LOLA EN NUEVA YORK

Este é o título do conto que vimos onte na nosa xornada na biblioteca escolar. Ademais de lelo, aproveitamos para ver cal é a súa localización habitual para cando o queiramos levar prestado. Como sabedes, na zona de literatura infantil os libros están organizados por editoriais, así que, o primeiro era ver a cal pertencía, como se chamaba e cal é o seu anagrama para que os que aínda non saben ler poidan localizalo con facilidade.

Buscamos pola biblioteca e atopámolo rapidamente, despois no encerado vimos o que significaban o "E" e o "J" que aparecen no debuxo. Miramos os libros que temos desta editorial e comprobamos como no seu lomo todos teñen en pequerrechiño o anagrama da editorial. Á hora do emprestito queríamos levalo para casa e gozar de novo coas aventuras de Lola en Nova York, pero mentres esteamos traballando ao redor desta cidade, temos que esperar que o lean tamén os nenos das outras aulas.

MUÍÑOS DE VENTO

Sempre que podemos levamos ao noso obradoiro de cociña algunha das cousiñas que traballamos pola semana. Sen lugar a dúbidas, o que inmediatamente asociamos con Don Quixote son os muíños de vento e, o pasado venres, cociñámolos. A ver que vos parecen.

A EXPOSICIÓN DE DALÍ EN MADRID

Fai un par de semanas vimos a información no xornal e continuamos traballando ao redor dela. Aprendemos como se chamaba o museo que acollerá a exposición e quen é a "Reina Sofía", persoa á que fai referencia o seu nome e que vemos con frecuencia nos periódicos. Tamén descubrimos que o “X” en “exposición” non soa como en Anxo e que hai que ter coidado cando lemos. Marcamos no noso calendario cando comezaba a exposición, cando remata e, aínda que, como ben di Paula, non podemos ir a Madrid a vela, esperamos que os medios de comunicación falen dela e vexamos as imaxes na televisión. Aquí vos deixamos un pequeno vídeo da noticia en http://www.rtve.es

Más de 200 obras en una exposición en el Reina Sofía dedicada a Dalí

Más de 200 obras en una exposición en el Reina Sofía dedicada a Dalí

UNHA ADIVIÑA DEDICADA A CERVANTES…

No seu momento dixémoslle: “¡Ata pronto!”, e aquí a temos de novo, falamos de Gloria Fuertes, unha das nosas poetisas favoritas. Do seu libro “Adivinanzas de Gloria” sacamos a que escollemos para o mes máis curto do ano. Seguro que con tantas pista xa sabedes a solución, agora soamente vos queda mandar un comentario coa resposta.

E esta tarde, ás 18:00 horas, non os esquezades que tedes unha cita no Auditorio de Ribadumia co espectáculo "A nena e o grilo nun barquiño" baseado no novo disco-libro de Magín Blanco. Para os que desexen ir practicando as cancións aquí vos deixamos unha mostra.

A ESTATUA DA LIBERDADE

Sen lugar a dubidas é o monumento máis representativo de Nova York. No recuncho que estamos montando desta cidade temos varias imaxes dela e, nos libros da biblioteca que falan de Nova York, comprobamos que aparece en todos. Agora xa son varias as cousiñas que coñecemos deste monumento. ¿Quen se anima a enviarnos  un comentario contándonos cantas puntas ten a súa coroa?...

Para os que prefiran familiarizarse coa historia da Estatua da Liberdade a través do vídeo, aquí lle deixamos un de Cantinflas

CERVANTES NAS MOEDAS…

Vímolo onte nalgúns céntimos que tiña a mestra, tamén atopamos un no que aparecía a Porta de Brandeburgo. Martiño dicía, e con razón, que non miraba as moedas por ese lado senón polo outro onde poñía o que valían.

Para hoxe, se nos daban permiso os nosos papás, quedamos encargados de mirar nos petos para ver se atopabamos máis moedas nas que aparecera o creador de Don Quixote.

Laura tróuxonos unha de 10 céntimos na que aparecía, e Paula outra de 20, esta última tamén ensinounos unha moeda na que estaba o rei de España, ao que coñecemos de ver con frecuencia no xornal. Nos seguintes días seguiremos investigando e sobre todo mirando as moedas polas dúas caras a ver se topamos algunha na que apareza Don Quixote.

FELIZ DÍA DO LIBRO

Hoxe, aniversario da morte de Miguel de Cervantes, celébrase o Día Munidal do Libro. Na nosa aula, para unirnos a esta conmemoración, repartimos entre os nenos a nova guía de usuarios da nosa biblioteca escolar. Durante o verán e o principio de curso, grazas ao orzamento recibido co premio do concurso nacional, foron moitos os cambios que se realizaron na biblioteca e, nesta guía actualizada, aparece recollida a nova distribución e unhas nocións básicas sobre a súa organización e funcionamento.

