AGASALLOS DO APALPADOR

 

Antes das vacación de Nadal, escribiramos cartas ao Apalpador pedíndolle cousiñas para compartir na aula. Onte cando chegamos non atopamos nada, pero buscando, buscando …  dimos con sorpresas para todos.

FESTA DE NADAL

 

Aínda que non puidemos xuntarnos cos nenos das outras escolas, si que tivemos unha mañá festiva. Comezamos vestidos para a ocasión e con panxoliñas.

Continuamos cun obradoiro no que creamos diversos obxectos de Nadal.

Recibimos a visita do Apalpador que recolleu as cartas coas nosas peticións e deunos un agasallo. E rematamos a xornada con xogos e bailes. Grazas familias pola vosa colaboración.

QUE SORPRESA!

 

Onte cando chegamos á biblioteca atopamos unha caixa debaixo da mesa. Non sabíamos de quen era e preguntamos ao resto das mestras. Ninguén sabía nada. Rapidamente os meniños comezaron a lanzar hipóteses. E se a deixou O Apalpador? Ou Papá Noel? Ou os Reis Magos?... Decidimos abrila e …  Que  sorpresa! ... Todos eles nunha carta contábannos que recibiran as nosas misivas e deixábannos xoguetes e un libro.

O APALPADOR

Como xa vén sendo unha tradición na nosa escola, coa chegada do Nadal traballamos ao redor da figura do Apalpador para dar a coñecer este personaxe das montañas do Courel. Para os que aínda non coñezan a súa historia, a continuación vos deixamos este vídeo do CEIP Coirón Dena.

Todos os anos, os meniños escríbenlle unha carta na que lle piden algún xoguetiño de madeira para a clase. El adoita vir recollelas ao noso festival de Nadal. Debido á pandemia, este curso non poderemos realizalo. Pero o Apalpador recibirá igualmente as misivas.

OS AGASALLOS DO APALPADOR

Este ano o Apalpador deixounos na escola unha chea de cousiñas de madeira para compartir: quebracabezas, xogos de encaixes, un camión de bombeiros, outro de policías, unha ambulancia, bonecos, trens … Os regalos estaban agochados e non os atopamos ata despois do recreo. Os meniños tiveron pouco tempo para enredar con eles pero seguro que nos vindeiros días recuperarán o tempo perdido.

CARTAS PARA O APALPADOR

Esta semana andamos a traballar ao redor da figura do Apalpador, un persoeiro que vive nas devesas do Caurel. Cando chega o Nadal, baixa ás casas dos meniños a deixarlle xoguetes de madeira que fabrica durante o ano. Cada curso vén a nosa festa e recolle as cartas coas peticións dos meniños para a escola. Para telas listas cando chegue, estivemos vendo cátalos de xoguetes de madeira e escribíndoas na biblioteca.

OS REGALOS DO APALPADOR

No festival de Nadal entregamos ao Apalpador as cartas dos meniños  co listado das cousiñas que nos gustaría que trouxera á escola para compartir. Hoxe, mestres buscábamos o calendario do 2019, atopamos os agasallos. Deixounos dous quebracabezas e un barco pirata que temos que montar, pero xa enredamos cos monecos.

FESTIVAL NADAL 2018

CARTAS PARA O APALPADOR

Cando se achega o Nadal, O Apalpador baixa das montañas do Courel cunha morea de agasallos de madeira para repartir entre os meniños galegos. Dende vai varios anos, sempre ven ao festival de Nadal a recoller as cartas coas nosas peticións para as aulas. A semana pasada xa estivemos consultando diversos catálogos e todos escribiron as misivas. Durante as vacacións intentará traernos á escola algo do que pedimos para compartir. Para os que desexen saber máis sobre este persoeiro, neste enlace tedes cancións  e algunhas actividades.

O AGASALLO DO APALPADOR

Este ano o Apalpador sorprendeunos deixándonos na aula un bonito castelo despregable con bonecos de madeira. A mestra Ana axudounos a montar a casiña que nos regalara fai tempo e xuntamos todas as pezas. Agora temos un recuncho cheo de figuriñas coas que lles encanta enredar aos meniños para montar as súa propias historias.

CARTAS PARA O APALPADOR

O vindeiro xoves celebraremos o noso tradicional festival de Nadal no Auditorio de Ribadumia. No transcurso da mañá realizaremos diversas actividades e recibiremos a visita do Apalpador. Xa temos listas as cartas coas peticións dos nenos para entregarllas ese día, seguro que fará todo o que poida para traer un agasallo que guste a todos.

