SEMENTES DE CABAZA

Xa secaron as pebidas que reservaramos cando baleiramos os calacús para a festa do Samaín. Onte cada meniño levou dez para casa. Pero antes tiveron que contalas intentando non confundirse. Tamén preparamos sobres reciclados para gardalas e etiquetalas. Cando chegue a primavera podedes sementalas.

BALEIRANDO CALACÚS

Unha das actividades que máis gusta aos meniños relacionada co Samaín é baleirar cabazas e decoralas. A semana pasada coa mestra Ana, ademais de facelo, os nenos separaron as pebidas da polpa para obter sementes que plantar o vindeiro curso.

CABAZAS E PANTASMAS

 

Xa que andamos a voltas cos calacús, non podíamos deixar de levalos ás nosas propostas culinarias da fin de semana. Como vedes na receita, dun xeito moi sinxelo podemos converter unha mandarina nunha saborosa cabaza e un plátano nun divertido pantasma.

AS CABAZAS DE YAYOI KUSAMA

O día da festa do Samaín realizaremos unha exposición de cabazas decoradas na que vos animamos a participar. Hoxe en clase estivemos vendo varios vídeos de como facer para baleiralas, aínda que tamén podemos adornalas sen necesidade de cortalas.

Inspirándonos na artista xaponesa Yayoi Kusama decidimos decorar unha empregando pegatinas de círculos de cores. A esta artista contemporánea encántanlle as cabazas e ten un xeito moi particular de representalas. Paseniño iremos coñecéndoa.

A FESTA DAS CABAZAS

Como Zapatocas sabe que o vindeiro 29 de outubro celebraremos a festa do Samaín na escola, preparounos un recuncho cheo de libros que teñen a cabaza coma protagonista. Estivemos véndoos todos, aínda que os que máis nos gustan son “Corre corre, cabaciña” e “Os Bolechas van á festa dos calacús”.

A CABAZA DE MARTA

Xa chegou a primeira cabaza para a exposición que realizaremos o venres. Mirade que chuliña lle quedou coa súa dobre mensaxe de: "Todo vai saír ben" e "Sentidiño".

SAMAÍN E MAGOSTO 2019

Bruxas, vampiros, zombis, esqueletos, demos … o mércores a nosa escola quedou invadida polos máis terroríficos e divertidos seres. A pesar da choiva e o mal tempo, os meniños pasárono de medo cantando coa banda de musica, aprendendo a importancia de reciclar, reutilizar e reducir coa bruxa Hermelinda e a fada 3Rs, lendo contos de medo e gozando dunha arrepiante e deliciosa merendola. 

Moitas grazas a todas as familias que colaboraron traendo riquísimos e elaborados doces típicos destas datas e aportando cabazos decorados para a exposición. E noso especial agradecemento as que pasaron toda a mañá asando castañas a pesar da choiva e o fume.

CONTANDO ATA DEZ

Cando polo Samaín baleiramos e decoramos entre todos a cabaza xigante que nos trouxo Elena, separamos as pebidas da polpa e reservámolas. Daquela puxémolas a secar e, aínda que algunhas colleron algo de humidade, a maioría serven para plantar e ter unha boa colleita para o ano. 

Hoxe cada meniño levou dez para sementar na casa cando chegue a primavera. Pero antes tiveron que preparar os sobres con folios reciclados para gardalas. E despois, contar e separar dez sen confundirse. Na casa podedes volver a contalas con eles e os que descubrades que aínda non saben a cantinela ou enganasen no reconto, axudarlle nas vindeiras semanas a conseguilo.

SAMAÍN 2018

Este ano os zombis foron os protagonistas na nosa festa do Samaín. Dirixidos pola mestra Olalla e ao ritmo da canción Thriller de Michael Jackson, deleitaron ao publico co seu terrorífico e divertido baile. 

Pero antes, tivemos unha mañá chea de actividades. Primeiro o Seprona explicounos como podemos axudar a coidar o medio ambiente. Despois, bailamos ao ritmo da banda de música e tocamos os seus instrumentos. Recuperamos forzas cunha merendola aterradoramente deliciosa que prepararon as familias dos nenos de cinco anos. Coa barriguiña chea recibimos á bruxa Montse, que coa axuda das mestras Olalla, Ana, Belén e Olalla, dramatizaron un arrepiante conto que nos encantou. Todo isto sen esquecer unha espectacular exposición de cabazas e un rico Magosto. Moitas grazas a todas as familias pola súa axuda e colaboración, e en especial ás que estiveron toda a mañá asando castañas a pesar da choiva e o frío.