Como o ano pasado, estes días, tamén os estamos dedicando a coñecer a obra máis emblemática de Cervantes. O venres vimos o primeiro capítulo da serie televisiva “Don Quijote de la Mancha” da que nos encanta a súa pegadiza canción. Hoxe comezamos a ler o libro “Las aventuras de Don Quijote” e a nosa bolsiña de lectura veu cargada de contos relacionados co “cabaleiro da triste figura”: “De la a A a la Z con don Quijote”, “Don Quixote e Breogan”, “Dulcinea, a nena cabaleira” …

O noso obradoiro de cociña deste venres tamén estará dedicado a Don Quixote, pero nós en lugar de pelexar cos muíños temos pensado comelos. Xa vos contaremos.

E para os que prefiran xogar, poden clicar na  imaxe inferior.

FLORES DE FROITA

PSICOMOTRICIDADE EN NOVA YORK

Despegamos rumbo a Nova York e pouco a pouco imos collendo a velocidade suficiente para cruzar o Atlántico. Ao chegar o primeiro que vemos e a Estatua da Liberdade, pero para xogar hai que ter claro que a man dereita é a que ten que estar arriba co facho e a esquerda pegada ao corpo coa táboa. Os que teñen ladrillos amarelos son os taxis e o resto os coches. Para cruzar a Ponte de Brooklyn hai que ir a modo se non queremos caer ao río Hudson… Xogamos, interiorizamos o noso esquema corporal, afianzamos a nosa lateralidade á vez que enriquecemos o noso vocabulario e familiarizámonos con algúns dos lugares emblemáticos desta cidade…

E para os que boten de menos Kenia, aquí lles deixamos un LIM co que lembrar algunhas das cousiñas que vimos o trimestre pasado.

DALÍ NO XORNAL

E non soamente Dalí, senón tamén Picasso. Ámbolos dous saíron nun dos periódicos que vimos a semana pasada. O primeiro pola exposición que haberá en Madrid e ao redor da cal seguiremos traballando, e o segundo por cumprirse o 40 aniversario da súa morte. Ademais, nun dos libros que temos na biblioteca, descubrimos que cando Dalí viaxou a París foi visitar a Picasso a quen admiraba.

XOGANDO ÁS ADIVIÑAS

Seguimos co noso calendario de adiviñas. Esta semana cambiamos de ano, pasamos ao 2014 e tocoulle quenda a xaneiro. ¡Que ilusión fai lembrar que o día 6 é festivo porque veñen os Reis Magos!, despois todas as conversas dos cativos xiraban ao redor do que lle pensaban pedir As Súas Maxestades. Pero antes disto, no libro “Xogando ás adiviñas”,  limos varias e descubrimos que  cada vez cústanos menos atopar a solución. ¿E vós, sabedes xa a resposta á desta semana?...

UN COELLO DE ANGORA

Chámase Pepiño, parece un peluche pero é un coelliño. Ten tanto pelo e tan longo que case non se lle ven os ollos nin a boca. Deixase acariñar e móvese pola clase con soltura. Este tróuxonolo hoxe a mestra Marina, contounos que ten que cortarlle o pelo de diante dos olliños para que poida ver ben. Xa son tres os que tivemos en clase e todos diferentes. ¡Graciñas a todos os que nos axudan a ter estas enriquecedoras experiencias!.

UNHA TARDE NA BIBLIOTECA MUNICIPAL

Para ver libros, ler contos, andar nos ordenadores, levar en empréstito películas, facer os deberes, xogar, asistir a sesións de contacontos… Son múltiples as opcións que ofrecen as bibliotecas municipais.

A do noso concello está situada na Casa da Cultura de Ribadumia. Rubén contounos que vai coa súa mamá e o seu irmán, con frecuencia atopa libros con información sobre os temas que traballamos na aula e tráenolos para que nós os vexamos. Mencía tamén comparte con nós algúns dos contos que colle na biblioteca municipal de Meis, hoxe contounos que na “dela” tamén hai xornais para ver. En concellos limítrofes temos a de Cambados, Vilagarcía… E vos, ¿a que biblioteca municipal gústavos ir?... Animádevos a mandarnos fotos a escoladeleiro@gmail.com  coas actividades que facedes na vosa biblioteca municipal e crearemos o noso particular catálogo de bibliotecas públicas.

