GUÍA DE LECTURAS DO UNIVERSO

Remata abril, o mes dos libros, e a Zapatocas pareceulle unha boa idea despedirse del editando unha guía con algúns deses libriños do Universo cos que traballamos durante o curso. Esperamos que pronto poidamos volver a abrir a biblioteca escolar e levalos para casa.

MARCOS REI DA FROITA DE ABRIL

Estamos rematando abril e Marcos volve a ser o rei da froita tamén este mes. Está feito un auténtico comefroitas. Lembrades que todos podedes facer como el e ir anotando no voso álbum os días que a merendades. Tedes que ter 4 diferentes para conseguir coroa. Se o logrades, mandade a foto e publicarémola.

Tamén podedes probar a crear os vosos pratos divertidos de froita e enviarnos a receita cos nomes das que empreguedes. Podemos facer como propón a mestra Marta de Ribadumia nesta entrada e xogar ás adiviñas dos comefroitas. Listos para comezar? Se queredes practicar neste enlace e aquí tedes as que fixeron os nenos desa escola.

AS TARTARUGAS DE ERO E ROSANA

A versión da tartaruga que fixeron Ero e Rosana é moi especial. Mais que debuxar, eles deron un paso máis e crearon cadansúa escultura. Incluso puxéronlles nomes: Sofía e  Pipo.

Como veremos no seguinte vídeo, Joan Miró ademais de pintor era un escultor con moita imaxinación. Animádevos a imitalo e crear as vosas propias esculturas como materiais da casa como propón a mestra Marta nesta entrada.

CHEGA A FESTA DOS MAIOS

Mañá sería o día previsto para facer unha das celebracións máis vistosa da nosa escola:  Os Maios. Debido á situación de illamento na que nos atopamos, non podemos reunirnos pero non por isto imos deixar de darlle a benvida á primavera de diferentes xeitos. Un deles pode ser facendo florecer margaridas como no vídeo que nos mandou Marta. Outra secundar a proposta da mestra Ana #maiosdendeascasas no seu blog de natureza. Seguro que a vós se vos ocorren moitas máis, animádevos a compartilas.

A TARTARUGA DE ROI

Igual que a mascota da escola, Carmen, a tartaruga de Roi, medrou moito e o seu acuario quedou pequeno. Por isto están a facerlle un estanque onde poida medrar e vivir con comodidade. Mirade nas fotos que bonito lle está a quedar, seguro que Carmen vai estar encantada cando poida vivir aí.

Tamén enviounos a súa versión da tartaruga de Miró, esperamos que continuedes animándovos a participar e recibamos moitas máis.

FELICIDADES ÁGATHA

Hoxe é o aniversario de Agatha e a mestra Lupe de música quixo dedicarlle un vídeo no seu blog de música. Picade na imaxe para acceder a el. Esperamos que pronto poidamos celebralo na escola. Parabéns Ágatha!!

AS CASTAÑOLAS DE LÍA

Onte Lía compartiu connosco estas castañolas tan especiais que construíu cuns anacos de madeira co seu papá. Con elas está a practicar as cancións que aprendeu coa mestra Lupe. Din que a súa preferida é “Túa nai é meiga”, estamos desexando oír como soan. Mirade nas fotos como traballaron no proceso de elaboración e que bonitas quedaron. Estades feitos uns artistas! 
Se os demais tamén queredes construír unhas, podedes facelas seguindo as indicacións da mestra Lupe nesta entrada do blog de música, veredes que fácil.

OS LIBROS DE ZAPATOCAS

Zapatocas pediunos unha foto co libro que temos da biblioteca para celebrar o día do libro e xa están chegando ao correo. 
Que contento está Zapatocas de volver a vervos! A ver se conseguimos fotos ou vídeos de todos.

OS MONICREQUES DE ROI

Seguindo a proposta do vídeo da entrada da semana pasada de facer monicreques reutilizando cartóns de leite, Roi creou dous personaxes moi chuliños. Mirade nas fotos como os fixo e animarvos a imitalo. Logo podedes xogar a inventar diálogos e pequenas representacións con eles. A continuación vos deixo outro xeito de facelos empregando como base folios de cores.

AS NOSAS TARTARUGAS

Xa temos a primeira versión da tartaruga de Joan Miró baseada nas fotos da mascota da nosa escola. Esperamos recibir moitas máis, animádevos a envialas ao correo da escola. Para os que necesiten unha pequena axuda para empezar, no seguinte vídeo tedes un modo fácil de facela.

MARTA E OS COMPAÑEIROS DE CLASE

Aínda que os meniños non poidan estar xuntos como desexarían, si continúan a  facelo a través da súa imaxinación. Unha boa proba disto é este emotivo vídeo de Marta onde, representando aos seus amiguiños da escola con cunchiñas, xoga con eles como si estiveran presentes. Moitas grazas mamá de Marta por compartir tan fermoso momento connosco e demostrarnos que coa imaxinación todo é posible.

