PREPARÁNDONOS PARA O SAMAÍN

A XACIA DE LUCÍA

Conforme os meniños van traendo os seres mitolóxicos elixidos, en clase ímolos vendo e facendo unha pequena exposición.  Despois con todos os do colexio crearemos un libriño que poderá verse o día da festa do Samaín e pasará a formar parte da nosa biblioteca escolar. Para os que aínda desexen participar lembrade que mañá é o último día.  Xa coñecemos a moitos, pero sen lugar a dúbidas, un dos favoritos é a Xacía. Lucía tróuxonos unha moi especial que construíu coa axuda da súa mamá. Explicounos que se queredes facela na casa soamente necesitades un tubo de papel hixiénico e un pouquiño de imaxinación.

UN CALACÚ MOI ESPECIAL

A pesar dos anos transcorridos dende que María rematou a súa etapa de infantil, a súa mamá continúa compartindo xenerosamente connosco os enormes calacús da horta da avoíña. Cada ano, na véspera do Samaín, aparece na escola cargada cunha enorme cabaza que esperta o entusiasmo dos cativos. O de hoxe é tan grande que tivemos que pedir axuda a varias mestras para sacalo do coche, a ver se o luns somos capaces de baleiralo e decoralo con xeito para a nosa festa. Moitas grazas Elena pola túa xenerosidade e agarimo. Un bico moi forte para María e unha gran aperta para a avoíña.

ANDANDO E MOITO MÁIS

Agora que xa levamos máis dunha semana de andaina diaria e os pequenos saben máis ou menos camiñar en fila, comezamos a integrar a observación da contorna e os xogos nos nosos percorridos. Gardar o equilibrio para evitar caer a un imaxinario río cheo de crocodilos, enredar coa alfombra de follas que o outono deixou no xardín, descubrir as primeiras setas que empezan a saír … son algúns dos múltiples estímulos que cada mañá atopamos.

¡FELIZ DÍA DAS BIBLIOTECAS!

Como xa sabedes, nas aulas andamos a traballar ao redor da mitoloxía. Para apoiar as diferentes actividades, na biblioteca escolar creamos un recuncho con todos os fondos relacionados co tema e, para conmemorar o día das bibliotecas, editamos a seguinte guía de lecturas para dalos a coñecer entre as familias.

Onte os meniños levárona para casa en formato papel pero previamente vimos os libros que contiña, falamos dos que xa leramos e miramos os novos. Cada cativo xa vai tendo os seus favoritos, cando acabemos de traballar con eles poderán levalos para casa.

MEIGA

O MEU SER MITOLÓXICO FAVORITO

Levamos un par de semanas creando na biblioteca escolar un gran mural dedicado á mitoloxía galega. Paseniño imos coñecendo e escribindo os nomes deses seres fantásticos polos que os meniños senten unha mestura de atracción e medo. 

O luns invocamos ao nubeiro e ao tronante, para que cos seus poderes, fixeran soltar ás nubes toda a auga que puideran e apagaran os lumes que asolaban Galicia. Pero queremos descubrir moitos máis. Por iso o xoves propuxémosvos traer á escola o nome e imaxe do voso favorito. Para aqueles que aínda non se decidiran, nos seguintes enlaces teñen moitas ideas:

https://www.pinterest.es/anaestuardo/mitolox%C3%ADa-galega-algo-m%C3%A1is-que-me%C3%ADgas/

http://gorinho.gl/2014/cocon_14.htm

https://cuentos-infantiles.idoneos.com/cuentos_mitologicos/

http://www.elhuevodechocolate.com/mitos/mitos.htm

http://karrapucho.blogspot.com.es/2013/04/tilirin-e-mitoloxia-galega.html

O HOME DO SACO

Este xigantón que leva nun saco aos nenos que se portan mal e andan sós polos camiños no serán, empregábase para facer que os nenos volveran a casa cedo. Para superar o medo a este ser mitolóxico, o pasado mércores dedicámoslle  a nosa sesión semanal de xogos. Baseándonos na canción de Rosa León “Jugando al escondite”, creamos a nosa propia versión substituíndo o lobo polo home do saco, papel que asumía a mestra.