FÉLIX CHEGOU A NOVA YORK

Soubémolo  hoxe, cando limos a carta que lle enviou a súa amiga Sofía. Nela fálanos dunha estatua xigante, un parque enorme e rañaceos. Na vindeiras semanas investigaremos sobre todo isto. Para empezar, ademais de buscar varias palabras significativas na carta de Félix, estivemos vendo os libros que temos na biblioteca que falan Nova York. 

Tamén imos montar un novo recuncho en clase, polo que, se tedes contos, libros, DVDs, fotos, quebracabezas, postais, mapas, obxectos, folletos de axencias de viaxe ou calquera outro material relacionado co tema e adaptado ás idades dos nosos alumnos, podédelo traer para velo na aula e aprender todos xuntos.

PARA MERENDAR… ¡UN COCHE!

OS IRMÁNS GRIMM MARCHAN PARA SISÁN

O luns pasado foi o último día que pasamos con eles. Pero antes de que a súa maleta siga percorrendo o resto das escolas, na hora do empréstito, os nenos que quixeron, puideron optar por levar para casa o seu conto dos Irmáns Grimm favorito. Para os que desexen comprobar canto aprenderon neste trimestre sobre os libros que temos na nosa biblioteca destes autores, aquí lles deixamos o seguinte LIM, soamente tedes que clicar na frecha branca ou no cadradiño de pantalla completa e… ¡a xogar!

¿CAL É O ANIMALIÑO?...

¿Preparados para a seguinte adiviña?... Nesta ocasión a súa autora é Gloría Sánchez, dela xa coñecíamos as súas poesías pero non leramos as súas adiviñanzas. O mércores, no seu libro “Adiviñas de animais” vimos unha chea delas e estivemos lembrando algún dos libros que máis nos gustaran: “Dez piratas”, “Rimas con letra”… Se queredes familiarizarvos coas súas obras, fai un par de anos foi a escritora homenaxeada no Salón do Libro de Pontevedra e realizamos unha guía de lecturas á que podedes acceder clicando aquí. Para o calendario escollemos unha das máis doadas, seguro que xa todos sabedes cal é a solución… ¿Quen se anima desta vez a enviarnos un comentario coa resposta?...

ULTIMOS DÍAS EN KENIA

Despois de todo un trimestre en Kenia, chegou o momento da despedida. Hoxe comezaron a marchar para casa os materiais aportados polos cativos e, entre mañá e a vindeira semana, remataremos cos que quedan. Nesta ocasión optamos por dicirlle adeus a este país africano cantando e bailando a canción que aprendemos co mestre Felipe:  “Jambo Bwana”, que ven a dicir algo así como: ¡benvidos a Kenia!.

RECOMPILANDO INFORMACIÓN DE DALÍ

O luns, dedicamos a nosa visita semanal á biblioteca escolar a buscar os libros que temos de Salvador Dalí. Vimos onde están colocados e comprobamos que todos teñen unha pegatina rosa e o número 75 no seu lombo porque tratan de arte. Mentres, o noso recuncho da aula vai medrando coa contribución de todos: libros, debuxos, datos curiosos, láminas… ata un xadrez con pezas baseadas nos seus deseños coas que lles encanta enredar aos cativos. Nas vindeiras semanas e ata fin de curso, iremos vendo, lendo e organizando todos os materiais aportados para ir sacando información e adaptándoa aos intereses dos nenos. Unha vez máis grazas a todas as familias pola súa colaboración.

UNHA VISITA ESPECIAL…

Ou mellor dito dúas, unha onte e outra hoxe. Trátase de dous coelliños que viñeron a pasar a mañá connosco. O luns todos queríamos collelo no colo e darlle mimos, pero pronto descubrimos que eles senten de xeito diferente, teñen medo de nós e, coas súas fortes uñas, poden rabuñarnos. María contounos que o dela chamase Blanquito e vive no cortello da súa avoa, tróuxolle verdura para comer pero non probou nin un chisco. Cando hoxe recibimos a Rayo, o coelliño de Martiño, xa tiñamos máis experiencia nesto de coller coellos, sabíamos que era mellor que a mestra nolo pousara no noso colo, enriba do mandilón, e despois acariñalo cando estivera tranquiliño. O que aprendemos dende o primeiro día é que despois de tocar os animais sempre hai que lavar ben as mans. “A hora de ler” aproveitamos para ver o libro “O coello” que ten moita información sobre estes animais domésticos.

Descubrimos que lles gusta realizar as súas actividades nas horas do día con menos luz, pola mañá e no serán, tal vez por iso o de Martiño tampouco quixo comer o penso. No libro tamén vimos como son os seus órganos internos e o seu esqueleto. Nos seguintes días seguiremos aprendendo cousiñas sobre estes mamíferos.