OS AGASALLOS DO APALPADOR

Unha ambulancia, un coche de bombeiros, un helicóptero, un taxi, un coche de policía, un camión con remolque e un pequeno guindastre … O Apalpador  deixounos na aula unha bolsiña con todos estes vehículos de madeira e unha torta de aniversario con candeas e números. ¡Que ilusión cando a atopamos sen esperala!

O APALPADOR

O Apalpador é un personaxe mítico galego que vive nas devesas do Caurel. Polo Nadal baixa das montañas, entra de noite nos cuartos dos nenos,  pálpalles a barriguiña por ver se están mantidos e déixalle xoguetes de madeira feitos por el mesmo e unha presa de castañas.

Todos os anos na biblioteca os meniños escríbenlle unha carta na que lle piden algún xoguetiño para á escola. El adoita vir a nosa festa de Nadal, recolle as misivas e intenta atender as peticións e deixar os agasallos nas clases durante as vacacións. Non sempre consigue traer todo o que pedimos pero seguro que o intentará.

COMEZAMOS O SEGUNDO TRIMESTRE

Onte, no noso primeiro día de escola despois das vacacións de Nadal, foron moitas as actividades que tíñamos pendente. O primeiro tachar no calendario todos os días que estivemos sen vir á escola e comprobar que o ano 2015 chegou ao seu fin. Despois substituílo por un almanaque do 2016 e seguir marcando ata sinalar a data actualizada. E por último, comezar a anotar os acontecementos principais do novo ano, empezando polo máis importante, os aniversarios de cada neno. Na casa tamén podedes aproveitar as avantaxes dos novos calendarios realizando as propostas desta entrada do curso pasado.  

Pero sen lugar a dúbidas a mañá veu marcada polos agasallos do Apalpador.  Este ano sorprendeunos cunha pequena cidade de madeira e unha gran casiña de bonecas con mobles para as diferentes habitacións. Dende agora temos un recuncho novo na aula: o da casiña de bonecas.

O APALPADOR

Onte dedicamos a nosa visita semanal á biblioteca escolar a lembrar a figura do Apalpador, ese persoeiro que todos os anos polo Nadal baixa das montañas do Courel a deixarnos unha morea de agasallos. Son xoguetiños que el mesmo realiza coa madeira de mellor calidade que atopa. Vimos os seus contos e despois decidimos que xoguete queriamos que nos trouxera à escola para compartir cos compañeiros. Escribimos as cartas e xa as temos listas para darllas o día da festa de Nadal se pode vir a visitarnos.

COMEZAMOS O SEGUNDO TRIMESTRE…

Despois das vacacións de Nadal son moitas as novidades que traemos para contar aos amigos: os regalos de Papá Noel, as reunións coa familia, pequenos incidentes… Case todos volven con ilusión menos quen esqueceu o ben que se pasa na escola. Para eles temos unha chea de bicos, apertas e cóxegas que fan milagres e axudan a lembralo con facilidade.

Pero hoxe, sen lugar a dubidas, os protagonistas foron os agasallos que o Apalpador nos deixou na clase. Este ano trouxo un par de xogos de mesa que nos encantaron. O mellor xeito de empezar un novo trimestre é probándoos. Primeiro o de equilibrio: tirar o dado, coller a cor mandada e intentar colocar as pezas sen que caian … aínda que tan divertido nos resulta conseguilo como tirar con todo. Despois co de pesca: coller a caña, enganchar o peixe e ver os tantos acadados… o que máis puntos consiga gaña. Mañá seguiremos xogando, agora que xa sabemos o mecanismo non precisamos da axuda da mestra.

CARTAS PARA O APALPADOR

Na nosa escola continuamos cos preparativos que rodean á festa de Nadal. O Apalpador xa nos confirmou a súa asistencia e virá no transcurso da mañá a recoller as cartas coas nosas peticións. Hoxe estivemos decindo que xoguetiño de madeira nos gustaría que trouxera para compartir na clase. Fixemos tarxetiñas para que os pequenos superan como se escribían e cubrimos as cartiñas. Agora temos que esperar a que chegue tan desexado día.

O APALPADOR

Aínda falta un mes para o Nadal pero xa temos que empezar cos preparativos para a festa que celebraremos o día 19 de decembro. Se a complicada axenda do Apalpador llo permite, ese día virá a recoller as cartas coas peticións para as nosas aulas. Onte, na visita semanal que facemos á biblioteca escolar, estivemos vendo os contos que temos del e lembrando a historia deste persoeiro que vive nas montañas do Courel e baixa cada Nadal con agasallos de madeira para todos os cativos. Os que desexen coñecer a súa historia ou vela de novo, poden facer clic aquí, primeiro tedes o conto e despois varias actividades LIM.

Onte tamén estivemos traballando ao redor da canción que vos deixamos a continuación, escoitádea, a ver se vos gusta.