FELIZ DÍA DO LIBRO

Hoxe conmemórase o Día Internacional do Libro con multitude de propostas desde diferentes ámbitos. Nós seguimos animándovos a celebralo enviándonos eses libros especiais como vos propoñiamos no Día do Libro Infantil. Pero ademais, queremos festexalo compartindo convosco varias actividades que consideramos especialmente interesantes. A primeira, o conto que fixo en familia a mestra María e que quixo compartir connosco a través do seguinte vídeo.

A segunda, esta proposta de Zapatocas pedíndovos unha foto co libro que tedes na casa da biblioteca. No seguinte enlace tedes unha mensaxe del: https://drive.google.com/file/d/1O3bNDYf6Tu311x6veFZmHRTtxH5UxMh2/view

Se queredes mais información visitade esta entrada no blog da mestra Marta de Ribadumia

E a terceira, os contos de Rodari que esta semana nos está a dramatizar a mestra Montse, cada día un diferente, con monicreques, música e moitas sorpresas máis:

http://craderibadumia.blogspot.com/2020/04/semana-do-libro.html

http://craderibadumia.blogspot.com/2020/04/2-conto.html

http://craderibadumia.blogspot.com/2020/04/3-conto.html

http://craderibadumia.blogspot.com/2020/04/dia-do-libro.html

http://craderibadumia.blogspot.com/2020/04/4-conto.html

DANIELA TAMÉN QUEDA NA CASA

Hoxe tivemos noticias de Daniela contándonos que están ben e compartindo connosco as actividades que está a facer na casa. Canto nos alegramos!

MIRÓ E A TARTARUGA

Para que vexades o moito que medrou nos últimos anos, a mestra Ana colgou no blog de natureza unhas fotos de Borja, a tartaruga da escola. Aproveitando esas imaxes, propóñovos que fagades como o pintor Joan Miró e as debuxedes. El pintou unha cando tiña 8 anos empregando as cores da súa imaxinación. Animádevos a imitalo e mandarnos ás vosas creacións.

A TORTA DE QUEIXO DE ROI

Hoxe vos propoñemos elaborar a torta de queixo que Roi quixo compartir connosco, ten unha pinta deliciosa.  Soamente tedes que ver a receita e as imaxes. Moitas grazas Roi. Continuade enviando as vosas e receitas e fotos, paseniño os meniños irán converténdose en auténticos chefs á vez que avanzan na aprendizaxe da lingua escrita e os seus usos.

O CORVO

Xa temos a nosa primeira observadora de aves. Lía conseguiu ver un corvo, unha gaivota e un gorrión. Púxose a investigar sobre o primeiro e realizou a ficha técnica da imaxe. Se vos tamén queredes aprender cousiñas sobre este animal podedes visitar este enlace. Seguro que na vosa casa tamén conseguides ver algún, ¡mandarnos as vosas fotos!.

No seguinte vídeo déixovos como debuxar un corvo un xeito bastante sinxelo, animádevos a probar. Tamén podedes intentar facelo cun tubo de papel hixiénico como Lía, mirade na imaxe superior que chuliño lle quedou.

QUEDAMOS NA CASIÑA

Mirade cantas cousiñas se poden facer sen saír: manualidades, crear  coa plastilina, facer quebracabezas, experimentar, xogar coas bonecas, colorear, escribir, debuxar … 

MARCOS CARPINTEIRO

Estes días de confinamento na casa son un impedimento para que os meniños realicen moitas actividades da súa vida diaria, pero tamén unha oportunidade para facer outras que o estrés diario nos impide. Aprender carpintería coma Marcos, xardinería, costura, cociña ou bricolaxe no seo da familia, pode enriquecer moito aos nenos e axudarlle a entender o mundo no que vivimos. Animádevos a compartir cos nenos os vosos hobbys ou quefaceres cotiáns, xa veredes que ben o pasan e canto aprenden. E xa sabedes se nos mandades as fotos ou suxestión publicarémolas.

AVES DESDE CASA

A principios de curso, a noticia aparecida no xornal Faro de Vigo sobre a elección da ave do ano 2020, serviunos de detonante para coñecer as características destes animais. Vimos os oviños da ave gañadora, o paspallás, e poemas nos que aparece como protagonista. 

Hoxe vos propoñemos retomar o tema coa lectura dun artigo de La Vanguardia. Con esta actividade pretendemos varios obxectivos. Primeiro que os meniños retomen a lectura da prensa dixital con novas que poidan espertar o seu interese, sempre co acompañamento dun adulto e tras unha selección previa por parte deste. Neste enlace http://kiosko.net/es/geo/Galicia.html temos acceso a toda a prensa nacional e internacional. Segundo, unirnos ao proxecto AvesDesdeCasa. A idea é sinxela, consiste en observar aves dende a fiestra, balcón, patio ou eira. Pódense facer observacións a simple vista, con binoculares se temos, ou usando unha cámara. A proposta é que nos enviedes as vosas observacións e identificacións como queirades, a través de fotografías ou debuxos, con frases ou textos sinxelos. Para facilitar a observación, deixámosvos este enlace e varias imaxes coas especies máis comúns. En entradas posteriores iremos propoñéndovos máis retos e xogos ao respecto, mentres podedes visitar a entrada http://blogdenatureza.blogspot.com/2020/04/paxaros-dende-as-ventas-balcons-e.html e facer comedeiros para paxaros con material de refugallo.