VISITA A APÍPOLIS

Para coñecer o mundo das abellas o venres fomos a Apípolis. Ademais de descubrir e probar os produtos que producen estes insectos, os meniños puideron vestir o traxe de apicultor, visitar o apiario, confeccionar unha vela e incluso cociñar unhas ricas galletas de mel.

¡FELIZ DÍA DA POESÍA!

Cada 21 de marzo conmemórase o Día da Poesía. Na nosa aula celebrámolo levando para casa un poema de Antonio Rubio que comezaramos a reescribir fai tempo. Trátase do libriño “Zapato” ilustrado por Óscar Villán e musicado por Cristina Martín Sanz.

REMATANDO O TRIMESTRE

Case sen darnos conta o segundo trimestre vai chegando ao seu fin. Toca recompilar os traballos dos meniños e organizalos para levalos a casa. Esta mañá estivemos preparando as portadas. Pero antes de finalizar e comezar as vacacións de Pascua, aínda nos queda unha semana chea de acontecementos. Hoxe conmemoramos o Día da Narración Oral, mañá o Día da poesía e o venres imos de excursión. Pero todo isto xa volo contaremos  noutras entradas.

LOLA

A semana pasada vimos unha nova aparecida no xornal “La Voz de Galicia” sobre unha cadeliña chamada Lola. Foi roubada e recuperada dez anos despois grazas ao microchip. Esta noticia serviunos de detonante para falar sobre a importancia desta pequena cápsula e lembrar o que xa viran os nenos ao respecto na aula de natureza. Despois limos o conto “El nunca lo haría”  e iniciamos unha reflexión sobre o abandono animal e o traballo que realizan as protectoras de animais. Neste enlace tamén podedes coñecer unha aventura Chispa, o can dos Bolechas, titulada “Sultán non ten microchip”.

A NOSA ESCOLA NA TELEVISIÓN DE GALICIA

Esta semana veu a visitarnos o programa “Galicia viva” e fixo unha pequena reportaxe. Picade na imaxe e accederedes ao enlace, pódese ver despois da publicidade.

OS PAXARIÑOS DE YASMINA

Hoxe tivemos uns compañeiros de escola moi especiais. Yasmina veu á escola acompañada de dous paxariños que quedaron a pasar a mañá connosco. Puidemos ver como eran, observamos como comían e incluso escoitamos como cantaron con frecuencia.

MIAU

No noso obradoiro de cociña continuamos elaborando contos ilustrados por Óscar Villán. O venres pasado tocoulle quenda a Miau.

A TÍA MÓNICA

Nas últimas semanas, a nosa sesión de xogos dedicámola a aprender e bailar a canción de “La tía Mónica” coa versión musical de “Dúo tiempo de Sol”. A continuación deixámosvos o vídeo por se queredes xogar tamén na casa.

A NOSA ESCOLA TAMÉN É NOTICIA

Esta semana vendo os xornais tamén descubrimos que algunhas mestras do colexio saíron na prensa na xornada de portas abertas que realizamos no centro.

SEMANA DA PRESA NA ESCOLA

Do 5 ao 9 de marzo, os centros educativos galegos celebran a Semana da Prensa na Escola. Como a súa conmemoración coincide co Día da Muller, en clase eliximos para traballar unha nova que ten unha moza galega coma protagonista: Ana Peleteiro, bronce no mundial de atletismo cun salto de 14,40 metros.

Primeiro, en informática coa axuda da mestra Olalla, os meniños buscaron a noticia na prensa dixital e viron o vídeo do impresionante salto. Despois veu o más divertido, tentar imitalo na clase de educación física. Mirade neste enlace que ben o pasaron os futuros campións olímpicos de Leiro.

Por último tocoulle quenda á prensa en formato papel e ao noso traballo ao redor do nome do xornal e da numeración das páxinas.

MULLERES DA HISTORIA

Con motivo do Día Internacional da Muller  que se conmemora cada 8 de marzo, onte comezamos un pequeno proxecto para coñecer algunhas das mulleres máis importantes da historia contemporánea. Empezamos con Marie Curie, a primeira muller doutora en ciencias e a primeira persoa da historia que recibiu dous premios Novel.

OS NOSOS CALDIÑOS

A partir do poema de Rosalía  “Miña casiña, meu lar” e co obxectivo de potenciar entre os meniños a alimentación tradicional galega, estamos a coñecer os ingredientes do caldo galego. Cada familia ten o seu xeito particular de elaboralo. Para continuar traballando na aula necesitamos que  mostredes aos nenos que alimentos  adoitades empregar e os seus nomes.  Trátase de animar aos meniños a probalos todos e elixir os seus ingredientes favoritos.  Por iso levaron hoxe para casa unha folliña para que coa axuda da familia os escriban. Despois poden ilustrala cun debuxo ou a foto comendo o caldiño da actividade da semana pasada.

O COELLIÑO BRANCO

Xa fai moito que fixeramos esta receita inspirada no conto “O coelliño branco”, pero quedara pendente de publicala no noso blog. Un xeito divertido de animar aos meniños a comer plátano. Nas vindeiras semanas continuaremos cociñando contos que teñen ao ilustrador Óscar Villán como protagonista.

ANIVERSARIO DE ENMA

ROSAS E REPOLOS

Convertidos en rosas e repolos, os meniños xa remataron a ilustración do poema de Rosalía que elixiran  para decorar a biblioteca.  Mirade na imaxe que riquiño lles quedou.