ata nos deixaron tocar a arrepiante araña que desencadea a intriga e deleitáronnos cunha segunda actuación mellor ca primeira. Graciñas.

ADIVIÑA PARA O MES DE MAIO

¿Estades preparados?... Ven no libro “Adivinanzas” da editorial La Galera, o exemplar trae solapas para agochar a resposta, hai que intentar descubrir que hai detrás, as ilustracións con gran sentido do humor, axudan a conseguilo. ¿Tedes xa a solución para enviar un comentario?...

COÑECENDO NOVA YORK

Pouco a pouco imos familiarizándonos con esta cidade. Sen lugar a dubida o primeiro que chama a atención dela son os seus rañaceos, o Empire State é o máis coñecido, aínda que o que máis lle sorprendeu aos cativo foi a imaxe de King Kong que adoita acompañalo nalgunhas ilustracións. Pero en Nova York temos moito por descubrir. O primeiro, coma sempre, buscar información, e as guías de viaxe que temos na nosa biblioteca escolar son a mellor opción, pero hai que ter claro cales son as que falan de Nova York e cales son da mesma colección pero fan referencia a outras capitais.

XEADO REXENTE

Faltábannos as fotos do obradoiro de cociña da semana pasada e aquí están. Se vos animades a facelo na casa, soamente necesitades galletas, xeado do voso sabor favorito e un rodillo.

FESTA DOS MAIOS 2013

Onte, para darlle a benvida á primavera, celebramos na escola a festa dos Maios. A primeira hora pensabamos facer os colares de flores e despois subir andando ao Monte do Castro para ver as escavacións arqueolóxicas. Pero este ano o inverno non quere marchar e, co frío e a choiva, non puidemos saír do centro. Pero nós puxemos ao mal tempo boa cara e, mestres as mestras vestían o maio co fiúncho, os cativos enfiaron flores para decoralo, realizaron tarxetas conmemorativas, leron contos, debuxaron e... os bocadillos, como non puidemos comelo no monte, merendámolos tranquilamente nas nosas cadeiras. O mellor coma sempre quedou para o final: cantar ao redor do maio a ritmos de claves e co Grupo Alecrín ao compás do acordeón. O repertorio:  O Pirimpimpin,  A Rianxeira, O xogo da Carrasquiña e A saía da Carolina, se clicades enriba de cada título poderedes improvisar un karaoke e cantar tamén vos na casa.

TOUPORROUTOU DA LÚA E DO SOL

Das obras de Roberto Vidal Bolaño, esta é unha das que mellor se adapta ás idades dos nosos nenos. Hoxe, baseándonos nas ideas do Seminario Galán, construímos o pequeno escenario de monicreques que podedes ver na imaxe. Nel, pouco a pouco, iremos representando diversas conversas entre a lúa o sol sacadas de fragmentos de “Touporroutou da lúa e o sol”. Hoxe comezamos con esta:

ADIVIÑAS DE PAPEL

Este é o libro de adiviñanzas que escollemos para o mes de abril. A elixida parece difícil pero como pista diremos que antes estivemos lendo adiviñas de Gloria Sánchez relacionadas coa escola. ¿Tedes xa a resposta para enviarnos un comentario?...

ROBERTO VIDAL BOLAÑO

Este é o nome do autor homenaxeado este ano no día das Letras Galegas. Cada ano, coincidindo coa publicación da obra de Rosalía de Castro “Cantares gallegos”, dedícaselle a unha persoa que contribuíse á promoción e defensa da lingua galega. Durante este mes desenvólvense numerosas actividades para dar a coñecer e difundir o labor e a obra da persoa homenaxeada. Na nosa aula tamén comezamos a coñecer a figura deste dramaturgo baseándonos nos carteis e  traballo realizado polo equipo de normalización lingüística do noso centro. Se na casa tamén queredes familiarizarvos coa vida e obra de Roberto Vidal Bolaño, aquí vos deixamos estas actividades LIM adaptadas a Educación Infantil e realizadas polo Seminario Galán. Tedes que premer nas imaxes para acceder a elas; o primeiro LIM é sobre a súa vida e o segundo de xogos.

