XORNADA DE PORTAS ABERTAS 2016

Do día 1 ao 29 de marzo permanecerá aberto o prazo de solicitude de admisión de alumnos para o vindeiro curso 2016/17. Para todas as familias interesadas en matricular aos seus fillos na nosa escola e que desexen coñecer o seu funcionamento,  mañá haberá unha xornada de portas abertas. Ás 16:00 horas poderán visitar a aula e ver súa organización baseada en diversos recunchos de xogo e aprendizaxe. Terán a oportunidade de percorrer as instalacións do centro, falar coas mestras especialistas e aclarar as súas dúbidas e inquedanzas coa que será a futura titora dos seus fillos. Na nosa aula ofertamos 20 prazas das que 10 xa están ocupadas. 

ANIVERSARIO DE ROSALIA

Como xa vos comentamos nunha entrada anterior, na escola gústanos conmemorar o aniversario da escritora de Rosalía de Castro cociñando unha torta de amorodos con nata. Este ano continuamos coa tradición con sobaos, fresas, nata e moita ilusión. O mellor, apagar as candeas entre todos. Unha mágoa que non poidamos poñer as 179 que lle correspondería.

COAS RAQUETAS PARA CASA

Agora que os cativos xa remataron de traballar en ximnasia coas raquetas e as pelotas que nos regalara o papá de Candela, chegou o momento de personificalas co nome de cada neno e levalas para casa. Seguro que hoxe se divirten intentando demostrar o aprendido e practicando en familia. Unha vez máis, graciñas papá polo teu agasallo.

FELIZ DÍA DE ROSALIA

Cada 24 de febreiro conmemorase o aniversario do nacemento da escritora Rosalía de Castro. A Asociaciónde Escritoras e Escritores en Lingua Galega (AELG) propón á cidadanía que agasalle un libro en galego e unha flor e son moitas as actividades que os centros escolares organizan para celebralo. Na nosa escola gústanos facelo apagando as candeas dunha torta de nata con amorodos que elaboramos no obradoiro de cociña, pero iso será o venres.

Esta semana, a hora de ler, estámola dedicando aos seus poemas e hoxe Carla tróuxonos un precioso libriño para enriquecela. Paseniño imos ir lendo todos. O favorito do día foi a versión musicada por Migallas de “O moucho” que vos deixamos a continuación para que na casa tamén vos divirtades con ela.

ÚLTIMAS NOVAS

Nas pasadas semanas foron varias as noticias ao redor das que traballamos cos diferentes xornais. 

A partir das fotografías do diario Marca descubrimos o waterpolo e o balonmán, no encerado dixital vimos un anaquiño dun partido e a mestra Ana explicounos un chisquiño algunhas das súas regras de xogo. Tamén tróuxonos camisetas e unha chea de carnés do equipo de Pontevedra e contounos moitas cousas curiosas. Graciñas Ana por compartir connosco os teus pequenos tesouros.

Pero a noticia que deixounos a todos abraiados foi o incendio no casco antigo de Pontevedra. 

Vimos fotos e vídeos en internet e comprendemos de inmediato a importancia de saber actuar en caso de emerxencia. 
Para estar preparados, na nosa escola fixemos un simulacro de evacuación e todos actuaron como auténticos chicos maiores. Agora xa sabemos que é imprescindible deixar o que esteamos a facer, saír logo pero en orde, sen empuxar e seguindo á mestra ata o punto de encontro.

EL BAILE DE LOS ANIMALES

Sen lugar a dúbidas, a actividade estrela da semana pasada foi “El baile de los animales”.  Cada día gústanos máis isto de movernos ao son dunha música pegadiza seguindo unha coreografía predeterminada. Non sempre conseguimos seguir ben o ritmo nin realizar correctamente os movementos, pero o pasamos xenial.  Se a isto lle engadimos que posteriormente traballamos o texto da canción e avanzamos no coñecemento da lingua escrita, o resultado é enriquecedor para todos.

E para que tamén bailedes na casa, a continuación vos deixamos o vídeo de Brujicanciones no que nos baseamos.