PREPARÁNDONOS PARA O MAGOSTO

Cada curso, na festa do Samaín, realizamos un Magosto e levamos castañas asadas para casa. Este ano, en lugar do tradicional cartucho, imos utilizar envases de Tetra Brik que decoraremos nun obradoiro o día da celebración. Hoxe estivemos envolvéndoos en papel de periódico e facendo a primeira parte do traballo. Os que non o trouxeron aínda están a tempo.

NA HORA DE LER… MITOLOXIA GALEGA

Hoxe, o trasniño da clase, tíñanos preparada unha pequena sorpresa. Metérase na nosa bolsiña da hora de ler e encheraa de contos relacionados coa mitoloxía galega. O home do saco, As mouras, Pedro Chosco, A coca de Redondela, O Apalpador, O Papón, A xacia… Cada día o encargado escollerá cal prefire que leamos e paseniño iremos coñecendo a todos estes seres fantásticos que forman parte da cultura popular.

AS ESCOLAS DA MILLA

O sedentarismo converteuse nunha ameaza para os meniños que pasan máis horas sentados fronte á televisión e o ordenador que xogando ou realizando actividades ao aire libre. Para combatelo, o programa escolar “Las escuelas de la milla” anima a todos os colexios a axudar aos nenos a percorrer unha milla diaria cos seus compañeiros de clase. Ao igual que o curso pasado, na nosa escola decidimos participar adaptando o reto ás idades dos nosos alumnos. Se a climatoloxía o permite, cada día camiñaremos ao redor do centro ata acadar o quilómetro diario. Deste xeito, ademais de adquirir hábitos saudables e outros beneficios, estaremos en forma se a final de curso decidimos volver a facer un anaquiño do Camiño de Santiago como o ano pasado.

Comezamos hoxe facendo un percorrido pequeniño pero traballando aspectos importantes como saber ir en fila, seguir o camiño marcado, no empuxar, adaptar o ritmo da marcha aos máis pequenos, esperar polos demais … 

TRASNOS

Estes seres fantásticos da mitoloxía galega tamén chegaron ao noso obradoiro de cociña. 

SOY UNA SERPIENTE

Hoxe dedicamos a nosa sesión de xogos a “Soy una serpiente”. Un divertido enredo que podedes ver facendo clic aquí.

MITOLOXÍA

Este curso, co gallo da festa do Samaín que celebraremos o día 31, andamos a traballar ao redor da mitoloxía. A semana pasada, na nosa visita semanal á biblioteca, co conto “O zapateiro e os trasnos” coñecemos a eses seres fantásticos. Descubrimos que son pequenos, de hábitos nocturnos e gustan de facer travesuras revolvendo as cousas e agachándoas. Na clase temos un e xa fixo algunha que outra trasnada cambiando os nomes de lugar ou imprimindo mal as fotocopias. 

Hoxe veu a presentarnos ao Tardo, un ser mitolóxico semellante ao trasno pero moito máis perverso. Adoita sentarse no peito das persoas durmidas provocándolles pesadelos. Ensinounos que para librarnos del basta con deixar un prato con grans de millo. Como é moi curioso empezará a contar os grans pero como soamente sabe contar ata dez, volverá a empezar unha e outra vez e así pasará a noite sen molestar, desaparecendo ao amencer. Ademais teme aos cans e aos gatos.

PASTELIÑOS DE CACAHUETES

Parece fácil abrir un paquete de sobaos, pero cando temos menos de catro anos, conseguilo sen que rompa require un esforzo  importante. Se a isto lle engadimos loitar contra un cacahuete que non se quere abrir, o reto aumenta.  Estes pequenos desafíos iran aumentando a coordinación e destreza manual  dos meniños á vez que experimentan cos diferentes alimentos.

OS XOGOS TRADICIONAIS

Este curso imos dedicar os mércores a coñecer e practicar os enredos tradicionais. Comezamos hoxe coa nosa versión particular da canción “Un elefante se balanceaba…” . No desenvolvemento do xogo convertemos unha corda en tea de araña e nós pasamos a ser os elefantes que se balancean. 

A BIBLIOTECA MUNICIPAL

A semana pasada aproveitamos a saída á Festa do Deporte para coñecer a Biblioteca Municipal de Ribadumia. Ademais de ver as súas instalacións e ler algún contiño, fixémoslles o carné de usuario que onte levaron para casa. Deste xeito, se vos animades a visitala en familia poderedes levar libros en empréstito de forma gratuíta.