¡GRACIÑAS ELENA!

A pesar dos anos transcorridos dende que María rematou a súa Etapa de Infantil, a súa avoíña continúa facéndonos chegar un dos seus fermosos calacús para decoralos na aula. Cando vai chegando a festa do Samaín, lémbrase de nós e, grazas iso, pasamos unha divertida mañá baleirando as cabazas da súa horta. Un millón de bicos para María, a súa mamá Elena e en especial para a avoíña.

SAMAÍN 2017

Xogos, cancións, obradoiros, bailes, contos, películas, merendola, actuacións … na nosa festa do Samaín tivemos un chisquiño de todo pero, sobre todo, moita colaboración das familias. Moitas grazas a todos e en especial aos que estiveron toda a mañá asando castañas para delicia dos máis pequenos.

UN CALACÚ MOI ESPECIAL

A pesar dos anos transcorridos dende que María rematou a súa etapa de infantil, a súa mamá continúa compartindo xenerosamente connosco os enormes calacús da horta da avoíña. Cada ano, na véspera do Samaín, aparece na escola cargada cunha enorme cabaza que esperta o entusiasmo dos cativos. O de hoxe é tan grande que tivemos que pedir axuda a varias mestras para sacalo do coche, a ver se o luns somos capaces de baleiralo e decoralo con xeito para a nosa festa. Moitas grazas Elena pola túa xenerosidade e agarimo. Un bico moi forte para María e unha gran aperta para a avoíña.

SAMAÍN 2016

¡Que susto levamos ao chegar e ver un enorme Frankenstein na nosa aula! Pronto descubrimos que se trataba do mestre Alejandro e comezamos cos xogos.

Despois decoramos cartuchos para meter as castañas do noso Magosto e poder levalas para casa. Mentres, no Local social estaban preparándose o mariñeiro Luís e os seus amigos para falarnos das propiedades dos peixes. Trouxeron gorras para todos, unha chega de pegatinas e outras cousiñas que vos entregaremos a vindeira semana. 

Case sen darnos conta chegou a hora de ver a exposición de cabazas e gozar da rica merendola preparada por las familias. Coas forzas recuperadas enfrontámonos co bebedizo da mestra Montse que disfrazada de bruxa fíxonos rir e tremer de medo. 

Cos seus feitizos acabamos todos convertidos en momias e bailando “La momia de colores” baixo as indicación da mestra Olalla. E para rematar, a Banda Municipal de Ribadumia deleitounos coa súa musica. Graciñas a todos os que fixeron posible a festa e en especial aos que asaron as castañas.

CONTANDO SEMENTES DE CALACÚ

Cando para o Samaín baleiramos a cabaza que nos trouxo a mamá de María, separamos as sementes da polpa e puxémolas a secar. A semana pasada xa estaban listas para gardar. Estivemos repartíndoas e empaquetándoas para plantalas cando chegue a primavera e intentar ter colleita dabondo. 

Primeiro fixemos sobres reciclando folios que xa non serven. Despois puxemos o noso nome e anotamos o seu contido. Por último chegou o máis difícil para os máis pequenos, contar sen confundirse e introducir no sobre o número de sementes acordado … ¿Quen se lembra cantas había que meter?... A ver quen nos envía un comentario coa resposta.

PREPARÁNDONOS PARA O SAMAÍN

¡Como nos gusta baleirar e decorar os calacús!... non nos daba chegado o momento. Dende que a mamá de María Aboy trouxéranos unha cabaza xigante para a festa, estabamos desexando empezar a preparala. Primeiro tivemos que poñernos de acordo sobre como queríamos realizala. Uns querían que dera risa, outros pola contra optaban polo medo. Hoxe fixemos unha votación e tivemos que aceptar a opinión da maioría. Despois coa axuda da mestra Belén procedemos ao seu baleirado. Separamos a polpa das pebidas para gardalas cando estean secas. E por último, chegou o momento máis divertido: poñerlle unha candea dentro, baixar as persianas, apagar as luces e xogar a asustar … Grazas Elena por, a pesar do tempo transcorrido, seguir lembrándote de nós.

