A VOLTAS COS NÚMEROS DE TELÉFONO

Como quedaramos a semana pasada, hoxe, cos maiores e os medianos da aula, comezamos a elaborar unha axenda cos números de teléfonos. O primeiro ver como son. A mestra María prestounos a do centro e comprobamos que nun lateral teñen o abecedario. A orde é moi importante para localizar o que buscamos. Teñen dúas columnas, unha para os nomes e outra para os números. Os nomes están ordenados pola letra que empezan. Nós tamén imos facer o mesmo e iniciamos o noso listado cos nomes dos nenos que empezan por A. Despois tiñamos que localizar as tarxetas que realizaramos o pasado mércores e copiar ben os díxitos. ¡Canto traballiño e soamente fixemos o “A”!.. xa vos contaremos como imos avanzando, mentres podedes ensinarlle aos cativos a axenda de teléfono da casa e axudarlle a buscar os números que sexan do seu interese.

DEBAJO UN BOTÓN

Mirade na fotografía que atentos estamos para no perder o ritmo que nos marca a canción. Cada vez que escoitamos “TON” temos que dar unha palmada pero se oímos “TIN” o golpe será nas pernas. O xogo complícase cando aumentamos a velocidade. Seguro que todos coñecedes a canción pero vola deixamos a continuación por se queredes divertirvos practicando en familia.

ZAPATOCAS EN ANDALUCIA

Nunha entrada anterior quedounos pendente falarvos da carta que traía Zapatocas e sobre a que estivemos traballando a semana pasada. Nela contábanos que quería viaxar a Andalucia e animábanos a buscar información sobre esta Comunidade Autónoma.

Na aula xa comezamos a montar un recuncho para colocar todo o material que atopemos: o primeiro o libro “Andalucia” que Zapatocas trouxo como agasallo. Se na casa tedes contos, libros, DVDs, fotos, quebracabezas, postais, mapas, obxectos, folletos ou publicidade de axencias de viaxes, receitas… relacionado con esta Comunicade e adaptado ás idades dos nosos alumnos, podédelo traer para velo na aula, enriquecer o noso recuncho e aprender xuntos.

Hoxe na nosa visita á biblioteca escolar buscamos onde estaba colocado o libro que atopou Zapatocas. Vimos que tiña pegatina branca e o número nove porque trata de xeografía e está situado xunto a máis exemplares que falan de países e outros lugares. 

BOLBORETAS DE UVAS

É tempo de vendima e aproveitamos a oportunidade que as uvas nos brindan para inaugurar o noso obradoiro de cociña empregándoas como ingrediente principal. Esta mañá engadímoslle sandía ou melón atendendo ao gusto dos comensais e realizamos esta divertida e nutritiva merenda.

¡CANTOS XORNAIS!

Unha vez máis temos que agradecer as familias á súa implicación nas actividades propostas dende a escola. Nesta ocasión compartindo connosco os xornais que de diferentes xeitos chegan as súas mans. A través deles soubemos que un tractor cargado de uva virou en Ribadumia, que un golfiño apareceu morto na Praia ou que hai periódicos que falan exclusivamente de deportes.

 Ademais de ler as novas que a prensa recolle, hoxe comezamos co traballo sistemático arredor deles.  Cos maiores lembramos os nomes dos que víamos o curso pasado e intentamos ler e identificar os seus anagramas. Aos pequenos aínda lles costa aclararse co seu manexo e utilidade pero xa puideron realizar tarefas para diferenciar os periódicos doutros materiais impresos como os contos.

OS NOSOS NÚMEROS DE TELÉFONO

Tras o período de vacacións estival, varios dos medianos da clase esqueceron como se chaman algunhas das grafías dos números e moitos perderon a habilidade para realizar ben os seus trazos. Para axudarlles na adquisición destas destrezas á vez que avanzamos no coñecemento do emprego e significado dos números na vida diaria, comezamos a traballar a redor dos números de teléfono.

Cada neno localizou o seu no listado que temos en clase, recortámolos, vimos que díxitos contiñan, descubrimos que todos comezaban por seis,  confeccionamos tarxetas para continuar facendo tarefas con eles e intentar memorizalos, copiámolos e nas vindeiras semanas intentaremos crear as nosas propias axendas de teléfonos, a ver que tal nos saen.

OS MARTES… XOGOS TRADICIONAIS

Este curso, coa axuda da mestra Olalla, imos dedicar  as dúas últimas horas dos martes a traballar ao redor dos xogos tradicionais. A idea é, ademais de recupelalos, basearnos neles para avanzar no coñecemento da lingua escrita á vez que aprendemos a xogar en grupo. Comezamos está mañá coa canción popular “Un elefante se balanceaba” que vos deixamos a continuación por se queredes xogar tamén na casa.

Primeiro, comprobamos si sabíamos contar ata 15 e ensaiamos todos xuntos para axudar aos máis pequenos. Despois, para aprender a canción, vímola un par de veces no encerado dixital. Acto seguido, a mestra Olalla converteunos en elefantes e, no Local Social, seguindo as consignas da letra, fomos montándonos nunha improvisada tela de araña que con tanto peso rompeu mentres botabamos unhas risas.