ANIVERSARIO DE RITA E LUCÍA

LIBROS DE GOYA

Como xa vos comentaramos nunha entrada anterior, este curso imos coñecer ao pintor español Francisco de Goya. Esta semana, na nosa visita á biblioteca escolar, descubrimos que Zapatocas tíñanos preparado un recuncho cheo de libros onde puidemos ver moitas das obras deste autor. Aos cativos gustoulle especialmente contemplar os xogos cos que xa enredaramos na escola: “A pita cega”, “O pelele” e “Os zancos”. 

Nos vindeiros meses continuaremos traballando ao redor deste artista e precisamos saber onde están os exemplares que hai na biblioteca. O luns vimos que temos que ir á zona de consulta e buscar nos libros de arte que son os que teñen a cor rosa e o número 75.

CATÁLOGO DE DISFRACES 2016

Non podíamos dar por rematado os nosos traballos ao redor do Carnaval sen realizar o noso particular catálogo de disfraces. Paseniño cada meniño foi elixindo o traxe que máis se adaptaba aos seus gustos, a ver se recoñecedes nas imaxes aos nosos espectaculares modelos tras os amaños oportunos.

FILLOAS

Aínda que a forte choiva do venres non nos deixou ir buscar os limóns a nosa horta, ¡que ben cheiraban os que tíñamos cando os raiamos!... ¡Como lles gustou aos cativos bater e mesturar os ingredientes!...  pero sen lugar a dúbidas o máis emocionante para eles foi cascar os ovos.

UN BAILE EN PIXAMA

A orde do Meco para o xoves da semana pasada era clara: ¡Vir á escola co pixama posto!. E así acudimos todos a clase, moitos con bata de casa e zapatillas incluídas para que non nos faltara detalle. 

Con esta cómoda vestimenta, practicamos o divertido baile “Tomaditos en parejas” de Brujicanciones que aprendemos para a festa de Entroido.

A continuación vos deixamos o vídeo por se queredes probar a realizado na casa, veredes que ben o pasades.

SEMENTANDO TÁMARAS

A semana pasada coa mestra Ana na aula de natureza, os cativos prepararon un riquísimo mousse de laranxa . Para a súa elaboración, ademais dos froitos da horta da escola, precisaron de iogures naturais. Eses envases decidimos  aproveitalos para plantar as támaras que apañamos cando fomos ver a palmeira da igrexa de San Xoán de Leiro. Non sabemos se xerminarán e pero ímolo intentar.

O primeiro furar cun punzón os envases, despois botarlle terra e introducir dúas sementes. Por último levalos ao invernadoiro e regar. Xa vos contaremos que vai pasando con elas e se antes de fin de curso conseguiremos ter palmeiras para todos.

ENTROIDO 2016

Cancións, bailes, xogos, obradoiros, contos, merendola, máscaras, disfraces, desfile … esta mañá na nosa festa de Carnaval tivemos de todo, ata o sol acompañounos. Unha vez máis graciñas a todos os que axudaron a gozar deste día tan especial.

A PALMEIRA DE LEIRO

Dado que andamos a coñecer  a palmeira canaria, o venres fomos ver o exemplar que hai no xardín da igrexa de San Xoán de Leiro. Esta planta, considerada como o símbolo natural do  Arquipélago Canario, produce uns froitos comestibles chamados támaras, parecidos aos dátiles pero de sabor amargo e áspero que serven ocasionalmente para alimentar ao gando. Cando chegamos vimos que o chan estaba cheo deles e non dubidamos en apañalos para observalos detidamente na aula e probar a plantalos.

Comprobamos que o seu tronco é moi groso e rugoso e que alcanza tal altura que a súa copa pode observarse por encima dos tellados.  

TEMPO DE ENTROIDO

Despois duns días de duro traballo, os nosos disfraces xa están listos para lucir o día da festa de Carnaval. Agora soamente queda que o bo tempo do que hoxe gozamos continúe o venres e poidamos facer o tradicional desfile. Este curso os nosos traxes pretenden render unha pequena homenaxe ao Entroido de Tenerife coa fantasía como protagonista.

Lembrade que este ano será na Casa de Cultura de Ribadumia e que as familias poden vir tamén disfrazadas e participar da festa a partires das 11:30.

E mañá, para obedecer as ordes do Meco, non esquezades o pixama.