SEMENTES PARA CONTAR

Cando baleiraramos as cabazas para a festa do Samaín, separaramos as pebidas e deixarámolas secar para plantalas cando fora o seu momento. Aínda que colleron un aspecto un pouco raro debido ao papel de periódico no que estiveron pousadas, xa puidemos manipulalas sen mancharnos e gardalas. 

A semana pasada cada neno levou 10 para casa coa idea de que a sementen e ter para o vindeiro ano moitos calacús. Primeiro tivemos que facer sobres con folios reciclados, retirar as que non servían e contar. Hoxe o fixeron os que estiveron enfermiños. As que sobraron servíronlle aos maiores para iniciarse na suma de pequenas cantidades cando non nos chegan os dedos.

Mentres, os máis pequenos, estiveron loitando coa grafía do número tres. ¡Que difícil é facela aos tres anos!. Ensaiamos moito no encerado e, aínda que  case sempre saen con máis pinta de serpe que de número, cando o conseguen quedan felices.

DEZ SEMENTES DE CALACÚ

Hoxe por fin puidemos levar para casa as pebidas que lle quitaramos á cabaza que baleiramos en clase. Tivemos que esperar ata que estiveron ben sequiñas para poder manipulas e gardalas sen que se puxeran podres. Decidiramos levar 10 cada un  para que houbera para todos. Parece doado contar ata 10 pero non o é tanto cando somos pequerrechiños. Hai que saberse a “cantinela” sen confundirse; contar todas e cada unha das sementes unha e soamente unha vez, non vale contar unha dúas veces, nin podemos deixar ningunha atrás; lembrarse de parar ao chegar ao 10 e metelas no sobre que preparamos co noso nome… para os maiores era sinxelo  pero os máis cativos non o tiveron tan doado. Despois de tanto esforzo ben se merecen que cando chegue o momento axudémoslle a sementalas e teñamos cabazas dabondo para o Samaín 2014.

A FESTA DO CABAZO

Unha das cousas que máis nos gusta da festa do Samaín e baleirar as cabazas e decoralas. Pero o mércores limos na prensa que son moitos os pratos que se poden preparar con este froito como principal ingrediente. Na Festa do Cabazo que se celebra esta fin de semana en Carballal (Vigo), poderanse degustar todos, ademais haberá actuacións musicais, unha exposición sobre o proceso de cultivo e unha mostra de artesanía. Na escola gardamos as sementes que lle quitamos ao calacú que nos trouxo a avoíña de María para decorar en clase, en canto rematen de secar levarémolas para casa a ver se o vindeiro ano temos todos unha gran colleita e aprendemos a cociñalas.

LISTAS PARA LEVAR…

Despois de varias semanas de espera, fai uns días que as sementes das cabazas que baleiramos para o Samaín por fin secaron e puidemos seguir traballando con elas. O primeiro que fixemos foi preparar uns sobres para poder levalas para casa. Era moi importante que lle puxeramos o nome e o que contiñan para evitar equivocacións. Os maiores en letra ligada, os medianos en maiúscula e, os máis pequenos, con letras móbiles porque ata fai pouco aínda tiñamos moitas dificultades para controlar o trazo. Outro día dedicámolo a contar. Cada un de nós debía levar dez e para iso hai que saber a “cantinela” sen confundirse: 1, 2, 3, 4, 5, 6 ... O paso seguinte era ter claro cando e como sementar. Buscamos  información na biblioteca. No libro “De la maceta a la cazuela” atopamos o que necesitabamos. Coa axuda da mestra limos o proceso, seguimos a orde dos números e fixemos fotocopias para todos. Hoxe por fin rematamos todo o traballo e levamos para casa as sementes, a maceta e a información necesaria para unha correcta plantación. Xa nos contaredes en primavera que tal medran. Esperamos que para o vindeiro Samaín tiñamos todos uns calacús tan grandes como os da avoíña de María, dende aquí mandámoslle un biquiño moi especial por compartir connosco as súas cabazas.