Para non esquecer todos os xogos e cancións tradicionais que imos aprender, ao rematar de xogar escribimos o título da canción para ir creando a nosa propia recompilación. Os pequenos con letras móbiles e moita axuda. Para os medianos e maiores engadimos tamén a letra e os números. Unha mágoa que chegara a hora da saída e non nos dera tempo de volver a xogar.

ZAPATOCAS

Hoxe comezou a funcionar a nosa biblioteca escolar e nela atopámonos cunha gran sorpresa: a mascota da biblioteca. Chámase Zapatocas e naceu  no ano 2002 da man dunha nena da escola de Ribadumia. Durante catorce anos deu nome a nosa revista escolar e, cando creamos a nosa biblioteca, converteuse na súa mascota. Sempre tivemos imaxes dela pero foi este verán cando a mestra Marta conseguiu contactar con alguén que puidera sacala do papel e transformala nun boneco ao que abrazar. Esta mañá xa estaba subida nun andel cunha carta na man e rodeada de libros pero iso volo contaremos outro día.

Hoxe os protagonistas, ademais de Zapatocas, foron os libros. Puidemos gozar deles e escoller un para levar. A mestra Ana explicoulle aos máis pequenos como funciona o sistema de empréstito, cales son as normas de funcionamento e como debemos de gardar os libriños na nosa bolsa de biblioteca para que vaian protexidos na súa viaxe ata casa. Como xa vos contamos o día da reunión de principio de curso, seria desexable que, ao igual que os libros que conteñen, nos axudedes a mantelas en bo estado. Tamén comezaron a súa andaina as mochilas viaxeiras e cada semana visitará  unha familia.

REMATAMOS O PERÍODO DE ADAPTACIÓN

Dende que comezou o curso, gradualmente, os novos alumnos foron coñecendo espazos, materiais, mestres, compañeiros … Os veteranos adaptándose aos roles que “facerse maior” leva: cambio de amigos, máis responsabilidades, tarefas diferentes, xogos de complexidade crecente … 

Tras unha incorporación gradual dos máis pequenos e un horario flexible e axustado ao forte momento emocional co que todos vivimos estes primeiros días, o venres dimos por rematado o período de adaptación. O luns comezaremos cos obradoiros e o traballo coas mestras especialistas.

¿ONDE COLOCAMOS O NOME?

Xa temos a primeira foto co sitio elixido para pousar o nome propio na casa. Carla púxoo no cadro da súa habitación, unha proposta bonita e orixinal para os que aínda non se decidiron. 
Na asamblea do venres os nenos contaron que o colocaron na neveira, na mesa, no chan … A ver se alguén máis se anima a enviarnos fotos e continuamos publicándoas nesta entrada.

E chegounos a segunda foto cunha elección 
espectacular... a neveira.

COS NOMES PARA CASA

Hoxe, como todos os anos a principio de curso, os nenos levaron para casa un pequeno cartel co seu nome para colocar nun lugar visible. Cada curso o nome ten unha complexidade engadida para avanzar no coñecemento da lingua escrita, polo que debe de substituír ao anterior. Traballamos a redor del porque, ademais de servir para identificarnos, é un texto sinxelo, curto e ofrece un modelo fixo para avanzar no coñecemento do noso sistema de escritura. Podedes colocalo na habitación, na porta do armario, na cociña, no baúl dos xoguetes … pero sempre ao alcance dos cativos. Animádevos a mandarnos comentarios co lugar que escolleu cada rapaz, se ademais nos enviades a escoladeleiro@gmail.com unha foto del co neno no sitio da casa elixido, publicaremos a imaxe no noso blog, seguro que aos meniños lles divirte ver onde o colocaron os seus compañeiros.

TRABALLANDO CON ROTULADORES…

¡Como lles gusta aos pequenos pintar cos rotuladores!... pero para non estragalos temos que aprender a usalos correctamente. Primeiro quitar a tapa, despois colocala na parte traseira para non perdela, pintar sen calcar demasiado para non romper o papel e, por último, volver a colocar a tapa facendo “clic” para que non caia.

O RECUNCHO DA COLCHONETA

Un dos recantos máis activos da nosa aula é o da colchoneta. Nel os cativos poden xogar con animais, ferramentas, bonequiños, coches, barcos, camións e, sobre todo, con gran variedade de pezas de construción. Pero ademais de lugar de xogos, a colchoneta é tamén o espazo onde facemos multitude de actividades: contamos as nosas inquedanzas e sucesos na asamblea, ollamos o xornal, marcamos o calendario, anotamos o tempo meteorolóxico, realizamos a hora de ler, escoitamos música, cantamos… Hoxe, os pequenos, coñeceron algunhas das tarefas que nela facemos pero, especialmente, gozaron coa cantidade de xoguetes que este curruncho ten.

Pouco a pouco, os novos alumnos van ampliando o seu tempo de permanencia na escola. Está mañá xa merendaron connosco e quedaron ata a hora da saída co resto dos seus compañeiros. Portáronse como auténticos chicos maiores e integráronse nas rutinas da aula sen dificultade.

Mentres, cos maiores e medianos, imos quentando motores na aprendizaxe da lectoescritura traballando ao redor dos nomes dos novos amigos. Vimos como se escribían, copiámolos do encerado, asociámolos coas fotos e contamos cantas letras tiñan cada un. Por certo … ¿quen se lembra que nome tiña máis letras de todos?... A ver quen nos manda un comentario coa resposta.