ANATOMÍA INTERNA DO COELLO

Despois das visitas o mes pasado dos coelliños de María, Martiño e a mestra Marina, non podíamos deixar escapar a oportunidade de investigar e coñecer mellor a estes animaliños.  Aínda que xa viramos un pouquiño como eran os seus órganos internos, o martes, traballamos ao redor deles máis profundamente. Primeiro lembramos como se chamaban cada un e comparámolos cos dos humanos. 

Para poder manipulalos e entendelo mellor, empregamos o torso desmontable que temos en clase. Fígado, cerebro, corazón, pulmón, estómago... os nosos órganos internos son máis grandes ca os do coello pero teñen os mesmos nomes e parecidas funcións. 

Co corpo humano era máis doado que co debuxo do coello, pero mirando atentamente a ilustración do libro, colocar cada etiqueta no seu lugar correspondente non foi demasiado complicado para os maiores, cos pequenos aínda temos que seguir traballando un pouquiño máis.

UNHA TAZA DE NOVA YORK

María contounos que foi un agasallo que lle trouxo unha amiga da súa mamá cando foi de viaxe a esa cidade. En clase estivemos vendo o que significaba canda unha das letras que nela aparecen, ao principio líamos “I”, corazón, “Y” e “N”. Agora xa entendemos que iso quere dicir: “¡Eu amo Nova York!”.

TORTA DE FROITAS

Para todos aqueles que non lles dera tempo de celebrar o día da nai, aquí lle deixamos a nosa proposta: sorprender ás mamás e ás avoas cunha sinxela e rica torta de froitas. Nós cociñámola o venres pasado, nas fotos podedes ver a receita e o proceso…

FELIPA E AS NOSAS MAMÁS

Como vos comentamos, a partir do retrato que Salvador Dalí fixo da súa nai, intentamos debuxar as nosas mamás para renderlles unha pequena homenaxe. Este é o resultado, esperamos que vos guste.

ADIVINANZAS DE ANIMALES

Aínda que a que escollemos para o mes de marzo é moito máis difícil que as anteriores, o titulo xa é unha pista. Sacámola da colección “Adivinanzas” da editorial La Galera, do libro dedicado ás de animais.

Cada unha das adiviñas que aparece no exemplar, ven acompañada de tres pistas para axudarnos a  acertalas. Traballámola o mércores e seguro que máis dun cativo lémbrase da solución. ¿Quen nos envía un comentario coa resposta?... se non recibimos ningún, comezaremos coas pistas que proporciona o libro.

A MAMÁ DE DALÍ

Como este domingo celébrase o día da nai, esta semana coñecemos a Felipa, a mamá de Salvador Dalí. Observamos o retrato que o artista realizou dela e, intentando aprender da súa obra, debuxamos ás nosas mamás. Todas saíron guapísimas pero, como hoxe non conseguimos rematalas, será a vindeira semana cando presentemos en sociedade aos pequenos artistas de Leiro. Tamén vimos os retratos que Dalí realizou do seu pai e da súa irmá, pero esta fin de semana as protagonistas serán as mamás.

¡MENCÍA ATOPOU A MOEDA DE DON QUIXOTE!

De Miguel de Cervantes temos xa moitas e pensabamos que non encontraríamos ningunha coa figura de Don Quixote. Pero fai uns días Mencía tróuxonola e vímola. Hoxe traballamos máis detidamente ao redor dela. Reparamos na súas cores e intentamos interiorizar o seu valor. Co resto das moedas continuaremos realizando actividades nos vindeiros días, mentres, seguimos lendo os libros de Don Quixote da nosa bolsiña de lectura, agora temos tamén os que nos prestaron na Biblioteca Municipal de Meis.